橙新聞

莎比亞

網絡作家

【莎比亞】防止男朋友懶惰 女友最有效方法

文:莎比亞

我係一個超級懶惰嘅男朋友。

平日懶得去街,少有浪漫,最好見面咩都唔使準備。

反正,無論我做多定做少,女朋友都唔會分手,咁我點解要做多?

拍拖需要情趣?我瞓多陣教好過啦!

我以前絕對會咁樣諗,但女朋友有方法令我唔敢再懶⋯⋯

首先要明白,男人最有心機係追求妳嘅時候,呢層係人都知,但到底點解?

因為有競爭。

就算妳唔係勁多狗公纏身,佢都唔知道可唔可以成功爭奪到妳,於是要出盡渾身解數。

不過一追到手,過埋熱戀期,「坐定粒六」嘅時候,仲驚啲乜?衰啲講句,佢見到其他靚女,分分鐘想妳自動分手,等佢可以擁抱新嘅未來。

所以,仲使乜諗咁多心思浪漫嘢?

不過,男人永遠都係好勝,只要女朋友能夠激起佢嘅好勝心,佢就會落力為妳好。

激嘅方法當然唔係叫妳去搵另一個男人,畀頂綠帽佢戴咁刺激啦,以下有三位敵人妳可以睇吓邊個適用

1.佢以前嘅自己

妳可以不經意咁提及下以前嘅佢有幾好(但唔係鬧/怪佢),同佢講以前嘅日子真係好開心,詳細咁講述吓佢做過啲乜令妳好開心、佢講過啲乜令妳最感動,去過邊度令妳好懷念⋯⋯講講吓,佢又諗諗吓,就會心諗:「係喎,而家對佢好似差咗⋯⋯做番好少少先!」

2.妳本人

如果妳覺得第一個做法太天真,佢根本唔會反省,咁妳再加強少少,用第二個方法-對佢超級好。男人係會內疚,妳對佢好,但佢對妳唔好,佢會知。妳先唔好計較咁多,對佢有幾好得幾好,佢想打機就畀佢打,佢想訓覺就畀佢瞓,佢想同啲朋友去玩就Let him go,之後佢就會心諗:「嘩⋯發生乜事⋯⋯有古怪」。然後妳答佢:「無呀,我只係想你開心啲,對我會好啲。」咁佢就會聽晒妳話,輪到妳想點就點。

3.都係妳本人

以上兩個方法都無用嘅時候,妳唯有心灰意冷,唔係叫妳分手,只係以退為進,對佢冷淡啲,唔好辛苦自己,做吓自己鍾意做嘅事,當佢感覺到妳嘅冷淡,妳心平氣和咁解釋番,佢就會有個目標-「重新追番妳」。

當然,現實最大可能係無論妳做啲咩,男朋友都無動於衷、甚至話妳煩⋯⋯有時我都會咁樣對待女朋友,我唯有對自己講,唔好當一切係理所當然,你唔對佢好,佢又有咩理由要對你好?

更多文章,即like: 莎比亞 

編輯:Wing

編輯推薦

【莎比亞】令男人在吵架時 乖乖認錯的做法

如果可以,請各位女朋友避免以下大忌。以下內容可能會令妳們覺得委屈、覺得對女性不公平。但我相信會令你們「輸咗場交,但贏咗幸福」。

2018-03-02 15:06

【莎比亞】做個好男人

好男人通常唔會有好下場。 正所謂「男人不壞,女人不愛」,心愛的女神情傾MK,毒男都只會被傷害。 但呢個令人痛心嘅定律,喺拍拖之後就完全唔適用。

2018-02-27 15:11

【莎比亞】最激烈嘅鬧交

我好鍾意我女朋友,我女朋友都好鍾意我。 但我永遠都解決唔到一個問題:成日都鬧交。

2018-02-20 09:26

熱門評論

已複製連結