橙新聞

方以文 | 睇好電視

睇好香港電視製作。好就讚,唔好就彈。期待本地節目重光之日。

【方以文|睇好電視】《女人必學100道菜》宣之於口嘅女性定型

文:方以文

無綫經典「煮食」比賽節目《美女廚房》無論係邊一輯,都有觀眾話個節目浪費食物。除此之外,仲有一啲觀眾話個節目將女性定位做「煮嘢食一定要叻」,煮嘢食唔叻就會畀幾位男主持批評,甚至係恥笑。由2006年至2009年嘅頭兩輯,至到九年後2018年換咗主持嘅第三輯,好似都無改呢個定位。

《美女廚房》男女定位被質疑

點解我會用「好似」呢兩個字?因為縱然每一輯都係男主持笑女藝員煮得差,縱然有主持人大大聲話「啲奶係假」,縱然每一輯評審嘉賓都係男性,但係喺節目裡面都冇講到出口話女人一定要煮得一手好餸。喺第一輯「總決賽」之前,仲做過兩集《美男廚房》,由主持鄭中基、梁漢文、方力申做參賽者,評審就換咗做清一色女嘉賓,叫做想拎返個男女平衡。

【方以文|睇好電視】《女人必學100道菜》宣之於口嘅女性定型

(影片截圖)

嚟到2020年,無綫喺肺炎疫情肆虐之下,近年綜藝節目兩大板斧之一嘅「旅遊」,因為世界各地採取措施減少人口流動而製作大減。另一板斧「煮食」似乎要頂住啲播放時數就唯有加碼,肥媽、鼎爺唔夠數或者見得太密,就加埋「三姐」蕭秀香,搭住江美儀另開一個新煮食節目《女人必學100道菜》。

女人煮好餸只為婚姻美滿?

有睇過《流行都巿》嘅話,都知三姐霸氣十足而有料到,佢示範餸菜時會分享箇中技巧,學到嘢。配搭同樣係硬朗十足嘅江美儀,未播都想像到有火花。本來都幾期待,但一睇到個節目名叫做《女人必學100道菜》已經覺得不妙,點知睇完開播前嘅宣傳,仲有頭幾集嘅節目,簡直係得人驚。

【方以文|睇好電視】《女人必學100道菜》宣之於口嘅女性定型

(影片截圖)

女人要「必學」煮餸,可以有好多原因,煮嘢食畀自己食開心吓又得。如果真係要喺屋企孭起煮飯嘅責任,又可以sell好快煮好一餐飯,留返啲時間畀自己。不過好可惜,喺宣傳活動、宣傳廣告,同埋頭3集節目嘅內容,都只係傳達一個訊息:「女人要嫁得出、要綁住老公,就要煮嘢食好味」。

「性別 - 社會功能」定型

「滾個靚魚湯就嫁得出」、「搞得掂呢個餸,奶奶錫晒你呀」、「整到個好餸就箍到男人個胃」、「整咗出嚟都嫁唔出,問三姐啦」,呢類咁嘅稿,喺頭3集頻繁出現,聽到我耳都側埋。印象中好似從未聽過電視節目主持人嘅稿會明刀明槍咁將「女人 - 煮好餸 - 美滿婚姻生活」連結,喺21世紀仲會着力提出呢類「性別-社會功能」框框,的確令人意外。就連有唔少人討論佢有冇貶低女性嘅《美女廚房》,幾位男主持笑到啲女參賽者飛天都好,都冇講類似嘅對白。

【方以文|睇好電視】《女人必學100道菜》宣之於口嘅女性定型

(影片截圖)

今次《女人必學100道菜》由兩位女主持講呢啲「舊社會」對白,或者製作團隊覺得已經拎咗個平衡?咁當然個衝擊係冇男主持講咁大,但女人為女人設吓社會形象框框,諷刺感覺更濃。三姐教煮餸真係好睇,實用又唔悶,可惜畀呢個節目設定,搞到成件事好古怪。

落筆之時已經播完第4集,第4集居然冇晒呢啲「煮好啲餸就有美滿幸福婚姻」嘅對白,就連第5集嘅預告都冇。到底係發現咁做唔妥而剪走呢啲對白,定只係頭幾集會講,設計好要嚟做初段嘅宣傳?點都好,剪走晒呢類對白稿就係最明智。

責編:EK

編輯:Hin

編輯推薦

【方以文|睇好電視】《調教你男友》真摯取勝 冀展現更闊光譜

落筆之時ViuTV《調教你男友》 播完第14集,仲有一集就大結局,只差另外三個仔仔嘅ending mission,成個節目嘅格局已定。記憶所及,喺播到第6集嗰時,個節目就開始雄踞官網最多人重溫節目排名第一位。喺第14集播完...

2020-07-24 16:47

【方以文|睇好電視】期待演員演技套路多變

最近睇完12集韓劇《雙甲小食店》,題材唔算新鮮甚至可以話老套,講鬼神之力助人助己解決心中遺憾,CG都唔係做得好精彩,有啲對打可以話係低成本製作,但勝在演員演出感人,帶到觀眾投入氣氛。一女兩男主角格局,...

2020-07-17 15:03

【方以文|睇好電視】《ERROR自救TV》打場華麗逆境波

希望生活中大小事務都順利過關,係人之常情,所以冇乜人鍾意打逆境波,但的確有唔少人擅長打逆境波。更有一大班人鍾意睇人打逆境波時,希望弱勢一方會逆轉勝。以前有朋友睇《龍珠》時成日鬧鳥山明,比達咁努力,...

2020-06-29 17:43

熱門評論

已複製連結