橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《萬千星輝》平衡內外派別演員

文:方以文
每年無綫嘅《萬千星輝頒獎典禮》都被視為圍內人選舉,公信力欠奉。我就當佢係校內班際比賽咁睇,邊個得獎可以睇到無綫高層取態,甚至可以估計之後有咩發展(雖然無綫仲有冇人力物力發展係個問題)。今年《萬千星輝頒獎典禮2019》各個獎項本來「分配」得幾平均,但係楊千嬅喺節目中途突然現身,坐咗喺惠英紅同李施嬅中間,令到無綫破天荒將「最受觀迎電視女角色」一獎兩頒,一個畀《多功能老婆》楊千嬅,一個畀《金宵大廈》李施嬅。

「女喜」一獎兩頒 豬肉味更濃
「最受歡迎電視女色角」呢個獎,根據大會所講,呢個獎由觀眾投票、無綫評分各佔分數50%,結果居然有相同得分雙冠軍,真係令人驚訝。有觀眾希望無綫可以公開分數,還兩位得獎者一個公道,亦有觀眾認為依家皆大歡喜幾好。
個獎有個「最」字都可以有兩個得獎者係搞笑咗啲,亦令到個獎嘅「豬肉味」更濃。有觀眾留言話咁都得,咁點解「最受歡迎電視男角色」唔可以有兩個得獎者,一個照畀《多功能老婆》周柏豪,另一個畀《金宵大廈》陳山聰,SUPER打和。呢個留言就顯示出一獎兩頒嘅問題:以後爭獎者如果旗鼓相當,就會有觀眾提返今屆一獎兩頒嘅先例,到時真係得啖笑。就算唔會再發生一獎兩頒事件,「最受歡迎電視角色」呢個早就被觀眾視為「視帝視后落選人安慰獎」嘅獎項,本來已經冇乜嘅矜貴感覺就變得更少。

圖片來源:電視截圖

視后女喜本鎖定紅姐千嬅?
冇人知道無綫係咪同惠英紅、楊千嬅講過嚟就有獎、唔嚟就冇獎。不過楊千嬅頒獎禮前一晚做完大陸巡迴演唱會都趕返嚟,惠英紅又一早現身由紅地毯環節支持到尾,兩個都咁有誠意,無綫要對兩位影后級外援有交代,唯有頒多個獎。若果楊千嬅一早話會到,李施嬅應該連「女喜」都冇,只係可以同陳山聰拎到「最受歡迎電視拍檔」
點解我估「最佳女主角」同「最受歡迎電視女角色」原本係惠英紅同埋楊千嬅拎呢?除咗因為李施嬅同無綫已經完咗約,無綫好少咁大方會畀獎剛剛離巢嘅藝員之外,仲因為男藝員獎項個得獎名單。同惠英紅一樣由頭支持個騷到尾嘅《鐵探》姜皓文,視帝之爭不敵叫糊12次終於食得出嘅《白色強人》馬國明。「最受歡迎電視男角色」又輸咗畀《多功能老婆》周柏豪。點解同樣係重量級外援,黑仔哥就坐足成晚得個桔?我認為係要平衡內部藝員同埋外援演員嘅得獎比例。

圖片來源:電視截圖

平均內部外援獎項 保各方合作
無綫正值缺人之際,因為前景愈來愈暗淡而自動離巢者,同埋因為財政問題而被離巢者都唔少。無綫自然想喺外援同埋內部藝員兩方面盡力平衡,希望吸引雙方效力。如果原本賽果係紅姐、千嬅兩位影后外援包辦女藝員兩個最高榮譽奬項,男藝員奬項頒畀自己人就合理晒。

馬明得視帝穩住內部演員
周柏豪呢位2017年加入無綫嘅「新自己人」,喺簽星夢時冇可能唔同無綫傾電視方面嘅發展同期望,如果唔係佢留喺華納專心發展音樂就得,所以佢攞「最受歡迎電視男角色」都算係可預期結果。周柏豪加入電視行業三年火速拎「男喜」,無綫喺呢個情況下,將視帝頒畀效力20年嘅老臣子馬國明就係最好嘅平衡。你見宣布今屆視帝屬於馬明時,近乎全台藝員歡呼為佢高興,就知無綫高層行呢步棋成功咗,將「無綫自己人都可以捱出頭」嘅訊息完美傳達。所以有網民話馬國明奪視帝係順應民意,我唔太認同。

圖片來源:電視截圖

圖片來源:電視截圖

男女配角獎旨在捧人
如果話反映民意嘅話,我諗男女配角嘅成份多過視帝,不過其實都只係喺民意基礎上搵人嚟捧。得到網民支持嘅《愛‧回家之開心速遞》周嘉洛、《金宵大廈》趙希洛,兩位同樣係首次提名就得獎,周嘉洛更加以24歲之齡、年資4年打破無綫最佳男配角得獎人年紀最細、年資最短嘅紀錄。以往被視為要年資夠長先可以拎到嘅男配角獎,今年有咁嘅賽果,反映無綫喺等人用之際,除咗一貫以「飛躍進步男女藝員」名銜去提升藝員級數之外,今年想用埋「最佳男女配角」嘅名銜去做呢件事。

當然各位演員得到獎項都有演技成份喺當中,但係我相信大局勢力博弈嘅影響仲大。《萬千星輝頒獎典禮2019》用全力去留住各方演員,可以話係無綫近年平衡演員方面做得最好嘅一次。不過講到底,就算演員方面搞得掂,最重要都係諗辦法爭取返觀眾同埋廣告商嘅支持,先至有望扭轉無綫財政同埋品牌形象連年崩壞嘅情況。

編輯:Dustin

編輯推薦

【方以文 | 睇乜電視啊?】2019電視大事回顧

2019年嚟到尾聲,係時候回望過去、展望將來。香港喺6月開始,所有嘢都受到「反送中」運動而改變或者催化,社會各界包括咗電視業界都受到影響。一齊回顧下今年發生咗咩事。

2019-12-31 11:21

【方以文 | 睇乜電視啊?】林文龍出任副總裁 亞視生機再現

12月23日,已經變咗做OTT平台嘅亞洲電視,舉行亞洲小姐競選記者會。喺記者會現場最吸引目光嘅唔係一眾佳麗,而係以候任亞洲電視副總裁身份出現嘅林文龍。

2019-12-27 11:30

【方以文 | 睇乜電視啊?】為求慳錢 無綫招數盡出

2015年1月首播嘅青少年節目《Y Angle》喺11月30日已經大咗結局,接替佢嘅係將J2清談節目《#後生仔傾吓偈》直接移植過去翡翠台嘅《#一屋後生仔》。淨係睇一個節目嘅變化可能冇乜full picture,但如果睇多幾個節目...

2019-12-16 15:04

熱門評論

已複製連結