橙新聞

【蔣薇 | 港女辦公室】三倍人工做唔做?

文:蔣薇

細個玩飛行棋,三個六返大陸,最近中環有個熱議,就係大陸準備以一萬五千請菲律賓姐姐,比起五千蚊左右嘅香港價,足足成三倍!?有組織做過街訪,問姐姐們會唔會受金錢引誘,竟然絕大部份都話唔想返大陸工作。

呢單新聞對中環人影響都幾大,中層高層有仔女嘅有邊個屋企無個姐姐幫下手?大家都好擔心之後要搵姐姐好難,又或者姐姐會唔會北上搵真銀,所以午飯時間大家都會講兩講。

「三倍人工都唔上去,俾我一定即上!」

「無得上Facebook,連Whatsapp同Youtube都無喎,你頂唔頂得順啊?」

「三倍人工喎,電話都無得用我都無所謂啊!」

「比我就唔得喇……無得上網我會死……」

「有錢你估無得上網?俾個貴嘅VPN,每個月收你幾百蚊包你上得快添啊!」

三倍人工,你願意作出犧牲嗎?

問我自己,係吸引的,我捱一年等於你捱三年喎,而普遍中環人有邊個未上過大陸做野?出Trip除咗去外國,仲有唔少要返內地,有朋友做會計一上去睇數就睇兩個星期,仲要係收緊香港同樣人工喎。

上網?自由?大佬啊,係中環返工有邊個唔睇錢?班會計日日OT到四五點,你估為興趣?班Ibanker日夜顛倒,你又估係鍛練身體啊?生活係中環,除咗有份優越感之外,大部份人都係睇錢。三倍人工,都好難唔心動……

你好難估計,原來中環人比起姐姐們更唔在乎自由同娛樂,當姐姐們不為五斗米折腰時,中環人即時跪低。

正所謂每個人都有個價,加薪20%你可能唔理,50%你仲會考慮,兩倍的話,已經無乜理由唔答應,三倍?已經係夢幻般嘅加幅,你只會質疑係真係假。

有同事反駁,喂,返大陸做野,你受唔受到啊,上邊班老闆可能好惡頂喎!另一個同事一句KO佢:同事,你仔細諗下香港班老闆?你估好好相與啊?

俾佢一講,的確係,俾一千你賺嘅叫老闆,俾一萬你賺嘅都叫老闆,你以為一千蚊老闆要求係一萬嘅十分一,證明你入世未深,香港人唔執輸兼俾劉華洗腦之後,俾一蚊你賺都洗到你盡啊!好多時候係出得起錢反而要求無咁高添啊!

與其係受,三倍價錢,受得嚟你打開個ebanking時,都會會心一笑啦!

編輯:Dustin

編輯推薦

【港女辦公室 | 蔣薇】公司當你棋子定家人?

你覺得同公司講感情好傻?我話,你同公司無感情先至傻!感情係要雙方付出,單方面付出係傻,但如果雙方面都有付出,係愛啊!

2017-08-07 11:13

【蔣薇 | 港女辦公室 】 WhatsApp Cap圖事件

Whatsapp最慘嘅你知唔知係乜?已讀不回?錯!Send錯Msg?錯!係俾人Cap低你嘅對話再外傳!

2017-07-27 18:08

【蔣薇 | 港女辦公室 】「老鼎」與老頂

聽過「卸膊操」未?同事卸膊你都仲有得拆,但上司卸膊你往往都只有硬食,今次講嘅係兩個上司嘅故事。

2017-07-25 17:16

熱門評論

已複製連結