橙新聞

【蔣薇 | 港女辦公室 】試用期遲到,拜拜

文:蔣薇

最近有僱主話九十後員工遲到又準時走,成為全城熱話,我都可以分享一下敝公司對於遲到嘅一個小故事。話說我哋公司成日都有新人返工,營業部個邊就有個新同事返工,佢哋老頂好憎人遲到,所以每個新人入職都會講叫佢哋唔好遲到。準時係美德,但遲到都唔係乜大罪,好多香港人覺得遲十五分鐘唔算遲,甚至有原因地遲就大安旨意。
【蔣薇 | 港女辦公室 】試用期遲到,拜拜

新同事,叫佢做Daniel啦,三個月試用期入面,佢第一個月就遲咗一獲,唔多,十分鐘姐,即時佢就收咗個Warning,佢即時好Sad,食飯個陣佢話今朝前面列車有人唔舒服,搞咗好耐先行得車,所以趕返嚟時已經趕唔切。港鐵出事大家都習以為常,有前輩已經叫佢醒定少少唔好再遲,因為再遲的話就過唔到試用期,偏偏第三個月中佢遇上另一次意外,今次係港鐵故障,遲咗成半個鐘,仲好衰唔衰嗰日九點會,當佢九點半走入會議室時,老頂望咗佢一望,然後就話叫人事部出信叫佢走,Daniel聽到當然想解釋:「我都唔係想遲到,不過頭先港鐵壞車搞到我失咗預算……」老頂無理佢繼續開會,大家都帶住一個可憐嘅目光,心諗今次你唔好彩喇……

Daniel佢自然唔服:「壞車我都唔想,我已經係準時出門,但意外嘅野你點可以入我數呢?」唔講由自可,老頂俾佢呢句打斷咗個會,終於停落嚟望咗望佢:「如果有日你見客,約九點,但你壞車遲半個鐘,從而無咗單生意,你仲可唔可以令我放心交客俾你跟?」「我相信客人會理解我遲到理由囉!」「咁如果同一時間有其他人同你搶緊客,而對方準時你唔準時,內容一樣你覺得個客會俾邊個做?你再望吓間房,人齊唔齊?呢度有幾多人搭港鐵返工?應該唔少,但點解得你一個遲?」Daniel望望房入面其他人,的確人齊坐晒係度,一時之間講唔出野。
【蔣薇 | 港女辦公室 】試用期遲到,拜拜

「我唔理你理由係乜,遲到就係遲到,機會有一次唔可以有第二次,試用期內我唔會俾你過,因為你連我哋最簡單要求都未做到。」就係咁,一個大好青年就葬送係呢間房入面。我好慶幸自己唔係呢個部門。各處鄉村各處例,我覺得呢個做法好harsh,但人哋先小人後君子,將個道德高地放到幾高你都只可以硬食。

遲到,我覺得好小事,但你唔可以排除有人視之為大事,更有人連理由都唔會聽你就term你,你問我合唔合理?我又覺得作為Sales,的確守時係好重要,而佢提到嘅情況有機會出現,從而你又失咗個客。講唔出咩大道理,只係一個小故事分享,你有乜得著,點諗我理唔到,你可以覺得小題大造,亦可以覺得合理,但亦改變唔到一間公司嘅處理方法,Okay,講完。

編輯:Dustin

編輯推薦

【蔣薇 | 港女辦公室 】我男友祼辭咗

祼辭無收入大大影響到我哋結婚買樓嘅進度,我相信無一個女仔可以接受到突然男友無咗份工。

2017-07-07 09:29

【蔣薇 | 港女辦公室】 瞬間變老闆

有邊個打工仔唔想做老闆?最近有朋友榮昇老闆,但佢少少開心都無!

2017-07-04 09:19

【蔣薇 | 港女辦公室 】 兩小時彈性午飯時間

公司同你計,你咪同返佢計囉;公司對你好,你都會對公司好

2017-06-27 09:56

熱門評論

已複製連結