橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】中環太子哥-感謝主

今期港女辦公室,唔知係好彩定唔好彩,竟然有個新人物,而呢個新人物太過傳奇,我好唔想寫,但又忍唔住唔寫,佢有一個朵!中環太子哥!

點解佢叫太子?因為佢叫Edward,咁Prince Edward,我哋咪叫佢太子哥囉。

哥字,係一個尊稱,一份尊敬,第一日佢上場就叫全世界入房,第一句劈頭話:「今年係我入行第二十年喇。」換句話說,即係老海鮮啦,第二句就話:「呢行,我有乜未見過先?」第三句話:「有乜事都好,依家有我係度,我會幫大家頂,帶領大家一齊走得更遠!」

第一二句,我哋都只不過係敷衍應一聲,但第三句真係不得了,我哋好耐無見過一個會身先士卒,帶領大家衝鋒陷陣嘅大佬喇!請俾小妹叫你一聲!大佬!大佬!
【蔣薇 | 港女辦公室 】中環太子哥-感謝主
自此以後,公司多咗一個太子哥,我哋成日都會話,我哋跟太子的!

可惜,你唔可以睇少一個老海鮮嘅老吹能力,幾日後大家終於睇清太子哥係幾咁威!

首先,佢整頓咗公司嘅不良風氣,出咗一個全世界嘅Email講:「No more Gossip」,話唔喜歡辦公室搞太多八卦野,大家私底下講呢個嗰個壞話。

第二樣,有日佢聽到一個同事,俾個麻煩客搞完一輪,佢已經好禮貌地無即場爆佢,而係收線時講咗個「妖」字!

太子哥即時捉咗佢入房:「我做咗呢行二十年喇,有乜客未見過?有乜屎未執過?你係叻仔,但你個人好Negative囉,你咁樣鬧個客,知唔知會好影響公司士氣?總之我唔想再聽到你係個客背後鬧佢!」
【蔣薇 | 港女辦公室 】中環太子哥-感謝主
自此以後,公司多咗一個潮流,每位同事收線之後,都會深呼吸一口氣,再講句:「感謝主!」辦公室即時多少和諧,少咗戾氣;但如果你嬲到爆炸時可以點?就可以講另一句:「主能救!」主能夠拯救你,打救你,能救你!

當然,有同事信佛的話都可以講「阿彌陀佛」「同埋我佛你」之類。

整個辦公室,都俾太子哥改變,唔講以為去咗宗教團體,周不時會聽到有同事高呼「主能救!」「我佛你!」好似得到感召咁。

而有位同事,佢本身就係一個好火爆嘅朋友,佢主能救咗幾日之後,終於忍唔到想爆個客,然後係最忿怒之時,佢發現咗一樣野!太子哥佢話唔好係客背後鬧佢,無話唔可以當面爆佢,最後佢爆咗個客一獲,久違了的F、D、S音出現返。

呢個字,雖然講唔出咩大道理,但卻相當親切!
責編:李玥展

編輯:Dustin

編輯推薦

【蔣薇 | 港女辦公室 】後生仔要蝕底少少

蝕底?任何野都係計算,得罪講句,蝕底嘅唔係抵得諗,而係笨實!

2017-11-02 09:12

【蔣薇 | 港女辦公室 】辦公室變廚房!

初初出嚟做野總會落街食,四周都有唔同餐廳,日日唔同地方食唔同野都可以,再之後懶,叫外賣又好,帶飯又好,間唔中出去食一餐半餐,但有一種人,佢有一個特別的午餐模式,叫煮飯。

2017-10-24 09:18

【蔣薇 | 港女辦公室 】職場的婆媳關係

職場都有婆媳關係?婆媳關係永遠都係一個無解課題,特別係,你唔係婆或媳其中一方,而只係一個夾係中間嘅夾心餅。

2017-10-13 14:45

熱門評論

已複製連結