橙新聞

【蔣薇 | 港女辦公室 】我男友祼辭咗

文:蔣薇
最近男朋友阿輝出事,佢同公司某個判頭炒大獲,好似話對方成日拖欠下面數,明明有錢都唔肯出,硬係要拖到人地追上門先肯出張期票俾人,而偏偏其中一個Sub-con係佢老友,人地等住開飯,因為咁佢呢排都勁勞氣。

「有乜理由拖人地半年,依家追完先話出張六十日期票俾人先得嫁?公司又唔係無錢,張Contract寫係四十五日找數,百幾日都嚟緊,Philip佢仔細老婆嫩,下面仲有成班人要出糧,唔通佢同班師傅講,上面未比錢,你地今個月食風啦!」阿輝佢係一個係某D事上面好有原則嘅人,話一就一,話二就二,所以當年佢無做銀行都係因為頂唔順個氛圍,做得金融你都知係呃呃氹氹。

作為女朋友,我可以點?聽佢呻囉!「聽聞啊,Philip佢要按層樓出糧俾班伙計,唔得,聽日我要同公司講下先得!」翌日收工,我如常咁係中環地鐵站等阿輝,佢準時出現,然後粒聲唔出咁行,我問佢去邊,佢話帶我食餐好嘅,平時我哋拍拖都唔會特別去食好野,除非慶祝生日紀念日之類,我都知有少少唔妥。

去到餐廳點完菜之後,阿輝佢捉住我隻手認真十足咁講:「我辭咗職。」「吓?點解咁突然嘅!」「今日我搵咗個老闆傾Philip單野,然後佢應承我會搞,跟住個大判就死死氣同我跟,明顯佢中間有蠱惑啦!仲話我同Philip兩個老死拍住搵著數,我咪同佢講我唔撈囉,大家合作唔到落去!」

聽完之後,我個腦空白咗幾秒,突然間我諗起好多港女論壇嘅故事,只不過今次要講故事嘅係我。祼辭無收入大大影響到我哋結婚買樓嘅進度,我相信無一個女仔可以接受到突然男友無咗份工。我大可以話佢點解唔忍下,點解小小事都要嘈,每行都要受氣啦,咁大個人點解唔可以搵到工先開佢波?

一直沉默嘅我令阿輝有少少不安,佢忍唔住問:「你……唔打算講吓野?」「我應該講乜?」「講乜都好……」「我覺得你應該繼續講落去。」「講落去,其實我已經有少少計劃………………」之後阿輝佢將個打算一五一十講出嚟:「不過我都係好初步去諗,我唔知你點睇,更唔知你會唔會支持我……」

聽完我深吸呼一口氣:「既然你有打算,我就會支持你,無人答到你之後決定係對係錯,但作為女朋友,無論你做乜我都會支持。」飯繼續食,我哋無再係呢件事再傾落去,兩個人相處,比起分析,更重要嘅係相信對方。

編輯:Dustin

編輯推薦

【蔣薇 | 港女辦公室】 瞬間變老闆

有邊個打工仔唔想做老闆?最近有朋友榮昇老闆,但佢少少開心都無!

2017-07-04 09:19

【蔣薇 | 港女辦公室 】 兩小時彈性午飯時間

公司同你計,你咪同返佢計囉;公司對你好,你都會對公司好

2017-06-27 09:56

【蔣薇 | 港女辦公室 】辦公室的成人群組

每個Office都總有幾個咀特別賤口特別臭嘅同事,西裝斯文之下,有一顆黃色的心,今次講嘅就係一個群組嘅故事。

2017-06-23 11:20

熱門評論

已複製連結