橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】幽靈公司

文:蔣薇
七月節,無理由唔講下鬼,中環有冇鬼?除咗人有鬼佬之外,公司都有鬼公司。咩係鬼公司?有冇聽過某些公司,你唔知佢做緊乜,亦唔知佢點搵錢,但佢可以係中環有個靚Office,仲可以請一大班人係公司唔知做乜。

學無間道講,如果一個人好唔專心咁做自己野,就係臥底。

最近有朋友懷疑入咗一間幽靈公司,作為Accountant嘅佢,突然有份高薪厚職請你入去做,係一間內地老闆公司,掛名做總裁助理,唔好想太多,佢係男,更係一個直男,總裁亦係男。

人當然向錢看,雖然間公司聽都未聽過,亦唔知佢做乜野,早排講到菲律賓姐姐三倍人工返大陸做,中環人你只需要俾多30%就已經夠令人入局,有幾多人會同錢作對?30%等於你返三個月等於你之前返四個月喎,更重要嘅係,呢間公司仲無咁Chur。

(劇集截圖)

做落時,朋友先覺得好鬼,間公司真係唔似做野,明明樣野係虧蝕嘅都唔重組,話要開新項目又成年都未搞到,公司同事又無所事事,返公司可以先食個早餐,然後睇新聞,淘寶,煲劇,有時仲成班同事Lunch Time唱K唱到三點先返。

鬼到你會懷疑自己係咪眼花,究竟你係嚟渡假定係嚟返工?對於一個曾經每晚血戰到凌晨三點嘅人講,放工見到陽光,真係好陌生。

佢曾經有諗過會唔會無糧出,但月尾睇到銀行又發現真係出咗糧喎……

成件事好唔尋常……好鬼……

但世事無咁完美的,呢間公司有個令人好難接受嘅位,出事係出係佢老闆身上,你有冇諗過返工要步操?老闆行過,要起立敬禮?有一次仲捉個女同事出嚟,你知唔知點啊?唔係性騷擾,係叫佢唱歌啊!

(劇集截圖)

唔好以為我講笑,全部都真人真事,咁我唔知我朋友係唔係歌喉麻麻,過咗排佢都係頂唔順辭職。

早幾日同佢傾開,問佢點解走,講完一輪好笑野之後,佢開返個認真Mode講:

「你返工,有時唔止係要一份高薪厚職,當你見唔到間公司做緊野,你又幫唔到間公司賺錢,老闆唔知做乜,同事唔知做乜,唔走的話,過幾年你都會發現自己唔知做乜。一間搵唔到錢嘅公司你覺得可以做成世?到你走個陣已經同個世界脫節,我仲未去到要養老嘅年紀,仲想衝一下。」

聽完佢咁講,我都覺得好有道理。

然後我問咗佢一句:「仲請唔請人?其實我都幾喜歡唱歌。」
責編:李玥展

編輯:Dustin

編輯推薦

【蔣薇 | 港女辦公室 】父母去了郵輪旅行的港女

出嚟做野咁耐搵到少少錢,一直都想同父母去旅行,但一來時間難就,父母亦唔太想浪費時,直到最近終於搵到個藉口俾佢哋上郵輪玩返一個星期,算係盡吓孝道。

2017-09-12 09:38

【蔣薇 | 港女辦公室】真話有罪

講真話有錯咩?講真話無錯,只不過係你返工時間講真話,仲要講一個客嘅醜事,咁當然係錯啦。

2017-08-29 09:16

【蔣薇 | 港女辦公室】扮工天王

成日話辦公扮工,每個打工仔都需要識得扮工基本功,適當忙裡偷閒。但凡事有例外,扮工去到極致,好似我哋呢位同事咁,稱得上係「扮.工.天.王」!

2017-08-25 10:49

熱門評論