橙新聞

【蔣薇 | 港女辦公室】千萬不要小看公司IT部

 文 :蔣薇
最近公司發生咗件大事,話說有個員工有日如常返工,點知張門咭入唔到,以為壞咗之餘,突然幾個保安出現,押送佢返自己位收拾私人物品,即炒。大家都呆咗,連少少先兆都無,個員工入咗老闆大房幾分鐘之後,死晒狗咁出嚟執野走,其他人人心惶惶,想問乜事,但當事人唔願意講,而呢件事亦成為了黑色恐怖,大家傳言公司會大裁員,又有人話佢得罪老闆之類……直到有日同IT部同事講起先解開呢個謎……

「公司都唔知搞乜,突然就炒個同事,一聲交代都無,都唔知聽日會唔會到我……」

「話唔定佢身有屎呢,你理咁多做乜,安安份份咪好囉!」

「安份?呢種叫未雨綢繆,唔諗定條後路出起事上嚟就慘。」

突然IT同事嚮咗句:「所以你成日上網搵工Send CV嘛?」

同事一聽當堂打咗個突:「你點知啊?」

IT同事笑笑口話:「問題應該係,我點解唔知?」佢用一副看破世事嘅目光掃視在場每一個人,然後陰陰咀笑:「嗱,我發夢就夢見過一件事,發夢咋,你哋唔好當真,話說某公司有個員工,佢間唔中會係公司做私幫野,咁通常呢,我哋,啊,應該話,IT部通常都唔會點Check,但都間唔中會睇吓有乜異常,做私幫野係公司算係死罪,但好多時大家都係隻眼開隻眼閉就算,直到有次發現到佢個私幫客係公司某個客戶,秘撈到食埋自己公司客,咁就不能容忍喇,第二日即刻被炒。」真相終於大白,原來衰呢樣,咁就真係無得幫……

IT同事繼續話:「每次佢都好小心,用不留痕上網,仲會delete所有記錄,如果佢係防女朋友知佢有外遇,都可以嘅,但對於我哋講,佢點刪,我哋都知道。」大家有少少心寒,你都知道???同事好似知大家心入面句野:「係啊,你哋每日上幾多分鐘Facebook,Send咗乜野情慾email,炒股買邊隻,甚至我哋可以隨時睇你依家電腦做緊乜,又或者……開你哋個cam睇吓你個樣添。」乜話?睇到自己做乜,同埋開cam都得,咁你侵犯緊我哋個人私隱喎!

「公司電腦,應該做公司野,亦係公司財產,唔通你想講返工時間你用公司資源做私人野?講真,公司咁多部機,我哋都唔會特別去睇,除非你有奇怪,有老闆落order mon你啦,我哋亦都唔可以隨便睇資料。溫馨提示,返工時間做自己野,用自己電話係最安全。」今日返到Office,大家不約而同做同一件事,拎張膠紙封咗個cam……


責編:李玥展

編輯:Dustin

編輯推薦

【蔣薇 | 港女辦公室】三倍人工做唔做?

你好難估計,原來中環人比起姐姐們更唔在乎自由同娛樂,當姐姐們不為五斗米折腰時,中環人即時跪低。

2017-08-14 09:13

【蔣薇 | 港女辦公室 】試用期遲到,拜拜

準時係美德,但遲到都唔係乜大罪,好多香港人覺得遲十五分鐘唔算遲,甚至有原因地遲就大安旨意。

2017-07-13 17:08

【蔣薇 | 港女辦公室 】我男友祼辭咗

祼辭無收入大大影響到我哋結婚買樓嘅進度,我相信無一個女仔可以接受到突然男友無咗份工。

2017-07-07 09:29

熱門評論

已複製連結