橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇 | 港女辦公室 】九月一號校服日

文:蔣薇
  
九日一號開學,對於中環打工仔講,係一個噩夢,代表住今日返工會多班校服友搭車,條街又多咗人,仲有啊,班學生哥笑笑口咁返學,一副無憂無慮嘅樣,真係令要返工捱世界嘅我哋羨慕妒忌恨!!!
  
正正撞住Happy Friday,有同事商量搞返個校服派對,大家收工之後一齊換套校服再去Happy Hour直落!
   
講,係美好的;做,係可怕的。
   
我遇到第一個困難係,將陳年校服拎出嚟時,已經唔啱身,唔好問我點解!而好多同事都有同樣問題,所以我哋團購上網訂校服準備今日嘅活動,大家夾好咗個角色,後生嘅扮學生,老嘅就扮老師主任同校長。
    
幻唔幻想到一班差唔多三張野,仲有班差少少四張嘅校服人士係酒吧飲酒玩樂係幾搞笑?
     
「嘩,想當年啊,我連飲Jolly Sandy都覺得醉啊!飲Diamond Black已經係極限!」
    
「我當年夠無諗過今日嘅我會食煙啦!」
   
「以前我食極唔肥,仲係26腰咋!今日我連仔都生埋Lu!」
     
「仲記得以前好期待九月一號返學,睇吓會唔會同到暗戀嘅女神坐附近,女神已經結婚了……」
       
幾杯落肚,加埋校服主題,我哋開始大數當年,每個人都後生過,都幼稚過,即使係中環才俊都好,都曾經有過青蔥日子。
    
暑假已經對我哋好遙遠,同陽光玩遊戲?仲讀緊書你都會同成班同學去沙灘玩,今日你收工見到陽光都已經還神,星期六日都唔好玩咁大,留少少時間休息好過,唯獨是風假你先可以感受返夏天嘅感覺。
   
【蔣薇 | 港女辦公室 】九月一號校服日
  
九月一,對學生講係神聖嘅日子,一切都萬象更新,去到一個新班房,遇到新同學,碰到新老師,小學仲未識性無乜印象,中學都算係最好玩嘅時光,短短七年中學生涯,你仲會因為零用錢而煩惱,今日你已經為衣食住行而奮鬥,收入大咗,壓力都大咗。
   
「好想讀返書啊……」有人呻呢句。
  
有邊個無諗過返返去呢個無憂無慮嘅世界?好多穿越故事講回到過去,但真係俾你返到去,又係咪同以前一樣?
    
Sorry……就算俾你返到去,你都做唔返當年嘅自己,曾經有個朋友,佢中學畢業之後做咗幾年野,都搵到吓錢,咁就諗住去返讀大學啦,點知,佢發現自己融入唔返個校園生活,同班同學格格不入,就好似將一隻狼放係一群羊中間,你硬係覺得佢哋好奇怪,大家講野睇野都唔同,總係有少少大人睇小朋友嘅感覺,粗俗講就係老屎忽。
    
原來不知不覺間我哋已經係老屎忽,已經唔再單純,學生,唔係著套校服,每日返學唔駛返工就係,而係一班從未面對社會現實嘅人,每人人生只有一次機會,好似初戀咁,你買唔到,你追唔到,你捉唔到。
   
今日著住校服嘅自己,照一照鏡,已經唔再係當年嘅你。
  
借酒精催化,迷迷糊糊之下,你可以享受到一刻嘅放鬆。
  
到星期一,坐地鐵入閘時,嘟一聲,同埋旁邊嘟嘟嘟三聲,話你知,你唔係學生好耐了。

編輯:Stacy

編輯推薦

【蔣薇 | 港女辦公室】真話有罪

講真話有錯咩?講真話無錯,只不過係你返工時間講真話,仲要講一個客嘅醜事,咁當然係錯啦。

2017-08-29 09:16

【蔣薇 | 港女辦公室】扮工天王

成日話辦公扮工,每個打工仔都需要識得扮工基本功,適當忙裡偷閒。但凡事有例外,扮工去到極致,好似我哋呢位同事咁,稱得上係「扮.工.天.王」!

2017-08-25 10:49

【蔣薇 | 港女辦公室】千萬不要小看公司IT部

有個員工有日如常返工,點知張門咭入唔到,以為壞咗之餘,突然幾個保安出現,押送佢返自己位收拾私人物品,即炒。

2017-08-21 10:25

熱門評論

已複製連結