橙新聞

莎比亞

網絡作家

【莎比亞】女友行街聽到:「走晒樣嘅女人好難頂⋯」

文:莎比亞


星期一,辛苦嘅開始,打算同女朋友食餐好嘅為大家打打氣。

但一見到佢,佢竟然好唔開心,有少少黑面咁,我即刻心諗:「死啦,唔通我又做錯嘢?無理由㗎!」

我就已經好溫柔咁問:「做咩唔開心呀?」

佢一手推開我:「你哋啲男人都係衰!」

我完全唔知咩事,反覆追問之下,原來佢聽到一句好賤嘅說話⋯⋯

女朋友坐地鐵嚟嘅時候,聽到兩個男人嘅對話,大約係以下咁。

男人A:「做咩約我出嚟食飯呀?唔使陪老婆咩?」

男人B:「唔好提,番去見到佢飯都食唔落啦!」

男人A:「有無咁嚴重呀⋯⋯」

男人B:「你唔明㗎喇,佢生完之後肥咗好多,個樣又殘,我真係頂唔順呀。」

男人A:「咪咁啦,話晒都幫你生咗個B。」

男人B:「你都係男人,你明啦⋯⋯如果你老婆第時老到成個阿婆咁,又肥又醜,你都X唔落啦!」

女朋友隻字不改咁同我覆述番,佢記得好清楚,因為呢番說話令佢既擔心又傷心。

而我聽完後,不禁嘆氣⋯⋯佢哋咁諗啫,咁都入埋我數!?

女朋友話:「你都係男人,應該都係咁諗啦!?個個男人都要樣靚身材正㗎啦!」

呢條問題,我知道唔可以直接否定,太無說服力,我只能夠舉出一啲例子⋯⋯

「有時妳喺街見到啲公公婆婆都好恩愛啦!」我咁答。

對於「另一半變老」,做女人的確係擔心啲,唔記得邊度聽過,男人80歲可以搵到個20歲後生女,但女人80歲就未必搵到個20歲後生仔,可能有嘅,但感覺上聽上去機率低啲。

我同朋友之間,都曾經討論過類似話題-「如果女朋友/老婆變咗人老珠黃大肥婆,仲錫唔錫得落。」

大家嘅誠實答案,我就不便透露。

但呢條問題,有一個盲點,就係好似講到男人唔會老,男人唔會走樣。

「第時我都成個阿伯咁,可能禿頭大肚腩,甚至跛埋,無咗隻腳行唔到啦!」我同女朋友講:「走樣咪一齊走樣。」

見女朋友好似有少少同意,我繼續解釋:「再進一步諗,呢類問題其實無咩意思,當我哋真正老咗,諗法都可能唔同,已經邊會再理啲咩樣靚身材正,只求無病無痛,可以陪對方多一日就多一日。」

女朋友被我說服成功,點點頭同意。

PS:各位男士注意,喺地鐵討論類似話題,隨時會累到無辜嘅巴打。

編輯:Wing

編輯推薦

【莎比亞】對方很忙的時候 最好的處理辦法

我們沒可能永遠都百份百全程投入愛情。你可能會怪責對方,可能會獨個兒不快樂,或是想盡辦法如何令對方屈服,在百忙之中抽出一天去陪你,縱使他們多累。但其實,長遠來說,最好的方法都不是以上種種,而是你自己...

2017-11-29 09:44

【莎比亞】拍拖嘅真正快樂 

今次我唔想講話咩「只要喺埋一齊,就點都開心啦!」嘅肉麻說話,而係認真去探討一段關係入面,達到咩條件,做到啲咩嘢,先叫做良好、令人滿意嘅約會。

2017-11-20 10:43

【莎比亞】女友拍拖愈耐 愈心痛你使錢

女人真係好善變!但有一種善變係好事,就係佢開始心痛你使錢。

2017-11-06 15:58

熱門評論