橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】打工仔的暑假

文:蔣薇
仲記唔記得暑假係點?即係放你成個月假嘅時候,大家閒在家無事搵事做,但自畢業之後踏入社會,想搵個一星期假都係難事……

而江湖傳聞,有間公司,佢竟然放到暑假,同寒假,聽到之後第一個反應係WTF,第二個反應係,很想要……

呢間公司話到數達標,所以全公司八月放假,所有人都唔駛返工,如果你比一個月假我,就好似中咗六合彩咁,突然咁有錢,我唔知點洗好!!!咁多日假,我去日本旅行,真係會死啊,返嚟破產都似!

咁究竟呢間公司嘅員工有乜做?聽聞佢哋組織咗一隊電競隊,參加比賽,最後第一場就輸咗;另外女同事們一齊學廚,成就咗新一代地獄廚神;仲有同事遊山玩水去歐洲流浪一個月。

好多人聽到,都覺得難聽過粗口,當你正在每日朝九晚十時,有班人竟然可以揮霍時間,但有個外國返嚟嘅同事講,外國好似法國之類嘅國家,其實每年事無大小都會放暑假,只係香港人,以競爭力為名,日做夜做,外人睇好正常嘅野,到香港就成為千奇百趣。

今日冬至,公司同事等緊Memo通知會唔會放早,最後得知係四點放工,已經係還得神落,仲有同事會叫救命話:「今日我仲有野趕,你哋走咗我就死硬!」

係香港,放假同假期,係一件奢侈嘅事,奴性重到會覺得,如果放咁耐假,公司會點?如果收工唔覆Email,會唔會影響工作,如果有一刻唔係公司,會唔會返到嚟領晒野。每次email去外國,得知對面同事準時收工,我哋就會火都嚟,因為全世界都等緊佢哋Confirm。

講得好聽,香港人效率高,唔好聽,就係為工作而活。

幾多人係將工作變成生活最重要嘅事?可能你同我都係,工作做唔好,輕則搵少咗,影響晉升同前程,壞則被炒,令你生活不能自理。有冇諗過背後係咩問題?係因為大家都潛意識地覺得,朝九晚六嘅Contract外,係有一套潛規則,你放假,係原罪,唔好話放暑假,你放例假都要左度右度,唔好影響公司運作,走咗都要覆野,如果唔係你就係無責任。

暑假,寒假,係香港係奇蹟,唯一一個你可以安心放假嘅,只有風假,點解我哋咁期待八號波,因為我哋可以偷到半日一日,當賺咗。
責編:李玥展

編輯:Dustin

編輯推薦

【蔣薇 | 港女辦公室 】Email攻防戰

公事上,有邊個未用過Email,我收過連署名都無嘅不知名email,亦收過差唔多三千字內文嘅essay級投訴email,更見過唔小心將私事公事全世界send嘅email,作為平日最多收發嘅渠道,原來都仲有新鮮事。

2017-12-14 11:09

【蔣薇 | 港女辦公室 】太子哥之猛虎落地勢

近期我都會講太子哥,因為佢上任不久,但已經有唔少為人「津津樂道」嘅戰績,上次講完感謝主,今日同大家介紹一招!

2017-11-27 17:29

【蔣薇 | 港女辦公室 】中環太子哥-感謝主

第一句劈頭話:「今年係我入行第二十年喇。」換句話說,即係老海鮮啦,第二句就話:「呢行,我有乜未見過先?」第三句話:「有乜事都好,依家有我係度,我會幫大家頂,帶領大家一齊走得更遠!」

2017-11-13 16:54

熱門評論