橙新聞

【蔣薇 | 港女辦公室】扮工天王

文:蔣薇
成日話辦公扮工,每個打工仔都需要識得扮工基本功,適當忙裡偷閒。但凡事有例外,扮工去到極致,好似我哋呢位同事咁,稱得上係「扮.工.天.王」!

扮工概念都係為咗偷懶,佢唔係,佢扮工係扮勤力,仲要係病態咁扮,就好似每日最遲收工嘅都應該係佢,為咗令你知道佢要OT,佢臨走之際都要廣發email問呢樣個樣,仲要cc俾全世界,等大家都知道佢幾點仲留係公司努力跟進進度,事事親力親為咁款。

理論上,Email同Follow up係無問題的,但唔關事嘅野點解你要CC埋人?CC都算,可唔可以講重點?幻想吓你睇完一篇幾百字嘅英文Email,好似唔多關自己事,為咗make sure唔關你事以免漏招,你再睇一次,終於完全確認,真!係!唔!關!你!事!

佢只需要你知道佢仲工作,無其他意思,你又唔可以無視佢,因為十零封入面,有一兩封真係關你事,曾經有位同事頂佢唔順,叫佢唔好send唔關事嘅野俾自己。

佢一臉委屈話:「我都係想將大家keep in track,睇大家可以清楚少少個status,我唔覺得有問題囉,你睇我每日搞到九點幾十點,你哋唔care唔理就準時收工,家吓你仲怪呢個盡責嘅嘅我?」無言,佢依然send,你唔通同上司投訴佢email你?無用。

唔止咁,好多時佢會「親力親為」,例如要問另一個部門同事野,好簡單幾句野,就係正常人一分鐘電話講完,你問佢答嗰種,佢會選擇花十五分鐘去打幾百字email問,你回佢如果字唔夠多,佢會回你覺得唔太clear,要你再detail少少,又或者唔用電話,book間會議室大家坐低問埋d低能簡單問題。

面對呢種扮工大王,佢已經入戲到抽離唔到自己,你唔好以為係一日半日,佢已經係呢間公司五年,但仍然未升過職,佢成日都會同其他人呻,自己俾咗咁多時間同心機係公司,但公司從來都唔會報答自己覺得好委屈。

有種人,佢只會計自己付出幾多,唔會計自己實際貢獻咗咩成果出嚟,正常人一分鐘做到嘅野,你十分鐘先做到,唔會有人欣賞你付出多九分鐘,而係你要用多過人時間先做到同樣嘅野。我哋寧願佢偷懶,都唔想佢花時間做無謂野。

有個同事對佢有一個總結:「你唔好怪佢,佢只可以用咁愚蠢嘅方式去表現自己,大家俾少少同比情心同理心去關懷一吓弱智,啊,唔係,係弱勢先啱。」
責編:李玥展

編輯:Dustin

編輯推薦

【蔣薇 | 港女辦公室】千萬不要小看公司IT部

有個員工有日如常返工,點知張門咭入唔到,以為壞咗之餘,突然幾個保安出現,押送佢返自己位收拾私人物品,即炒。

2017-08-21 10:25

【蔣薇 | 港女辦公室】三倍人工做唔做?

你好難估計,原來中環人比起姐姐們更唔在乎自由同娛樂,當姐姐們不為五斗米折腰時,中環人即時跪低。

2017-08-14 09:13

【蔣薇 | 港女辦公室 】試用期遲到,拜拜

準時係美德,但遲到都唔係乜大罪,好多香港人覺得遲十五分鐘唔算遲,甚至有原因地遲就大安旨意。

2017-07-13 17:08

熱門評論

已複製連結