橙新聞

莎比亞

網絡作家

【莎比亞】女友拍拖愈耐 愈心痛你使錢

文:莎比亞

女人真係好善變!

但有一種善變係好事,就係佢開始心痛你使錢。

初初拍拖嘅時候,你當然咩都揀最貴最好,希望佢得到最幸福嘅感覺。

你唔係搵好多錢,但為咗佢開心無辦法啦,最多捱吓杯麵。

而女朋友都好樂意接受你咁寵幸佢,覺得你真係對佢好好!

但慢慢,時間耐咗,一切都唔同晒⋯⋯

雖然佢仲係一個好為食嘅女仔,但當你話:「喂,今日帶妳去食好嘢!」

佢會問:「幾錢㗎?貴唔貴?」

你答:「幾百蚊囉!是但啦~」

佢就會即刻Say No:「嘩,太貴喇!唔去呀!我食碗魚蛋粉就OK!」

雖然佢仲係一個好鍾意買嘢嘅女仔,但當佢見到啲衫呀手袋個陣,你同佢講:「鍾意呀?買囉!我送畀妳啦!」

佢初初有少少心動,好想咩都唔理拎去畀錢,反正都係你啲錢,但突然佢又會放低晒所有嘢:「快啲走,唔買喇⋯⋯再唔走我就忍唔住㗎喇!」

踏出間鋪,佢頭也不回:「我同自己講過,唔可以再亂買嘢!」

你再引誘佢:「大特價喎!真係唔買?」

佢都仍然不為所動。

點解女朋友會咁有意志力,因為佢明白幸福唔一定要呢啲物質,或者擁有呢啲物質,都未必一定幸福。

佢知道你好努力工作,為咗將來好好拼搏,就算你份糧OK,夠食好野夠送野畀佢,佢都寧願你慳啲。

反而拍拖愈耐,本來好慳嘅我,反而間中會「豪買」。

有時覺得做嘢太辛苦,想畀少少動力自己,就會買下嘢,但男人一係唔買,一買就唔會係好似女人咁,買條平裙都好滿足。

好似上星期咁,我突然覺得部手機好慢,無啦啦就去換咗部新iPhone,女朋友無阻止我,但事後我問番佢:「妳會唔會覺得我用好多錢?」

佢先答我:「少少啦,心痛呀,你部機又唔係壞咗,無啦啦用咗幾千蚊!」

我諗一諗,其實又係,但實在好想好想買嘢,令自己開心一啲⋯⋯

你可能會諗,「唓,因為佢想結婚、想我儲錢買樓,先叫你慳啫!有機心嘅!女人真係好古惑!」

咁係當然㗎啦,諗將來係女人嘅必然,不過點講都好,慳錢都好過亂使錢。

呢一種改變,絕對係好事。


更多文章,即like: 莎比亞 

編輯:Wing

編輯推薦

【莎比亞】當女朋友想說心事 她的心情是⋯⋯

想了好久,我終於鼓起勇氣跟你說出鬱在心底的感受。 但為免令這段關係雪上加霜,我提醒自已每字每句都要想清想楚、小心翼翼、平心靜氣說出。 不想讓這份坦白又轉化成大家的戾氣,增添你的壓力,又大吵收場...

2017-10-25 10:28

【莎比亞】呢一種女朋友最令男朋友幸福

拍拖以後,你有否想過,最幸福的是甚麼? 給你三秒想想,三、二、一,有心水的話恭喜你。 無心水的話更加恭喜你,因為對方仍然愛這個沒心裝載的你,已經很幸福。 對我而言,是有一個人,願意永遠支持我。

2017-10-13 17:23

【莎比亞】愛情要有不服輸的心態

女朋友成日同我講笑咁話:「點解我哋仲未分手?」 性格一動一靜、興趣又唔同、仲要美女與野獸⋯⋯ 有時望住對方,我哋都會好驚訝,點解會同咗呢個人一齊,由陌生人變成最親密嘅人,呢個過程真係好神奇。 ...

2017-09-28 10:01

熱門評論