橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】職場的婆媳關係

文:蔣薇
職場都有婆媳關係?婆媳關係永遠都係一個無解課題,特別係,你唔係婆或媳其中一方,而只係一個夾係中間嘅夾心餅。

夾心餅係點?兩邊夾,一邊叫老闆,另一邊叫客,你夾係中間令兩塊餅唔好磨擦太多,但你就做咗磨心,夾到不似人型。

話說Sales有個同事訴苦自己做夾心餅嘅恐怖……

「上星期去見客啦,呢個客大客嚟,更加係大支野,幾難先開到呢個客,咁咪帶埋老闆做Closing囉。嘩,上到去傾兩句,個客要求一樣比較新嘅野,唔算係公司常規項目啦,老闆聽完話要諗諗,自己公司唔做additional野喎。以我所知市面上其他公司都會做多少少野,係呢方面公司已經落後,人哋要求,你都唔肯做,咁當然打大交啦,個客一句話,咁你哋諗掂先再上嚟傾啦。

呢個客就好似一個樣貌身材一百分嘅女友,係有性格有脾氣要人就佢咁,咁好正常啊,人地有錢有地位,大家選擇,唔通你條件唔好仲要就你?

但老闆唔係咁睇,佢就好似阿媽咁哦我,話唔可以做壞公司規矩,個客咁大支野咪唔做囉,我哋係搵客,唔係求客,無必要降低個身價去接客喎!

我聽完呆咗,喂老闆,你卒的數個陣唔係咁講喎,平時又迫婚,家陣有個女嘅受你又唔喜歡,唔好話頭先人地串咗你兩句搞到你心情唔好?

又要馬兒好,又要馬兒不吃草,你唔諗諗你個仔我咩新鮮蘿蔔皮,而你呢個做阿媽嘅又係唔係令我有父幹?你個仔我搵嘅老婆當然有返少少缺點啦,一句講晒,受定唔受?

婆媳關係難搞在,出事之後你夾係中間就要做傳聲筒,兩邊都唔會俾好面色你睇,你明知佢哋唔妥對方都要講到大家好和平咁,點將唔好聽嘅說話變成可以入耳嘅野就係技巧喇!」

呢種職場關係,係全天候,多角關係,你要做嘅磨心並不止一個,而係好似消防員咁邊度出事就去邊救火。

你會問,最後結果係點?

不如我問返你,婆媳關係最後點解決?

個仔要老婆定要阿媽?阿媽供養你咁多年,但問題係,你阿媽仲可以養你幾耐?何況呢個唔係你Biological Mother,咪同好多Case一樣,最後個仔同個老婆出去自住,雙宿雙棲囉!

有邊個打工仔想做夾心餅?最後自己做,親自接客,關係自然和諧,之但係……N年之後,你會唔會變成另一個奶奶?就係另一個故事了。
責編:李玥展

編輯:Dustin

編輯推薦

【蔣薇 | 港女辦公室 】辦公室之有人暗戀你

公司有一個其貌不揚的女同事,比起其他漂亮動人的OL,就好似醜小鴨一樣埋藏係人群之中毫不顯眼。但最近佢人氣急升…

2017-10-09 09:55

【蔣薇 | 港女辦公室 】幽靈公司

呢間公司有個令人好難接受嘅位,出事係出係佢老闆身上,你有冇諗過返工要步操?老闆行過,要起立敬禮?有一次仲捉個女同事出嚟,你知唔知點啊?唔係性騷擾,係叫佢唱歌啊!

2017-09-20 09:41

【蔣薇 | 港女辦公室 】父母去了郵輪旅行的港女

出嚟做野咁耐搵到少少錢,一直都想同父母去旅行,但一來時間難就,父母亦唔太想浪費時,直到最近終於搵到個藉口俾佢哋上郵輪玩返一個星期,算係盡吓孝道。

2017-09-12 09:38

熱門評論

已複製連結