橙新聞

莎比亞

網絡作家

【莎比亞】點解我咁衰 女友都留喺身邊

文:莎比亞

次次同女朋友睇親愛情戲嘅時候,佢都有個定律。

如果個男主角係好浪漫,佢會話:「學下人啦你!」

如果個男主角係世紀大賤男,佢會話:「你呀!你呀!同你一樣呀!」

掉返轉,如果女主角係賤女人,佢會話:「好彩我唔係咁啫!」

但如果係100分嘅女朋友,佢會話:「我呀~同我一樣㗎!對你幾好!」

有時只係佢想太多,但有時又真係女朋友嘅寫照,有時我都會唔明,點解個男主角咁衰,個女主角都要原諒佢,同番佢一齊?

令我記起有次氹返女朋友嘅時候,佢咁樣講⋯⋯

嗰陣本來佢已經下定心腸唔會原諒我,Block晒我臉書,WhatsApp、連電話都打唔到畀佢。

足足維持咗一個月有多。

但有時佢會解封我,睇下我有咩說話好講。

但一向都好唔識做嘅我,一個月以嚟都只係喺WhatsApp做吓「鍵盤戰士」,以為可以「說服」到佢復合。

但女朋友唔係要千言萬語,日日Send勁大段嘢畀佢,最後都只係收到一句「Too Long Didnt Read」嘅回覆,或者佢只係覺得「佢又係得個講宇」。

時間過得愈嚟愈耐,突然我意識到,講多無謂,真係要行動,做番啲嘢。

我唔似電影《春嬌救志明》咁,志明喺街上,搞一場「大龍鳳」令春嬌回心轉意,我只係去買咗紮花,喺佢樓下等到佢放工出現⋯⋯

「你嚟做咩呀?」佢好冷淡咁問。

「我⋯送畀妳⋯⋯」我口都窒晒。

其實,佢一見到我拎住花嘅時候,已經忍唔住笑。

最後,我再不停認錯,佢又一次原諒我。

我自問係一個唔太好嘅男朋友,《無賴》嘅歌詞好準確咁描寫我:「還喜歡我 我這種無賴

是話你蠢 還是很偉大 在座每位都將我踩 口碑有多壞 但妳亦永遠不見怪⋯⋯」

我問女朋友:「點解妳仲要同我一齊?」

女朋友總係答:「我都唔知呀!早知上次狠心啲同你分手好過啦!」

或者最佳答案,就好似周柏豪喺《原諒他77次》入面解釋:「因為佢知道,如果佢同我分手,我嘅世界會完全崩潰⋯⋯」

女朋友都一樣,心軟唔捨得見到我唔開心,最後都選擇留低。

呢份原諒,同中六合彩一樣,中獎只係好彩,唔中係合理。

女朋友留低只係我好彩,佢要分手都好合理。

如果我再令佢傷心,呢份運氣係會用盡。

編輯:Wing

編輯推薦

【莎比亞】一段變淡的感情 可以怎樣修補?

為甚麼要分手呢?因為太多解決不了的問題,我們都累了。 為甚麼還要一輩子呢?因為我們當中仍然有愛。

2017-09-07 09:05

【莎比亞】想甜蜜就要明白 真正嘅細水長流

千祈唔好以為細水長流等於「乜都唔做,兩個人一齊就得~」,咁樣只會慢慢咁流失晒啲感情,兩個人一齊枯乾晒~

2017-09-01 13:49

【莎比亞】為咗氹男朋友女朋友可以好恐怖⋯

估唔到女朋友會變成咁⋯⋯ 「你都唔浪漫嘅~一啲驚喜都唔識畀我!」女朋友成日咁講。 有一日我終於忍唔住:「公平咩!!!不如試下掉番轉,妳畀驚喜我睇下會點!」 「好呀!等我完美咁示範畀你睇啦!」...

2017-08-25 15:00

熱門評論