橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】包薪約轉兼職 對無綫藝員有咩影響?

文:方以文

最近蓋世寶Lulu姐姐傾續約被減三份一人工後決定離開無綫,又有甘草藝員(後來畀無綫照肺所以唔開名)透露自己由底薪合約轉做兼職,人工直接減九成五。無綫繼裁減唔同部門人手之後,終於都向藝員開刀。收到消息,包底薪合約藝員轉兼職嘅計劃大約由半年前開始,影響範圍廣泛,除咗甘草演員,連出道幾年嘅後生一輩都一樣有份。只不過好多藝員都冇公開講,所以大家都唔知。聽聞呢次轉合約行動持續進行中,唔知係咪轉晒啲唔係親生仔女嘅藝員做兼職先肯停手。

【方以文 | 睇乜電視啊?】包薪約轉兼職 對無綫藝員有咩影響?

(資料圖片)

收入不穩 演出機會減

由包底薪合約轉做兼職,對藝員嘅影響除咗係收入變得唔穩定之外,仲會少咗出鏡機會。以往監製可以查到有邊啲包底薪藝員唔夠合約寫明嘅出鏡率,部分好人嘅監製會搵佢哋做嘢,同時平衡吓公司嘅利益,話晒都簽咗約唔用就嘥。如果連呢個「畀佢還show去check吓list」嘅概念都冇埋,呢班藝員就連最後一個畀監製記起嘅機會都消失,開工機會必定大減。喺依家無綫財政緊縮嘅情況下,到製作組真係搵兼職藝員去做嘢時,或者又會有人問點解唔搵咗「自己人」先,兼職藝人嘅情況可想而知係幾咁差。

條款照舊 禁止出現他台

包底薪嘅藝員轉做兼職,或者你會諗咁都好呀,「放生」佢哋,可以去唔同電視台發展。但原來合約條款係無變過,仍然禁止佢哋出現喺其他電視台。就算之後唔知做乜突然「放寬」都好,前提係無綫真係唔介意先得。如果唔係,兼職藝員喺其他台亮相,無綫就唔用你,條數都係一樣。

【方以文 | 睇乜電視啊?】包薪約轉兼職 對無綫藝員有咩影響?

(網上圖片)

自求多福難過登天

「放生」呢個概念,  對於一啲已經建立咗知名度的藝員嚟講,某程度合理。但如果佢哋只係想喺香港打工,以現時嘅環境,幾個台加埋嘅開工量都冇乜可能食到咁多藝員。如果係一啲剛剛起步嘅藝員,知名度唔夠,就更加要自求多福。咁自己拍片得唔得呢?首先大家唔好睇少自製自播嘅工作量,又唔好睇高個回報率(藝員都係人都要食飯)。現實情況就更加唔係個個有製作才能,就算集編導演拍剪能力於一身,冇咗無綫呢個大平台,要建立知名度就步步艱辛,阻礙演員嘅向上流動。

加劇演員陣容單一化

好喇,講咗咁耐,身為觀眾嘅可能會問關我咩事啫?咪一樣有節目睇。又啱嘅,節目照播,有部分觀眾真係唔會理係邊個做、做啲乜,有畫面有聲音就okay。但如果你睇嚟睇去都係同一班演員呢?無綫到依家都繼續抱住「我捧邊個就個個節目都見到佢」嘅方法去運作,如果大部份藝員都轉咗做兼職,用「自己人」為先,呢個情況只會愈來愈嚴重。劇集、遊戲、資訊節目,全部都係同一班藝員,睇到你嘔都唔會轉。

【方以文 | 睇乜電視啊?】包薪約轉兼職 對無綫藝員有咩影響?

(Instagram圖片)

電視台唔以節目為核心不如唔好搞啦

無綫係商業機構,開源節流係好正常。眼見無綫最近賣廣告,話可以幫你一站式搞event,又可以用$ 3,500一日嘅低價賣廣告,大雞開始食細米,仲要愈來愈唔關電視製作事,都feel到佢真係幾唔掂。無綫手持嘅超過8億港元高息「星美」債券似乎已經注定係爛局,要節流開源自救就乜都做得出。只不過如果做嘅決定會影響自己往後嘅發展,就實屬不智。希望高層們好好諗吓,優質嘅電視節目先係無綫最強嘅賣點,賣去大灣區大陸可以,賣去亞洲歐美其他地方更好。以高質電視節目面向全世界,唔再集中喺處處有掣肘嘅巿場,做好製作節目嘅份內事,同時做有益於長遠發展嘅嘢,先係上上之策。

【方以文 | 睇乜電視啊?】包薪約轉兼職 對無綫藝員有咩影響?

(星島日報圖片)

責編:林偉德

編輯:Hin

編輯推薦

【方以文 | 睇乜電視啊?】無綫播劇排陣怪 全因大陸牽制

豬年到,對於鍾意睇港劇嘅觀眾嚟講真係唔太高興,無綫由19:00綫開始計,去到深夜23:50嗰套,總共5套劇,當中有三套都唔係港劇:《獨孤天下》、《皓鑭傳》、《如懿傳》,全部都係宮廷相關題材嘅大陸劇。

2019-02-15 10:14

【方以文 | 睇乜電視啊?】極度兒戲 勁歌頒獎禮何去何從?

近五年左右,年年都有人話《勁歌金曲頒獎典禮》不如唔好搞喇,我一直都唔係好認同。直到今年,我覺得如果再係咁嘅話,不如下年真係停一停。

2019-01-22 14:28

【方以文 | 睇乜電視啊?】張衞健的啟示 大台創作演員去晒邊?

30集《大帥哥》播完,觀眾反應好好,已公布嘅收視都保持喺25點以上,劇中各個主要角色都爆出咁濟,就算套劇做唔到50同51周年台慶劇,氣勢都係一時無兩,爭返啖氣。當然, 一眾主要角色仲有配角們做得好,都要個靈...

2019-01-16 09:19

熱門評論

已複製連結