橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】全城追《二月廿九》 無綫難有純愛劇?

文:方以文
全城熱捧嘅《二月廿九》喺高討論同高支持度之下完美落幕,全套劇除咗劇本有部份拖沓之外,好值得睇,尤其係燈光攝影方面好靚。我最鍾意會長撞車死咗個一幕,迎面貨車車頭燈令到漫漫飄雪更有質感,令呢一幕淒美動人。唔少文章都有講到邊度好睇點樣好睇演員做得好,所以此文不贅。有人話無可能係TVB睇到呢啲純愛劇、無綫冇愛情做主線嘅劇集,但咁啱喺播緊《二月廿九》嘅時候,無綫中午重播2015年陳豪同胡杏兒擔正、以愛情為主線嘅《陪著你走》,或者可以從呢兩套劇睇吓無綫係咪拍唔到「純愛劇」。

圖片來源:《二月廿九》劇照

少見愛情為主 專業為副

《陪著你走》係非典型嘅無綫劇集,唔係職業主導愛情襯托,而係倒轉,職業好多時都係為咗帶出愛情,主角陳豪飾演嘅甘言重從事廣告創作行業,絕大部分嘅作用係帶出「愛是無所不能」嘅愛情觀,輔助劇中角色嘅感情推進。《二月廿九》亦都一樣,劉俊謙飾演嘅余家聰喺大學教哲學、徐天佑飾演嘅 Ryan整壽司、吳海昕飾演嘅Yeesa係freelance designer,除咗Ryan嘅職業同劇情發展有少少相關,另外兩個職業都近乎冇發揮過作用,女主角Yeesa嘅職業對劇情發展近乎冇關係。不過冇關係唔緊要,得十集嘅話呢個處理係無錯,如果同愛情冇關,我諗冇人想睇到佢哋喺職場發生咩事。無綫好多時就係咁樣設計,為求多啲支線可以充撐最少二十集嘅長度,但咁做好多時愈講愈遠,令到主題失焦。

純愛劇主角要後生?

《二月廿九》起用嘅女主角吳海昕、劉俊謙都青春可人,徐天佑喺電視界裡面都係一個新面孔,睇年青人談戀愛最容易受落,幾位主角就算扮細幾年都令人容易接受,唔似無綫要啲演員做細過自己十幾廿年嘅角色。《陪著你走》一反傳統,男主角步入中年有老花,係少數將演員同角色年紀睇齊嘅劇集,自然比起扮細十幾年容易接受得多。只不過又有幾多一線演員肯做呢啲「老」角色?有幾多劇組夠膽喺愛情劇裡面要唔後生嘅男女主角演返自己嘅年紀?喺無綫論資排輩又唔敢搏嘅生態下,有幾多年輕演員可以擔正做主角?

圖片來源:《陪著你走》劇照

多元化不及收視重要

《陪著你走》喺無綫主打「專業劇」嘅情況當中係異類,但既然無綫都拍過呢類愛情為主線嘅劇集,加上播嘅時候有一定嘅討論度,有觀眾更加覺得係女主角胡杏兒演技進步變自然之作,咁點解相隔5年,都見唔到「成功」嘅純愛情片?除咗有啲製作真係唔達標之外,仲因為無綫近年認為收視係唯一衡量成功嘅條件,完全唔計市場口碑。小品劇《陪著你走》喺2015年首播時平均收視只係得22點,喺當年唔係一個好成績,顯示咗無綫觀眾唔太buy純愛情劇。ViuTV今次播放水準以上嘅《二月廿九》,有指收視達3點以上,係佢哋少有嘅高收視,喺網上討論區嘅討論當中,見到套劇成功吸引到一班年輕又唔太睇港劇嘅觀眾,成為ViuTV嘅劇集代表作之一。

虧蝕情況下題材愈趨單一

要無錢喺依家蝕到入肉嘅情況下,開拍估計冇乜收視嘅純愛劇似乎係異想天開,無綫劇集題材單一嘅情況睇嚟都會愈來愈嚴重。佢依家拍緊嘅《香港愛情故事》打正旗號以愛情掛帥,到時又係咪真係愛情為主,又有幾多唔相關嘅情節變咗主線呢?大家拭目以待。不過我希望ViuTV唔好因為今次《二月廿九》收視好就食髓知味,繼而主攻純愛劇,因為ViuTV貴在多元、 TVB 敗在單一,千祈要認清自己嘅優勢,繼續創新多元發展,香港嘅電視生態先會變好,我等緊睇《打天下》、《嘆息橋》,仲有《男排女將》呀。

責編:林偉德

編輯:Dustin

編輯推薦

【方以文 | 睇乜電視啊?】《萬千星輝》平衡內外派別演員

每年無綫嘅《萬千星輝頒獎典禮》都被視為圍內人選舉,公信力欠奉。我就當佢係校內班際比賽咁睇,邊個得獎可以睇到無綫高層取態。

2020-01-14 11:22

【方以文 | 睇乜電視啊?】2019電視大事回顧

2019年嚟到尾聲,係時候回望過去、展望將來。香港喺6月開始,所有嘢都受到「反送中」運動而改變或者催化,社會各界包括咗電視業界都受到影響。一齊回顧下今年發生咗咩事。

2019-12-31 11:21

【方以文 | 睇乜電視啊?】林文龍出任副總裁 亞視生機再現

12月23日,已經變咗做OTT平台嘅亞洲電視,舉行亞洲小姐競選記者會。喺記者會現場最吸引目光嘅唔係一眾佳麗,而係以候任亞洲電視副總裁身份出現嘅林文龍。

2019-12-27 11:30

熱門評論

已複製連結