橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】父母去了郵輪旅行的港女

文:蔣薇
出嚟做野咁耐搵到少少錢,一直都想同父母去旅行,但一來時間難就,父母亦唔太想浪費時,直到最近終於搵到個藉口俾佢哋上郵輪玩返一個星期,算係盡吓孝道。

曾經好喜歡父母出街唔係屋企,想搵朋友上嚟玩又得,又唔需要早返,仲大條道理出街食飯,當然係講緊讀書時候嘅自己,有邊個唔想無王管先?

但今日我送咗佢哋去郵輪碼頭,係閘口同佢哋揮手:「玩得開心啲!」佢哋再同返我揮手,然後一個人坐車返屋企,竟然有種空虛感。

一星期話多唔多,話少唔少,平時去一轉長少少嘅日本之旅都差唔多,自己出門唔覺得乜,但自己留守屋企,望住個無人嘅家,硬係覺得差咁啲乜。以我父母嘅性格,上船前同佢哋講過上網問題,船上面有Wifi,但獨市生意,上一日就要幾舊水,一星期都成千銀,我都覺得肉痛,何況一向死慳死抵嘅父母呢?

無咗Wifi同電話,今時今日就好似與世隔絕咁,屋企嘅家庭Group唔再有長輩圖或者健康資訊,放工前亦唔會有訊息問你今晚食唔食飯,唔食的話唔會有人叫你今晚記得飲湯,更唔會有人係你夜返時打電話問你返未……
再望望屋企,作為港女要落手落腳做晒所有家務,已經唔計煮飯,每日洗衫晾衫收衫摺衫、拖地清潔、換廁紙加凍水,做完之後訓上床,感覺真係有少少空虛。

當你想聯絡下平時唔多會打俾佢哋嘅爸媽時,都無辦法,不其然就會面對每個成年人嘅問題,如果有日佢哋唔再係度時,你會點?

唔係懶煽情懶感概,而係每個人平時對父母點覺得無所謂或者覺得煩都好,呢個又煩又囉嗦嘅人自你出世到依家都係你身邊,感情親情習慣了,或者你唔會珍惜,但有日失去,你一定好唔習慣,而呢個失去,係必然的,除非白頭人送黑頭人你走先姐。

人人都知勤力讀書會高分,人人都知最心痛是愛得太遲,但有幾多人真係可以做到?

我唔得,但偶爾發生咗事或者遇見某人,都總會提醒我,好似小朋友咁,踢一腳就行一步。

一個星期過去,當我去接佢哋船時,心入面暗暗立下一個想法,每年都一定要同佢哋一齊去旅行,將旅行一切都記錄低。
責編:李玥展

編輯:Dustin

編輯推薦

【蔣薇 | 港女辦公室】真話有罪

講真話有錯咩?講真話無錯,只不過係你返工時間講真話,仲要講一個客嘅醜事,咁當然係錯啦。

2017-08-29 09:16

【蔣薇 | 港女辦公室】扮工天王

成日話辦公扮工,每個打工仔都需要識得扮工基本功,適當忙裡偷閒。但凡事有例外,扮工去到極致,好似我哋呢位同事咁,稱得上係「扮.工.天.王」!

2017-08-25 10:49

【蔣薇 | 港女辦公室】千萬不要小看公司IT部

有個員工有日如常返工,點知張門咭入唔到,以為壞咗之餘,突然幾個保安出現,押送佢返自己位收拾私人物品,即炒。

2017-08-21 10:25

熱門評論

已複製連結