橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】辦公室變廚房!

文:蔣薇
返工食午飯,係一門學問,初初出嚟做野總會落街食,四周都有唔同餐廳,日日唔同地方食唔同野都可以,再之後懶,叫外賣又好,帶飯又好,間唔中出去食一餐半餐,但有一種人,佢有一個特別的午餐模式,叫煮飯。

你無聽錯,係煮飯!廚房係邊?係公司!公司Pantry?唔係,可以係房,可以係位,總之就係公司!

有冇見過,午飯時間辦公室傳來一陣飯香,再望上去,點解有仙氣,啊,係水蒸汽先啱,跟住有煎雞翼聲……我見過……我真係見過……
【蔣薇 | 港女辦公室 】辦公室變廚房!
曾經我以為係公司食杯麵已經好奇怪,但今日我見到呢餐三餸一湯,我有衝動想走埋去叫佢哋聽日預我一份。

事情無你諗得咁簡單,因為呢件事好快就成為一件辦公室政治,牽頭嘅煮飯團係某個部門阿頭,而幾個部份阿頭都有少少競爭關係,過咗排有人打小報告話公司唔應該有人煮飯,希望行政部門出Memo。

Well……公司的確唔應該有人煮飯的……但呢件事又令呢個阿姐想開戰喎,推演落去叮飯又得唔得?煮杯麵又得唔得?都係有味,都有煮野。聽落好似唔多對路,但政治從來唔講道理,而係講勢力,煮飯黨係公司地位唔低,因為有好多客都係經佢哋返,老闆都有少少睇佢地臉色,無乜野都唔想同佢哋搞壞個關係。

飯照煮,舞照跳,一切如舊。

直到有一日,有個低層員工煮飯,但唔係煮飯黨,平時煮飯黨就會係無煙霧感應器嘅地方煮,又或者直頭封住,但呢位小姐就係正感應器下面煲飯,結果係點?當然係管理署上嚟睇情況,然後又出信比我哋公司講唔可以有煙。壓到去行政部,最後一刀斬斬咗煮飯呢個行為。
【蔣薇 | 港女辦公室 】辦公室變廚房!

明眼人一睇就知,係有人玩野等爆鑊,等你無得煮飯。

以煮飯黨為首嘅阿姐,當然唔服氣,邊個玩野大家一清二楚,咁佢就對相關部門玩官僚,有乜野唔同你趕,請正式Send Email比我,我亦唔係第一時間睇,再電郵覆你完成時間,當然有咁耐得咁耐,你有乜事就同我阿姐直接溝通。

大老闆望到呢個情況,叫兩邊玩野還玩野,唔好玩到公司有損失,一鎚定音。

睇到呢度,你會問,吓?就係咁咋?唔夠峰迴路轉喎。其實辦公室邊有咁多奇蹟,更多係大家默默咁鬥法,輸贏?邊有咁易?

今日係煮飯,聽日可能係廁所,後日係email,你唔會知幾時會因為乜事而出磨擦。

而我,只不過係一個迷途的小秘書,叮個杯麵睇住呢班人鬥。
責編:李玥展

編輯:Dustin

編輯推薦

【蔣薇 | 港女辦公室 】職場的婆媳關係

職場都有婆媳關係?婆媳關係永遠都係一個無解課題,特別係,你唔係婆或媳其中一方,而只係一個夾係中間嘅夾心餅。

2017-10-13 14:45

【蔣薇 | 港女辦公室 】辦公室之有人暗戀你

公司有一個其貌不揚的女同事,比起其他漂亮動人的OL,就好似醜小鴨一樣埋藏係人群之中毫不顯眼。但最近佢人氣急升…

2017-10-09 09:55

【蔣薇 | 港女辦公室 】幽靈公司

呢間公司有個令人好難接受嘅位,出事係出係佢老闆身上,你有冇諗過返工要步操?老闆行過,要起立敬禮?有一次仲捉個女同事出嚟,你知唔知點啊?唔係性騷擾,係叫佢唱歌啊!

2017-09-20 09:41

熱門評論

已複製連結