橙新聞

蔣薇

網絡作家,曾推出小說《那天,我出席了一個葬禮》《南極》《同學會重遇的那個人》,作品見於各報章及網上平台。

【蔣薇|港女辦公室】中環站的第五班車

文:蔣薇
  
【蔣薇|港女辦公室】中環站的第五班車

(圖:AFP)

中環人好似好High Class,但其實中環返工好多人都會搭地鐵,企你隔離嘅可能一年搵緊幾百萬都唔出奇,因為中環你返放工時間想揸車,先唔講天價嘅停車場費用,只講塞車你都幾頭痕,所以中環好多人都會搭地鐵。
   
返放工中環仲多過深水埗街市買餸,等兩三班地鐵已經係等閒,有好多金鐘人會搭回頭車,車到個陣已經滿咗半,我最高記錄足足係閘口塞到落去。
  
今次我想講嘅係一次等咗五班車嘅故事。
     
當日等咗五班車,我約咗人趕時間已經差唔多遲到,門口位已經塞滿人,明明裡面仲有唔少空位,但偏偏就唔會有人行入去,我望住一個好似夠,但又唔係好夠嘅位,正想硬上時候,個手袋就唔多夠,我只可以係咁攝入去,同佢……就係呢個時間認識。
    
「你趕時間你上先。」我聽到一把低沉得嚟帶點磁性嘅聲,我未意識到發生咩時間,一個裝束好似地盤佬嘅男人就走咗出車,我同佢四目相投,以地盤佬講,佢都算幾清靚白淨,正車準備關門,我只可以隔住車門同佢講咗聲:多謝。
    
說時遲那時快,車門又打返開……梗係有條茂利夾硬上車搞到門又打開,我唔知點解迫咗後面嘅人入去,再spare多個位出嚟,再一手拉返佢入嚟。
    
除咗話係緣份,我都唔知點解會咁做,而佢亦係佐敦問我拎咗電話,用咩理由?無,佢只係話可唔可以俾我電話佢……我亦無去思考點解要俾電話一個素未謀面嘅人。就係咁,我同佢就認識咗,唔似其他中環人介紹自己要用英文名,又或者再扮野D用Initial,佢叫阿輝,一個好平凡而好有佬味嘅男人名。
    
【蔣薇|港女辦公室】中環站的第五班車

(圖:AFP)

阿輝佢係中環返工,同我一樣返Office,但我係文職,佢就係做工程,係中環做工程有樣好,佢都係9-6咁返放工。
    
唔似其他中環人,講牌頭,講股票,開口埋口都係錢錢錢。地盤佬佬味十足,不過我未至於咁特別喜歡汗同油灰。但作為一個地盤佬,阿輝係一個有氣質嘅地盤佬。唔講唔知佢都係大學畢業,仲要讀Finance,我有睇過佢大學西裝照,行出中環都絕對係才俊樣。但佢做咗一年半銀行就無再做,輾轉去咗工作假期,然後返嚟做裝修、地盤炒散。
  
係佢口中,我聞唔到中環嘅銅臭味。佢可以同我講佢係柬埔寨入院嘅體會,又或者係斯里蘭卡教小學生英文嘅經歷,有時佢會成晚係山上面影縮時夜景。睇住燈光愈來愈多,再愈熄愈少。
  
第一次佢約我食飯,係Soho嘅一條橫街後巷。有間菲律賓人開嘅Burger,只有十二個位,埋單都係二百蚊左右,但比起我之前同個金融才俊食Amber成皮野落樓仲開心。
  
然後有一次我哋相約一齊搭地鐵,都係等咗五班車。同樣係裡面好多位,門口好硬淨,我哋迫咗入去之後,港女如我當然要Jip一Jip啦。我成日諗如果每個人都行入D,三班車就夠上。
    
阿輝好似明白我嘅想法,佢大聲講:「裡面嘅人千祈唔好行入去啊,如果唔係出面班人就會迫入嚟,咁成架車就好迫嫁喇!等開車之後先好行入去啊!」
    
終於入面班人聽到行入少少,然後足足入多咗八個人。
   
係中環到金鐘隧道中,我同阿輝隻手係人群之中十指緊扣。
  

編輯:Stacy

編輯推薦

【蔣薇 | 港女辦公室】中環買不到的飯盒

【蔣薇 | 港女辦公室】中環買不到的飯盒

有種飯,佢係中環唯一一樣有錢都買唔到嘅飯。

2016-11-04 10:33
【蔣薇 | 港女辦公室】 Email 五大罪

【蔣薇 | 港女辦公室】 Email 五大罪

我公司所有入職員工都需要修讀兩小時嘅Email入門班,你可能會心諗,有冇咁誇張啊?Email都要讀?你無睇錯,係真事,而我眼見係合情合理,不如等我由上年發生嘅事講起。

2016-11-25 09:39
【蔣薇 | 港女辦公室 】拜年總有賤格親戚

【蔣薇 | 港女辦公室 】拜年總有賤格親戚

好多港女都好驚新年,我想講,曾經我都係,不過自從有一年嘅新年之後,我就再無驚過……

2017-01-31 10:08

熱門評論