橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】後生仔要蝕底少少

文:蔣薇

老一輩成日講,後生仔要蝕底少少,今日有個新同事,好年輕,有個Job要趕,但佢話今晚唔會OT,唔會幫佢趕,認真有個性,大家都係老屎忽,傾計傾開呢單野,有唔少人都話:「今時今日班九十後連蝕底少少都唔肯,點成大事啊?」

其中一個好出色嘅Manager就唔係咁睇。

「蝕底?任何野都係計算,得罪講句,蝕底嘅唔係抵得諗,而係笨實!

想公司睇得起你,想同事對你有好印象,想你自己學多少少野,想你能更快上手工作,全部都係原因,令你去蝕底做多少少額外嘅事,但如果你嘅工作,同你預期得到嘅有出入,點解要做?

公司請人,Offer一個朝九晚六嘅工作,然後出糧比你係合約,而你想人做合約以外嘅事,高手會令佢心甘情願地做,例如提出合理誘因,而呢個誘因係令人信服,令人覺得有回報,至於係唔係實際有,就後話。

低手點做?就會用威迫同責任去說服,你出一份糧,人地返足鐘已經盡責,OT係必需?信嘅應該智商有問題,當你OT時數到咗一個除返開低過心目中價錢時,就係員工離職之時,有能力叫一個鐘100蚊嘅,你憑乜叫佢抵得諗幫你做30蚊一個鐘?最後只有一個結果,留低只係一些無議價能力嘅低手,而有能力嘅就走,公司會運作得差,成為一個惡性循環。

有錢可唔可以請到好員工,我唔敢講,但無錢就一定請唔到好員工。

對於後生仔蝕唔蝕底,作為上司我會盡力教佢去等佢哋能力更強,但唔會執住一點叫佢哋硬食。

至於成大事喇喎……你班做大事嘅人用咁低手去說服人,仲學人講做大事?笑唔笑死人啊?」

呢餐飯,俾佢一堆好現實嘅說話打殘一班老屎忽,大家心入面都有條數,但偏偏人講佢又講,講一套做一套,為嘅係乜?拎著數囉。

而一個總係take而唔會give嘅人,你會唔會同佢熟?會唔會幫佢手?

今時今日後生仔唔係唔肯蝕底,只不過睇唔過眼你當人白痴姐。

有冇諗過係呢班你覺得成唔到大事嘅後生仔眼中你哋係點?唔講咁白喇,你自己幻想吓啦。
責編:李玥展

編輯:Dustin

編輯推薦

【蔣薇 | 港女辦公室 】辦公室變廚房!

初初出嚟做野總會落街食,四周都有唔同餐廳,日日唔同地方食唔同野都可以,再之後懶,叫外賣又好,帶飯又好,間唔中出去食一餐半餐,但有一種人,佢有一個特別的午餐模式,叫煮飯。

2017-10-24 09:18

【蔣薇 | 港女辦公室 】職場的婆媳關係

職場都有婆媳關係?婆媳關係永遠都係一個無解課題,特別係,你唔係婆或媳其中一方,而只係一個夾係中間嘅夾心餅。

2017-10-13 14:45

【蔣薇 | 港女辦公室 】辦公室之有人暗戀你

公司有一個其貌不揚的女同事,比起其他漂亮動人的OL,就好似醜小鴨一樣埋藏係人群之中毫不顯眼。但最近佢人氣急升…

2017-10-09 09:55

熱門評論

已複製連結