橙新聞

【蔣薇 | 港女辦公室】真話有罪

文:蔣薇

一句「靠個女上位」,一個保安被即炒,軒起全城討論,好多人執著一點:講真話有錯咩?講真話無錯,只不過係你返工時間講真話,仲要講一個客嘅醜事,咁當然係錯啦。

好似一個醜女行入一間餐廳,有個待應當住佢臉,指住佢個樣講:「小姐,你真係好樣衰!」喂、真話嚟,我相信全世界都同意,但你有冇錯?你個人身份工餘時間點講,你只不過係賤,但你著住制服,上班時間執行公務時,你講同一番說話,就代表公司,唔再單單係個人感受,除咗賤仲陀衰家。作為一個成年人,幾時講乜野,應該都好清楚吧?

講真話,講事實,相信大家都知,有好多真話仲難聽過粗口,好多時候公司需要你,唔單單係唔好講真話,甚至係叫你講假話……歡迎光臨?好多服務業都會一入門就講,歡唔歡迎?店員內心實諗你唔入嚟就要開工,你最好永遠唔好入嚟!真話點解有錯,錯就錯在同你工作性質有衝突。

已經唔係講劉華式全方位服務,但作為打工仔應有操守點都要有,唔講客人是非(係佢面前),唔做工作以外嘅事,唔合理咩?偏偏係呢件事上面,好多人都撐個保安,話間公司有問題,講真話都要炒,不如幻想吓個世界,全部人都會隨時隨地講真話,世界會大亂。

工作教識我哋,份工係另一個你,你扮演緊某個角色,提供緊某個服務,真話並唔係你嘅服務之一。有時我會諗,到底邊份工係欣賞你講真話?

「應該無,好多工種你一講真話就玩完。」

最近好多「試著不要說」嘅笑話,社會真係想我哋講真話?就算你同家人,朋友都未必句句真,有好多野講完就無下次。

好記得曾經打過一份Partime,做餐廳,有個客催單,我一查發現漏單,咁我咪同個senior講,佢話叫我同個客交代,然後同個客講比佢鬧到反艇。個經理拉咗我去條後巷,點支煙同我講:「下次漏單記得同個客講即叫即整要耐少少好快到。」

「咁咪即係呃個客?我問同事佢叫我同佢客講。」

「有時叫你放心講真話嘅人,自己已經講緊最大嘅假話。係社會上,知道真假係好,但更要知道幾時講,邊度講,仲有講唔講。」
責編:李玥展

編輯:Dustin

編輯推薦

【蔣薇 | 港女辦公室】扮工天王

成日話辦公扮工,每個打工仔都需要識得扮工基本功,適當忙裡偷閒。但凡事有例外,扮工去到極致,好似我哋呢位同事咁,稱得上係「扮.工.天.王」!

2017-08-25 10:49

【蔣薇 | 港女辦公室】千萬不要小看公司IT部

有個員工有日如常返工,點知張門咭入唔到,以為壞咗之餘,突然幾個保安出現,押送佢返自己位收拾私人物品,即炒。

2017-08-21 10:25

【蔣薇 | 港女辦公室】三倍人工做唔做?

你好難估計,原來中環人比起姐姐們更唔在乎自由同娛樂,當姐姐們不為五斗米折腰時,中環人即時跪低。

2017-08-14 09:13

熱門評論

已複製連結