橙新聞

港女講女

九十後死港女,戀愛大過天,持愛行兇,希望用閃光彈救地球。

【港女講女】回憶前度,總係特別美好

文:港女友

大概一年幾前,我有個女仔朋友同緊一個男仔一齊,當時女仔成日抱怨,個男仔幾差幾差,又唔細心溫柔,又唔浪漫,同佢一齊好悶,咁悶嘅日子點樣可以過一生一世呀?抱怨咗幾個月之前,個女仔終於同個男仔分手,分手嘅時候個女仔覺得好開心,有種脫苦海嘅感覺!

【港女講女】回憶前度,總係特別美好

(資料圖片)

到一年後嘅今日,女仔搵到另一個男朋友,呢個男仔同佢前度性格完全相反,呢個男仔非常貪玩唔定性,最鍾意同一大班男仔出去打機飲酒,有時玩到無咗人影。於是女仔又開始抱怨,佢覺得呢個男仔令佢好無安全感,唔定性嘅性格令佢睇唔到兩個人嘅將來。

然後最精彩嘅部分嚟啦:女仔開始懷念嗰個好悶好唔浪漫嘅前度,開始覺得「其實平凡係咪更好?」「悶都係一種安全感」⋯⋯突然之間佢覺得前度好好,好適合自己,好想搵番前度⋯⋯

【港女講女】回憶前度,總係特別美好

(資料圖片)

所以你話,人類嘅記憶係幾咁奇怪。隨住時間過去,人好容易會選擇性去記得一啲想記得嘅事。一段感情嘅甜同苦,真正放低之後,人好容易會只記得當中嘅甜,嗰個人嘅好,而唔記得咗當日呢個人帶畀你嘅苦與痛。

回想前度,總係特別美好。總係覺得其實當初都幾好,如果唔係XXX,今日都應該可以一齊過得好幸福。又或者會將責任放喺「時間」身上,如果唔係喺「錯的時間」遇上,如果係今日再遇上,可能會走到一生一世。

【港女講女】回憶前度,總係特別美好

(資料圖片)

算吧啦,呢個世界根本就無「如果」。何況我都幾肯定,人類嘅心根本就係非常貪婪,平凡嘅時候想要浪漫,不穩定嘅時候又想要平淡。根本就係坐這山望那山,先會覺得前度同埋人哋個男朋友特別好。

責編:林偉德

編輯:Hin

編輯推薦

【港女講女】真正被愛,係唔需要搵證據去證明

當一個人真正被愛,係唔需要喺日常生活中拼命搵小事做例子去證明。當有一刻你有疑惑你要去搵證據嘅時候,就證明對方根本冇表現到足夠嘅愛,冇帶畀你有足夠嘅安全感。

2019-04-04 09:20

【港女講女】邊個愛邊個多啲,重要咩?

愛呢樣野,從來都無對等,更加無得計算。如果你真係愛一個人,邊個愛邊個多啲又係咪真係咁重要?

2019-03-29 13:57

【港女講女】愛得太用力只會將對方逼得太緊

有啲人一拍拖就會「全程投入來愛你」,付出100%心機同時間去愛對方。但有時愛得太用力,往往會適得其反,愛得太用力會變成逼得太緊。

2019-03-22 13:42

熱門評論

已複製連結