橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】無綫播劇排陣怪 全因大陸牽制

文:方以文

豬年到,對於鍾意睇港劇嘅觀眾嚟講真係唔太高興,ViuTV播完新鮮有活力嘅《做演藝嘅》就停咗播港劇。FOX投資嘅《心冤》唔錯但係要畀錢睇,即係唔係個個有得睇。無綫呢?由19:00綫開始計,去到深夜23:50嗰套,總共5套劇,當中有三套都唔係港劇:《獨孤天下》、《皓鑭傳》、《如懿傳》,全部都係宮廷相關題材嘅大陸劇。

三線古裝愛情劇

百貨應百客,一定有觀眾鍾意睇大陸古裝宮廷劇。但係咁嘅排陣係勁失敗,因為就算觀眾幾鍾意都好,普通人一日應該花唔起兩個半鐘時間睇電視,而且三套咁啱都係愛情故事,睇晒都真係要有非人能力。古裝、愛情、宮廷、大陸劇,四個元素,只要你唔鍾意其中一個元素,就三套都唔使睇。

【方以文 | 睇乜電視啊?】無綫播劇排陣怪 全因大陸牽制

(微博圖片)

一切從《延禧攻略》開始

最理想嘅布陣方法當然係分散投資,幾線劇唔同種類就完美。雖則話今時今日,無綫嘅劇種愈來愈穩陣欠新意,但要將五線劇個陣排好啲,應該係冇乜問題。今次農曆年前排呢個咁嘅陣勢,估計係趁農曆年呢個「傳統」收視低迷時期散咗啲舊貨(呢個「傳統觀念」又係值得商椎,另議),播咗《如懿傳》同《獨孤天下》佢,當中尤其係幾集幾集播咁嘅《如懿傳》最有散貨味道。但點解呢兩套劇要放咁耐先播呢?就要由上年紅到飛天嘅《延禧攻略》開始講起。

【方以文 | 睇乜電視啊?】無綫播劇排陣怪 全因大陸牽制

(微博圖片)

無綫等大陸播放日期

無綫一早買咗《延禧攻略》、《獨孤天下》、《如懿傳》嘅香港播放權,為咗配合大陸一齊播,無綫唯有等,睇吓邊部電視劇可以率先過到大陸審批,先可以開始排邊個播先邊個播後(當然無綫出得起錢嘅話,可以傾獨家首播,但一個有自製劇集嘅電視台要做到呢步真係情何以堪)。

抽起《獨孤天下》

等了又等,就只係得牌面最弱嘅《獨孤天下》批咗,可以喺2018年2月尾播,另外兩套等到頸都長都冇消息。無綫只好揀《獨孤天下》播,有傳仲搵咗吳若希錄埋主題曲。但就喺呢個時候,《延禧攻略》終於過咗審批,喺2018年7 月中首播。無綫睇《延禧攻略》高一線,決定抽起《獨孤天下》改播《延禧攻略》。主題曲趕唔切錄第二首,又冇貨喺手,本來為《獨孤天下》寫嘅主題曲就轉咗畀《延禧攻略》用,即係大家聽到嘅《無常春秋》。「留名頌千秋,無懼犠牲所有」其實唔關魏瓔珞事,皆因寫嘅係獨孤伽儸。

【方以文 | 睇乜電視啊?】無綫播劇排陣怪 全因大陸牽制

(微博圖片)

《延禧》《如懿》撞到應

《延禧攻略》喺8 月6日開始喺免費台播出街之後冇耐,騰訊同埋東方衛視終於傾掂數,《如懿傳》喺8月20日喺大陸首播。估計無綫因為兩套劇嘅故事背景人物角色一樣,只係一個以令妃為主軸、一個由嫻妃做主軸,再加上《延禧攻略》大熱,無綫最後決定《如懿傳》喺OTT播咗先,唔喺免費台播住,怕幾乎重複嘅故事背景會趕走觀眾,令收視喺台慶月前插水。

【方以文 | 睇乜電視啊?】無綫播劇排陣怪 全因大陸牽制

(微博圖片)

農曆年假成都好散貨時機

一拖再拖,兩套劇就留咗喺手,要搵比較好嘅播放機會就係農曆年假期,因為收視好可以認叻,收視唔好就可以話農曆年假冇人睇電視。唔知無綫好彩定唔好彩,《皓鑭傳》又喺呢個時候批咗,為咗觀眾唔好用自己方法去睇咗先,影響喺電視播放時嘅收視,無綫要快快播,咁就形成咗依家五線劇當中有三套劇種類型近似嘅情況。

合拍片同樣受審批影響

其實除咗外購陸劇,合拍片都受到大陸審批嘅影響。2018年做晒宣傳話會喺Amazing Summer播嘅《再創世紀》,就因為過唔到大陸審批要押後播放。搞到郭晉安同楊怡返電視城做晒宣傳但係就未播得,成件事都幾尷尬,反映咗無綫喺播放安排上受到大陸審批嘅影響係幾咁大。喺網絡通行嘅年代,遲過人少少播真係好蝕底,隨時唔見幾點收視。審批權唔喺手,無綫只好亦步亦趨,大陸話幾時播得,佢就盡量跟住播。

【方以文 | 睇乜電視啊?】無綫播劇排陣怪 全因大陸牽制

(微博圖片)

混亂情況未見改善機會

以目前嘅情況嚟講,無綫因為冇咗自主權又要搶頭啖湯播放之下而形成嘅「無策略排陣」冇乜辦法可以改善,隨時仲會愈來愈多。因為無綫之前話過會將合拍片嘅比例提升至整體製作劇集量嘅25%,呢個數仲冇講明包唔包括一樣會受到大陸審批影響嘅「同步播放劇」,亦都未計外購陸劇。

ViuTV呢?你哋做緊乜呀?仲唔趁呢段時間出招?等乜?

責編:林偉德

編輯:Hin

編輯推薦

【方以文 | 睇乜電視啊?】極度兒戲 勁歌頒獎禮何去何從?

近五年左右,年年都有人話《勁歌金曲頒獎典禮》不如唔好搞喇,我一直都唔係好認同。直到今年,我覺得如果再係咁嘅話,不如下年真係停一停。

2019-01-22 14:28

【方以文 | 睇乜電視啊?】張衞健的啟示 大台創作演員去晒邊?

30集《大帥哥》播完,觀眾反應好好,已公布嘅收視都保持喺25點以上,劇中各個主要角色都爆出咁濟,就算套劇做唔到50同51周年台慶劇,氣勢都係一時無兩,爭返啖氣。當然, 一眾主要角色仲有配角們做得好,都要個靈...

2019-01-16 09:19

【方以文 | 睇乜電視啊?】2018香港電視大事回顧

2018年完結,香港電視界喺呢一年少咗早幾年有新電視台加入嘅衝擊,但都可以話係風起雲湧。大台裁員加星美債務風波,ViuTV播世界盃同《全民造星》,港台爆出《火速救兵IV》,奇妙變身開電視。趁2019年剛剛嚟到,我...

2019-01-07 09:52

熱門評論

已複製連結