橙新聞

港女講女

九十後死港女,戀愛大過天,持愛行兇,希望用閃光彈救地球。

【港女講女】女人最緊要三十歲嫁得出?!

  
【港女講女】女人最緊要三十歲嫁得出?!

圖:視覺中國

文:港女友
    
三十歲,對大部分廿幾歲嘅女人嚟講,都係一條無形嘅底線。三十歲左右結婚生仔,係好多女人嘅理想場景,所以為咗可趕上呢班「三十歲出嫁」嘅尾班車,好多女仔去到廿七、八歲就開始淆底。而近呢一年我真係見盡身邊好多差唔多年紀嘅女性朋友,由一顆粉紅少女心,變成一顆如狼似虎嘅恨嫁心。
   
分享其中一個例子,女仔做老師,成間學校都係女同事為主,男同事大多都名草有主。而女仔有個拍咗一年拖嘅男朋友,兩個人之間嘅問題不嬲都好多,例如個男仔唔上進唔儲錢,個男仔又好似未定性,兩個人相處都唔見得特別甜蜜。而個男仔唯一可取之處就係佢肯結婚,呢點對於快將三十嘅女仔嚟講好吸引。
     
【港女講女】女人最緊要三十歲嫁得出?!

圖:視覺中國

然後有日我問個女仔:「你確定你係想同呢個男人一世?」女仔話:「其實個男仔都唔係好差,如果我唔同呢個男仔結婚,我出到去又唔知等幾耐先搵到另一個,又唔知要再拍幾耐先結到婚。同埋我想三十五歲前生仔,我擺唔到幾耐啦⋯⋯」
  
嗰刻我望住個女仔,我見唔到幸福兩隻字,我只見到「屈就」。
  
有句說話近呢一年我成日都放喺口邊:「嫁得出係咪就代表幸福?」有時我真係搞唔清楚啲女仔結婚係為咗趕deadline,定係為咗愛?我真係理解唔到點解要將「三十」變成一條死線,唔知仲以為三十歲就生命結束,喂,大佬呀,三十歲咋,你人生一半都未到呀!究竟大家有無諗過,結咗婚其實先係故事嘅開始?畀你趕得切三十歲結婚,三十五歲生仔,然後呢?然後就要同一個唔係太愛唔係太好嘅男人共同生活餘下五十年?
  
【港女講女】女人最緊要三十歲嫁得出?!

資料圖

如果你要我揀「單身多十年」定係「對住個唔愛嘅男人五十年」我一定揀前者。只有一次嘅生命,我真係唔甘心為咗喺面上貼上「嫁得出」三個字,就屈就自己淨低嘅人生。做人唔好太短視,唔好為爭一時之快,唔好為同人爭一日之長短,就委屈自己。
  
責編:李玥展

編輯:Stacy

編輯推薦

【港女講女】不屬於你的愛情,你何必硬擠進去

最近見到有個女仔朋友成個人落哂形,好似有舊灰雲喺佢頭頂咁,茶飯不思,做咩都無心機咁。原因係佢最近同咗一個對佢愛理不理嘅男仔一齊,明明一開始應該係熱戀期,但個男仔好似風雲一樣,變幻莫測,有時對佢好好...

2018-05-10 09:52

【港女講女】做第三者,仲敢妄想要開花結果?

正所謂:「出得嚟行,預咗要還」,你做得第三者,你就應該預咗唔會開花結果!咁大個人,唔該唔好再過分天真樂觀。

2018-05-02 11:26

【港女講女】女人之間,究竟有幾鍾意比較?

別人嘅掌聲只係用嚟襯托你嘅喜悅,當你變成一個要從別人嘅掌聲中先得到滿足嘅人,呢種滿足本身就唔係幸福嘅一種,而你都只係一個活喺世俗眼光裡嘅奴隸。

2018-04-26 13:19

熱門評論

已複製連結