橙新聞

八妺姐@論盡本地薑

90後本土麻甩女一枚,十年追星族,沉醉於香港娛樂及綜藝。八卦是正職,寫作是副業。少少野性,少少感性。

【論盡本地薑】高以翔猝死 製作團隊責無旁貸

文:八妺姐

近日香港社會動盪分裂,諗住睇多啲娛樂綜藝輕鬆吓,點知娛樂圈最近都係壞消息多。不久前韓星Sulli自殺,上個星期具荷拉亦相繼離去。噚日台灣型男高以翔喺拍攝中猝死,以上三個藝人都未到40歲。

【論盡本地薑】高以翔猝死 製作團隊責無旁貸

(IG圖)

Sulli同具荷拉飽受演藝同輿論壓力而自殺,高以翔係意外離去。八妺姐對於高以翔件事既心痛又悲憤。事件發生,我腦裡出現兩個問號,一:製作組究竟有冇評價風險?二:現場有冇足夠專業醫護人員?

八妺姐冇睇過《追我吧》,但睇返資料,佢係一個挑戰體能極限嘅節目,可以話係競技賽,內容包括徒手爬高牆、飛檐走壁等等,仲要由早拍到晚。據知當日高以翔已經身患感冒,當地仲係得攝氏9度,連續拍17個鐘,請問製作組點解唔去評估風險?點解明知對方身體唔舒服仍然去繼續拍攝?唔通「專業精神」緊要過一條人命?

【論盡本地薑】高以翔猝死 製作團隊責無旁貸

(IG圖)

最過份係,高以翔暈低兼心臟停頓三分鐘後,節目組仲繼續拍攝。而且報道提到,藝人黃景瑜更曾大叫:「X,還拍!救命啊!不拍了!」即係話,現場人員根本冇危機意識,甚至可能係為咗節目效果而唔立即搶救,結果延遲救治。

我曾經做過電視台幕後,當時係拍攝健康節目,我哋要諗一啲測試畀主持做,例如食某樣食物係咪可以一星期減到幾多KG,用某樣工具係咪可以幫助減腰等等。每個測試之前,我哋都會向醫生問專業意見,通常有咩反應或者預期效果,有咩人唔可以做等等。因為我哋知道,有啲嘢我哋擔當唔起,賠唔起,例如人命,例如健康。

【論盡本地薑】高以翔猝死 製作團隊責無旁貸

(IG圖)

要記住,藝人唔係鐵人,佢哋打呢份工一啲都唔易,隨時搵命搏。就算簽咗咩免責聲明,但始終係一條人命,冇咗就係冇咗。作為一個電視台嘅幕後,請畀返啲人性出嚟,唔好用藝人性命換收視。

責編:林偉德

編輯:Pearl Lo

編輯推薦

【論盡本地薑】睇劇睇到心寒 係因為有啲事正正發生喺現實中

本身鍾意睇離奇怪誕類型嘅劇集,一般情情愛愛嘅片我其實嘛嘛哋。不過最近唔少朋友睇《假設性無罪》睇到入迷晒,我就試吓睇啦咁,結果又真係捱眼瞓都想睇埋落去。

2019-10-24 16:34

【論盡本地薑】追星生涯中,我學習到最多嘅係勇氣

原來勇氣真係冇意間爆發出嚟,當你好渴望一樣嘢,啲勇氣真係會湧出嚟,我覺得唔止追星係咁,做其他事都應該係咁,只要你慾望夠強,你一定會做到。

2019-10-31 09:12

【論盡本地薑】MC Jin成功打入大陸市場唔單係因為Rap功了得

華裔美國饒舌歌手歐陽靖(MC Jin)近年因為上咗《中國有嘻哈》令人氣更上一層樓,成功打入內地市場。佢可以紅到發紫,其實當中唔止因為佢Rap功了得,更重要係佢本身嘅個人因素。

2019-10-03 09:12

熱門評論

已複製連結