橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】保錡、智雯贏在夠真 真人騷不二法門

文:方以文

大家睇完篇文個題目,可能會話:廢話,真人騷嘛,梗係要真啦。但諗清楚啲,唔係呀,有好多「真人騷」或者類近真人騷嘅節目,都唔夠「真」,搞到個節目一啲都唔吸引。不過近期就有兩個觀眾喜愛嘅「真人騷」節目,包括黃智雯去韓國學跳舞嘅無綫出品節目《一個因去跳舞》,仲有騎喱男子組合ERROR加監製花姐做主持去日本互相比拼嘅ViuTV出品節目《花姐ERROR遊》。

【方以文 | 睇乜電視啊?】保錡、智雯贏在夠真 真人騷不二法門

(網上圖片)

智雯 保錡 落力演出有回報

黃智雯同埋吳保錡都因為呢兩個節目備受讚揚,智雯喺失落大台視后之後,憑住呢個節目進一步加強佢喺觀眾心目中努力同埋唔怕失敗嘅形象。保錡就嚟個大逆轉,由《全民造星》到ERROR成立呢段時間,佢可以話係團隊裡面比較面目模糊嘅一個。今次靠15集節目成功突圍,建立自己嘅鮮明形象:怯得嚟又勇又好笑,終於唔使再叫佢「造星八両金」,而係叫佢做「有你有我快吞轟快吞君」。

【方以文 | 睇乜電視啊?】保錡、智雯贏在夠真 真人騷不二法門

(影片截圖)

要有真性情又有追看性

有觀眾成日話真人騷唔係真,都係設計好嘅節目,冇錯嘅,只不過我認為都有嘢係「真」,就係「真人」同佢哋嘅「真性情」。想做得好睇,就要喺「設計」同「真」之間拎到平衡,呢個就考節目製作團隊嘅功力。《一個因去跳舞》同埋《花姐ERROR遊》嘅各個挑戰環節都已經計劃好,先會有一層一層打大佬嘅感覺。做好呢一步係基本,但要真係吸引到觀眾,最重要係設計環節時已經有個目標。

真人騷要營造明確訊息

《一個因去跳舞》嘅目標好明顯係sell黃智雯不畏艱苦挑戰自己,以佢引以為榮嘅跳舞去硬撼韓團。其實未出發都知道八成會被比下去,由舞藝、體力等各方面嚟睇,都係個不可能挑戰成功嘅任務。真心,最後黃智雯拍落去韓國女團gugudan一齊跳,係唔夠跳,但呢個已經唔係重點,重點係佢明知唔夠贏都要盡力挑戰。呢個設計完全配合觀眾心中黃智雯「努力」、「肯挑戰」嘅性格,睇到個人好熱血,令黃智雯喺觀眾心中不停加分。

【方以文 | 睇乜電視啊?】保錡、智雯贏在夠真 真人騷不二法門

(影片截圖)

《MIRROR GO》失焦失色

《花姐ERROR遊》sell嘅其中一樣嘢係 ERROR嘅癡線瘋狂,仲有花姐放下權威任導演擺布挑戰任務。節目講明係「兩代人嘅比拼」,睇吓花姐代表嘅舊嗰輩勁啲,定係ERROR代表嘅新嗰輩強啲。不過好快觀眾嘅重點已經轉咗去睇佢哋五個人點樣受苦受難,集集都期待保錡嘅反應。雖然同節目開宗明義話要「展示兩代人嘅鬥爭」或者「透過比拼而了解」嘅初衷愈走愈遠(中間只係覺得導演Mike同監製花姐喺雪山上面意見不合比較貼題),但就成功為保錡建立鮮明性格。係咪節目背後原本嘅設定冇人知,但做到嘢,觀眾又睇得開心,就算係個成功嘅節目。反觀同樣係一班造星仔仔做主角嘅《MIRROR GO》就失色咗。MIRROR同ERROR一樣落足力,但節目唔係sell佢哋玩得癲,又唔係sell佢哋嘅才藝,更加冇乜sell佢哋兄弟情,定位唔好就失焦,吸引力大減。

【方以文 | 睇乜電視啊?】保錡、智雯贏在夠真 真人騷不二法門

(影片截圖)

一句到尾:要真

不過講到尾,要真人騷好睇,除咗啲關卡或者大橋段設計得好,最重要係清楚知道節目嘅主角有咩可以sell,或者係個節目想sell啲主角嘅乜嘢。黃智雯努力不懈,吳保錡搞笑癲喪,我相信都係佢哋本人嘅特色。如果唔係,製作團隊真係好出色可以包裝到呢個氣氛播出街。又或者佢哋真係非凡嘅演員,全程百份百投入做戲。但係真心唔真心,觀眾好容易隔住個mon感受到, 如果唔係之前某啲「真人騷」唔會睇到觀眾咁反感。期待將來有更多「設計好」又有「真性情」嘅真人騷節目出街。

【方以文 | 睇乜電視啊?】保錡、智雯贏在夠真 真人騷不二法門

(Instagram圖片)

責編:林偉德

編輯:Hin

編輯推薦

【方以文 | 睇乜電視啊?】包薪約轉兼職 對無綫藝員有咩影響?

包底薪合約藝員轉兼職嘅計劃大約由半年前開始,影響範圍廣泛,除咗甘草演員,連出道幾年嘅後生一輩都一樣有份。只不過好多藝員都冇公開講,所以大家都唔知。聽聞呢次轉合約行動持續進行中,唔知係咪轉晒啲唔係親...

2019-02-22 10:05

【方以文 | 睇乜電視啊?】無綫播劇排陣怪 全因大陸牽制

豬年到,對於鍾意睇港劇嘅觀眾嚟講真係唔太高興,無綫由19:00綫開始計,去到深夜23:50嗰套,總共5套劇,當中有三套都唔係港劇:《獨孤天下》、《皓鑭傳》、《如懿傳》,全部都係宮廷相關題材嘅大陸劇。

2019-02-15 10:14

【方以文 | 睇乜電視啊?】極度兒戲 勁歌頒獎禮何去何從?

近五年左右,年年都有人話《勁歌金曲頒獎典禮》不如唔好搞喇,我一直都唔係好認同。直到今年,我覺得如果再係咁嘅話,不如下年真係停一停。

2019-01-22 14:28

熱門評論

已複製連結