橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】辦公室之有人暗戀你

文:蔣薇
公司有一個其貌不揚的女同事,比起其他漂亮動人的OL,就好似醜小鴨一樣埋藏係人群之中毫不顯眼。

但最近佢人氣急升,因為早幾日佢因為親戚到又無食早餐,最後暈咗係公司,雖然無乜大礙,但就引發咗一場小風波。

暈低事件隔日,佢返工竟然發現枱頭放咗一份早餐,留言字句係:「記得食早餐,唔好捱壞身體。Secret Angel上。」

呢份早餐,呢張留言,如果發生係一個OL之花身上,絕對唔會引起咁大迴響同咁Juicy,反而放係個普通樣女同事身上,就相當有玩味了,先唔講班靚女同事一邊講一邊扮唔在乎,講真,有邊個唔想成為全公司焦點?而做開焦點嘅突然變成觀眾,會有少少唔習慣,但對於我哋呢班花生友講,就好想知究竟邊個咁有心。

其實要知好簡單,問公司IT拎個Cam睇就一清二楚,可惜,IT部係由一班獨食男同事掌管,佢知,但唔會同你講,更唔會俾你睇,自己知就陰陰咀笑。

八卦嘅同事,為咗知道天使係邊個,竟然瘋狂到早一個鐘頭返公司,點知埋伏咗三日嘅行動,都以失敗告終。

正當大家以為不了了之時,有日個女同事俾個Sales激親,然後Lunch之後佢枱面再次出現咗一包維他奶,留字:聽人講飲完之後心情會好好多,你試試。

矛頭終於直指個Sales,似係激完佢之後氹返佢,但呢位女同事雖然其貌不揚,但心中都係火爆之輩,加上呢幾日無程程成為眾人焦點,佢已經好炆,今次搵到原兇,仲唔爆佢大鑊!

佢寫咗張Memo,然後去佢個位度一野拍爆咗包野,瀉咗一半,然後貼張Memo上去:「多謝,我心情好返好多喇!」

爆人樽聽得多,爆人奶都係第一次聽,個Sales同事返到嚟見到張枱,呆咗三秒先有反應,四周圍同事都忍笑忍得好辛苦,終於有個好心人同佢講:「溝女可以光明正大,扮乜鬼野神秘!睇吓依家人哋嬲喇!」

男同事終於回魂話:「吓?我溝邊個?我乜都無做過喎,邊個玩野玩埋奶?」

呢句軒起千重浪!唔係你!!!???咁係邊個????

男同事大吵大鬧話呢位女同事好玩唔玩玩到爆奶,然後驚動咗班老細。

其中一個女上司睇到呢幕,好震驚咁問:「我諗住包奶可以令佢心情好少少,無諗過佢會咁用喎!」

原來係女上司扮神秘天使,在場從來無人諗過會係老闆關心你,八卦情緒令大家都走向愛情盲點。

原來從來無人暗戀你,一切如常。

呢個故事講唔出乜野大道理,但要話你聽,清潔阿姐同包奶係無辜的!
責編:玥展

編輯:Dustin

編輯推薦

【蔣薇 | 港女辦公室 】父母去了郵輪旅行的港女

出嚟做野咁耐搵到少少錢,一直都想同父母去旅行,但一來時間難就,父母亦唔太想浪費時,直到最近終於搵到個藉口俾佢哋上郵輪玩返一個星期,算係盡吓孝道。

2017-09-12 09:38

【蔣薇 | 港女辦公室 】幽靈公司

呢間公司有個令人好難接受嘅位,出事係出係佢老闆身上,你有冇諗過返工要步操?老闆行過,要起立敬禮?有一次仲捉個女同事出嚟,你知唔知點啊?唔係性騷擾,係叫佢唱歌啊!

2017-09-20 09:41

【蔣薇 | 港女辦公室 】九月一號校服日

原來不知不覺間我哋已經係老屎忽,已經唔再單純,學生,唔係著套校服,每日返學唔駛返工就係,而係一班從未面對社會現實嘅人,每人人生只有一次機會,好似初戀咁,你買唔到,你追唔到,你捉唔到。

2017-09-01 17:55

熱門評論

已複製連結