橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】無綫搞藝訓班畢業劇有得諗?

文:方以文

《教束》喺一片歡呼聲中落幕,20集,遇上香港政局動盪,與時代互相呼應,令到唔少網民將佢奉為「神劇」。時勢造就《教束》,成為2019年至今坊間談論度最高嘅ViuTV劇集,傳聞收視亦都創咗世界盃之後嘅新高。劇集主軸講校長想將學校由津校轉直資,師生群起反抗。雙方對壘嘅時候,講理念、講實例,明刀明槍。

【方以文 | 睇乜電視啊?】無綫搞藝訓班畢業劇有得諗?

(Facebook圖片)

新演員擔大旗一樣精彩

《教束》睇到觀眾咁開心嘅原因,除咗有明快到肉嘅節奏同內容,仲因為一班有潛力嘅年輕新演員。兩個學生會候選內閣「不老騎士」同「OASIS」當中,除咗「御用中學生」岑珈其之外,張張都係新臉孔。「不老騎士」莊員們加上「OASIS」會長近乎由頭帶到尾,比起同劇劉俊謙、廖啟智、陳秀雯嘅戲份可能仲要多。岑珈其、周漢寧、唐浩然嘅友(愛)情三角,同埋程人富、鄧麗英、盧蓁宜嘅愛情三角都發揮得好好,個個演出都恰如其分,仲撞出唔少火花。當中角色際遇帶動劇情轉變嘅周漢寧(飾演 莊子民)尤其突出,佢嘅演技亦得到眾多好評。

ViuTV今次贏在無龐大嘅固定班底,令到選角方面自由度高啲。當然呢個係雙面刃嚟,冇固定班底就要考導演選角嘅眼光。今次《教束》選角命中率奇高,可以話係ViuTV少見。有觀眾話無綫有各自山頭,演員配搭永遠都係A配B、C配D,新演員又唔會畀佢哋擔正,所以做唔到呢啲新鮮組合。我自己認為今次《教束》引起嘅迴響,足以無綫借鏡,用唔用新演員,一念之間。

【方以文 | 睇乜電視啊?】無綫搞藝訓班畢業劇有得諗?

(Facebook圖片)

港姐直登女一 藝訓班同學點解要慢慢爬?

無綫嘅新演員,多數由兩個渠道而來,一係選美選秀,二係藝員訓練班。選到港姐冠軍就直登女一嘅情況一直為人詬病,但要佢改變難過登天,尤其係港姐,一年一屆、年年補上,的確係維持女演員數量嘅重要渠道。退一步咁諗,如果硬捧港姐係行得通,硬捧藝訓班嘅同學仔一樣得啫。但點解近年嚟都好少見訓藝班同學仔一畢業就擔正?我認為好大原因係因為曝光不足。

增加藝訓班學員曝光率

選港姐、港男、巨聲嘅過程當中,可以見到唔同候選人嘅支持度,當每個人都係白紙時,以人氣去做基礎再加上監製們嘅選角經驗眼光,就可以極速搵到值得一試去捧嘅新人,呢個係點解咁多佳麗都可以一夜之間扶搖直上嘅原因(企唔企得穩喺一線就係各自造化)。藝員訓練班方面,由選拔去到受訓時期都係非公開,直至佢哋畢業都係無聲無息。呢方面其實可以改動一吓,無必要全程公開,但係咪可以好似APA咁,每年都搞個畢業作品,甚至係期中作品,等大家可以認識吓一班藝訓班嘅同學仔?

借鑑《教束》 開藝訓班畢業作品

或者你會覺得好難要無綫用一班零知名度嘅演員去做一套劇,但依家事實擺在眼前,《教束》可以引起咁大嘅迴響同埋支持,就係強力嘅證據,借廖啟智同埋陳秀雯嘅牌頭,捧起劉俊謙同埋一班演學生嘅新演員。你可能會話依家處境劇《開心速遞》都有做同樣嘅嘢,安凌三姨都係新人入劇,但始終擺明車馬係「藝訓班畢業作品」嘅話,觀眾對於新演員嘅接受能力、包容能力會大得多,可以減少好多對演員嘅不必要消磨耗損。再者,依家無綫喺周六日嘅收視唔高,周六嘅《幸福一家人》更加因為收視太低而被調到深夜播放。如果搞「藝訓班畢業作品」,收視未必一定低沉,何況呢個項目可以視為投資,對於往後發展一定係好事嚟。

【方以文 | 睇乜電視啊?】無綫搞藝訓班畢業劇有得諗?

(Facebook圖片)

真心,無綫用無限永續嘅《流行經典50年》守住班年紀大啲嘅觀眾,同樣都要開拓年輕人市場先得。捧人力量愈來愈低嘅無綫,面對於ViuTV連續兩年嘅《全民造星》,係時候好好諗吓有咩方法培養新演員同新觀眾。

請關注《教束》一班年輕演員:

「不老騎士」莊員
岑珈其 飾 麥浩賢(IG @kakisham)
周漢寧 飾 莊子民(IG @henickchou)
鄧麗英 飾 Momo(IG @laiyingdesu)
盧蓁宜 飾 神婆 (IG @claudialjy)
程仁富 飾 狗榮(IG @chingyanfu)
余家溢 飾 奇行種(IG @2_ka_1)

「OASIS」莊員
唐浩然 飾 鄧學謙(IG @jackygoodog)
馬治 飾 孔兆秋(IG @machi_ma_)
凌健熙 飾  王天城(IG @alexkinhei )
李卓毅 飾 林偉強(IG  @cheuklcn)
馮心蕙 飾 莫瑞心
黎美萱 飾 Michelle(IG @_lmhmc) 
馬思敏 飾  馬文晴(IG @chloeulb)

麥可怡 飾 啞同學(IG @krincee)
張蔓姿 飾 小百合(IG @gigiicheung)
張蔓莎 飾 大蓮花(IG @sabrinasa)
鍾雪瑩 飾 Bonix(IG @ chungsaid)

責編:林偉德

編輯:Hin

編輯推薦

【方以文 | 睇乜電視啊?】保錡、智雯贏在夠真 真人騷不二法門

要真人騷好睇,除咗啲關卡或者大橋段設計得好,最重要係清楚知道節目嘅主角有咩可以sell,或者係個節目想sell啲主角嘅乜嘢。

2019-03-01 15:22

【方以文 | 睇乜電視啊?】包薪約轉兼職 對無綫藝員有咩影響?

包底薪合約藝員轉兼職嘅計劃大約由半年前開始,影響範圍廣泛,除咗甘草演員,連出道幾年嘅後生一輩都一樣有份。只不過好多藝員都冇公開講,所以大家都唔知。聽聞呢次轉合約行動持續進行中,唔知係咪轉晒啲唔係親...

2019-02-22 10:05

【方以文 | 睇乜電視啊?】無綫播劇排陣怪 全因大陸牽制

豬年到,對於鍾意睇港劇嘅觀眾嚟講真係唔太高興,無綫由19:00綫開始計,去到深夜23:50嗰套,總共5套劇,當中有三套都唔係港劇:《獨孤天下》、《皓鑭傳》、《如懿傳》,全部都係宮廷相關題材嘅大陸劇。

2019-02-15 10:14

熱門評論

已複製連結