橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【港女辦公室 | 蔣薇】上進心與貪錢

文:蔣薇
    
「寧教人打仔,莫教人分妻」呢種道理係人都識,但識還識,做唔做到係另一回事。
    
【港女辦公室 | 蔣薇】上進心與貪錢
不如問吓你,如果有個男仔,佢收入長期維持係低水平,點為之低?跑輸大市囉,同齡計佢都算係墊底,咁你作為佢女朋友,你會唔會分手?又如果你係佢同事,你會唔會勸佢分手。
  
我作為佢同事,作出一個好客觀,亦好直接嘅建議,飛咗佢啦,唔好浪費自己青春,同行所有女人都一致認同。當事人阿Wing佢面色沉重,我忍唔住贈多佢一句:「其實答案你好清楚,只不過你想搵人支持你,你已經有啦。」
    
周末過後,星期一眼紅紅嘅Wing返到公司,女人直覺真係好準,好多人一睇就感覺到三個字,手已分。
    
Lunch時間大家搵咗間靜少少嘅餐廳,慶祝吓,啊唔係,係解穢吓,啊唔係,係安慰吓佢,但阿Wing講佢原來無分到手,我心諗唔係嘛?原來係……
  
當晚阿Wing已經話要分手,咁個男仔就問點解啦,然後例牌問,你係唔係有咗第二個,又或者係咪俾帽佢戴,Come On,如果有,都唔會同你講啦,古語有云,君子分手,不提惡言嘛,但其實對於一個單細胞男人講,話派帽反而比較直接。
    
男仔再問點解,阿Wing忍唔住講咗句:「我覺得你無上進心,同你一齊無將來。」Well,呢個係事實,亦係真話,點知男方就爆發!
    
連珠炮發罵佢:「咩上進心?講到底你都係嫌我窮,貪錢仲要搵藉口,你睇我唔起嘛,我就證明你睇你係錯,大錯特錯,而你亦會為自己貪錢付出代價!」
  
阿Wing太Young喇,大大聲加似是而非嘅野就嚇到佢出唔到聲,仲開始覺得自己有錯,竟然同個男仔道歉,仲話唔分手,佢唔係嫌棄佢窮咁話……
    
事到如今,佢要繼續留係地獄我哋都無辦法,但只要你有返少少閱歷都可以分得清,窮同上進心絕對有分別。
      
【港女辦公室 | 蔣薇】上進心與貪錢
愛一個人都會諗將來,你見唔到將來,仲點一齊呢?
  
一時之間你可以睇到一個人窮唔窮,但時間長咗,你眼見佢為人處事,行為舉止,你會好清楚佢有冇上進心。
    
對自己無要求係自己嘅事,但兩個人一齊都拎住呢種想法,就係對對方唔負責任,呢個時候仲諉過於人?食屎啦!
  

編輯:Stacy

編輯推薦

【港女辦公室 | 蔣薇】廉航的奇妙旅程

廉航?如果你人生有好多時間浪費,如果你想感受突而其來嘅意外,如果你富有冒險甚至被虐精神,如果你真係又窮又想去旅行,歡迎登機,祝你有一次奇妙旅程。

2017-04-14 11:00

【港女辦公室 | 蔣薇 】住唔慣大屋嘅賤人

早排同男朋友去旅行,年輕人多數都Book Airbnb啦,其中有一間屋我哋打開門呆咗呆,成千幾呎,高層開揚露台海邊一覽無遺,以價錢睇可以住到咁嘅屋,當然係抵啦,但我有種奇怪感覺……唔係有鬼……

2017-03-22 11:17

【港女辦公室 | 蔣薇】一百蚊的溫暖

有句我無講:同自己喜歡嘅人一齊掃街,你一啖我一啖,呢樣先令我覺得最溫暖。

2017-03-10 14:29

熱門評論