橙新聞

方以文 | 睇好電視

睇好香港電視製作。好就讚,唔好就彈。期待本地節目重光之日。

【方以文|睇好電視】《ERROR自救TV》打場華麗逆境波

文:方以文

希望生活中大小事務都順利過關,係人之常情,所以冇乜人鍾意打逆境波,但的確有唔少人擅長打逆境波。更有一大班人鍾意睇人打逆境波時,希望弱勢一方會逆轉勝。以前有朋友睇《龍珠》時成日鬧鳥山明,比達咁努力,點解唔可以畀佢打贏悟空,一次都唔得?我問佢,如果比達真係打得贏悟空,你會唔會咁肉緊,仲會唔會咁鍾意比達?

搞笑熱血感動兼備

15集《ERROR自救TV》,開播前近乎零宣傳,但開播之後就氣勢如虹,得到唔少網民大力支持日日推,唔使幾集時間就成為ViuTV官網最多人睇嘅節目,可喜可賀。節目大部分時間繼續承接之前《花姐ERROR遊1&2》嘅古靈精怪,製作組同埋ERROR四子亦喺呢方面做到不遺餘力,喺搞笑當中一直滲住陣熱血,加埋最後一集嘅總結同真心話,的確令人好感動,睇到眼濕濕。

【方以文|睇好電視】《ERROR自救TV》打場華麗逆境波

(Instagram圖片)

拍埋去同樣喺首屆《全民造星》參賽而出道嘅MIRROR一比,ERROR樣樣輸蝕:資源少、廣告少、job少,就連喺自己電視台嘅job都唔多。4個成員唔止一次公開呼籲ViuTV加人工。193喺IG發千字文話播完呢個節目就陷入待業狀態。加加埋埋,似唔似比達拎悟空做目標成日想超越佢,但又做唔到嗰種設定?睇緊《ERROR自救TV》時,唔少觀眾包括我在內,成為咗我嗰位戥比達唔抵嘅朋友。

一切都盡在掌握中

觀眾睇得開心,拎到嗰份熱血感動、處於亂世裡劣勢中搵到共鳴。ERROR成功透過今次節目鞏固已有fans之外,亦吸引到一班新支持者。ViuTV有口碑(應該有埋)收視。睇落幾方面都賺咗,唯一有少少負面評價嘅,或者係花姐呢個MIRROR+ERROR嘅「創造者」。

【方以文|睇好電視】《ERROR自救TV》打場華麗逆境波

(Instagram圖片)

喺MIRROR新歌《IGNITED》嘅Too Hot To Handle Version MV畀鏡粉話鏡頭分配唔公平嘅時候,正係《ERROR自救TV》播緊嘅時候,花姐唔只一次畀ERROR fans投訴,話啲資源去晒MIRROR度。《IGNITED》MV有兩個版本,ERROR就要自己賣tee眾籌拍MV。最終喺《ERROR自救TV》度首播《我們很帥》MV,成品同埋待遇睇落真係差天共地。

上乘逆境波配套

不過我要為花姐平反一下,佢係咪冇理過ERROR?ERROR係咪「冇資源」到咁嘅地步?《ERROR自救TV》有6個導演拍,算係大製作嚟,當中嘅甩漏低質應該係設計好。要做靚個節目唔容易,但要做一個大家接受到佢呈現出嚟係咁low budget,同時賺人熱淚嘅節目,難度就更高。

【方以文|睇好電視】《ERROR自救TV》打場華麗逆境波

(Instagram圖片)

今次《ERROR自救TV》可以話係打逆境波嘅上乘作品。無論係節目內容設定、實際情況、節目外似乎冇關係但其實有助節目定位嘅事,配合得天衣無縫。當然世事有時就係咁巧合,但又咁講,娛樂節目都係設計好嘅產品。我冇懷疑過ERROR四子嘅真心真性情同努力,今次ViuTV可以喺佢哋真心之上另加設計,將佢哋嘅賣點幾何級數擴大發放,我哋睇得開心,佢哋超額完成,咁就皆大歡喜啦﹗

責編:EK

編輯:Hin

編輯推薦

【方以文|睇好電視】編劇的難處 劇本與成品的距離

上一篇文寫咗多好有關於《降魔的2.0》嘅意見,差唔多全部都係針對劇本情節出到嚟嘅效果去講。再次強調,我只係喺出到嚟嘅作品上歸納,同由零開始創作同布局根本係兩回事,我係馬後炮、做塘邊鶴,係容易好多好多。

2020-06-17 17:45

【方以文|睇好電視】降魔的2.0輕重失衡 開拍第3輯要改善啲乜?

我鍾意《降魔的》第1輯,對第2輯真係愈期待愈怕受傷害。結果真係幾傷吓,我憑住對角色嘅愛,可以話用「捱」嚟睇晒第2輯總共25集嘅《降魔的2.0》。講明先,我係支持拍埋第3輯嘅,以下講嘅嘢都係想套劇好啲,希望第...

2020-06-09 17:50

【方以文|睇好電視】《歎息橋》創新風 港劇需要多幾個林保怡

15集《歎息橋》上星期喺ViuTV播完,以「非一般劇集」做宣傳,事先張揚每集「上帝視覺」加「角色個人視覺」嘅結構,率先為觀眾打好個底係好聰明嘅做法。「愛情羅生門」亦都有喺劇裡面實現到,唔係掛羊頭賣狗肉得個...

2020-06-02 16:44

熱門評論

已複製連結