橙新聞

【港女辦公室 | 蔣薇】公司當你棋子定家人?

文:蔣薇 
  
好多人覺得打份工,係一買一賣,我賣時間俾公司,公司出錢俾你,大家係金錢關係,無拖無欠。不過金錢交易還金錢交易,交易之間都可以講感情,亦應該講感情,試諗吓,你人生中有三份一時間係工作上,如果無感情,真係好悲慘。
  
【港女辦公室 | 蔣薇】公司當你棋子定家人?

公司有邊咁上下同事,我諗你都會經歷過有同事出現病痛,唔係感冒Sick Leave,而係有病走咗個種,四五十歲同事突然間有癌症,真係好普遍…… 所以耐唔耐我哋放工都會去醫院探吓同事。
   
有冇諗過,你突然間有癌症,你公司會點對你?
  
呢個係一個必須思考嘅課題。
    
你遇著仆街公司,嘩你病啊?請假睇醫生?咁公司咪少個人做野?咩話?你每日都要去覆診?咁計唔計你糧啊?吓!!你有醫生紙話你要留院一個月?你病不如唔好返工喇,聽日俾封辭職信我安心養病啦!
   
人情冷暖世態炎涼,病無人想,你唔安慰之餘,仲落井下石,擔心自己無命之餘,仲要擔心埋自己份工,仲點會有心情養病?
  
唔少公司計到盡,你返工,應份地出錢俾你,但你病,即係無返工無生產啦,公司就一腳伸開你,難為班同你打足十幾廿年工嘅老臣子,付出歲月如此多,得到的,係一種嫌棄同侮辱。
  
如果你間公司係咁,勸你快走,因為佢係一個會始亂終棄嘅陳世美。
   
【港女辦公室 | 蔣薇】公司當你棋子定家人?
我公司好好彩,醫療保障做得好足,你頭暈感冒睇醫生都有Cover,請病假之餘仲唔駛錢睇醫生,講真一百幾十唔算咩錢,但你有個安心有個保障,最緊要係,早排有同事驗到有cancer都有錢賠,話多唔多話少唔少,但你無諗過公司會幫你安排到咁嘅地步。
   
而且你病嘅時候,公司係唔會俾臉色你睇,仲會叫你好好休息,唔好夾硬返工,有咩事大家撐住先,當你有病你聽到咁窩心嘅說話,你都好想快d好返再次投入呢個大家庭!有一個case係同事長期做化療,返唔到工半年,頭三個月都照出糧,第四個月公司先話將月薪減返少少,但都照出咗五成俾佢渡過難關。
      
一間有人情味嘅公司,唔會事事同你計到足,唔會吓吓同你講官僚,大家唔單止係金錢關係,你覺得同公司講感情好傻?我話,你同公司無感情先至傻!感情係要雙方付出,單方面付出係傻,但如果雙方面都有付出,係愛啊!
  

編輯:Stacy

編輯推薦

【蔣薇 | 港女辦公室 】 WhatsApp Cap圖事件

Whatsapp最慘嘅你知唔知係乜?已讀不回?錯!Send錯Msg?錯!係俾人Cap低你嘅對話再外傳!

2017-07-27 18:08

【蔣薇 | 港女辦公室 】「老鼎」與老頂

聽過「卸膊操」未?同事卸膊你都仲有得拆,但上司卸膊你往往都只有硬食,今次講嘅係兩個上司嘅故事。

2017-07-25 17:16

【蔣薇 | 港女辦公室 】試用期遲到,拜拜

準時係美德,但遲到都唔係乜大罪,好多香港人覺得遲十五分鐘唔算遲,甚至有原因地遲就大安旨意。

2017-07-13 17:08

熱門評論