橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】極度兒戲 勁歌頒獎禮何去何從?

文:方以文

近五年左右,年年都有人話《勁歌金曲頒獎典禮》不如唔好搞喇,我一直都唔係好認同。直到今年,我覺得如果再係咁嘅話,不如下年真係停一停。

【方以文 | 睇乜電視啊?】極度兒戲 勁歌頒獎禮何去何從?

(網上圖片)

好多人話想佢停辦,原因係「勁歌」已經冇代表性,啲獎永遠只係頒畀星夢、英皇、星娛樂嘅自己人同埋友好音樂公司。但其實每個音樂頒獎典禮嘅搞手都有自己嘅偏好,就算係好多歌迷期待嘅商台《叱咤樂壇流行榜頒獎典禮》都好,有某啲歌手嘅歌就算幾紅都好,你都唔會見到佢上叱咤台。點解?咁當然係關佢嘅歌喺商台嘅播放次數事,但背後話事嘅咪又係商台高層。若然好似新城咁普天同慶個個有獎,又會畀歌迷笑佢大贈送。最理想嘅,當然係等古生話會搞嘅嗰個跨黨派跨台頒獎禮啦,到時有冇人因為賽果唔啱心水而杯葛就係後話。

【方以文 | 睇乜電視啊?】極度兒戲 勁歌頒獎禮何去何從?

(影片截圖)

睇《勁歌》只睇來年資源分布

所以我近年睇《勁歌金曲頒獎典禮》,係睇嗰幾間自己人加友好公司旗下歌手之間嘅較量,邊個拎獎就間接代表下一年嘅形勢會好啲,就會有多啲資源去做音樂做宣傳。另外就係睇個騷本身,畢竟成幾個小時嘅音樂節目真係買少見少,歌手上嚟拎獎同表演,當係做個年度總結,都係一件好事嚟。我相信無論係邊間公司嘅歌手,如果付出過努力嘅話,都值得有呢個機會。雖然坦白講今年頒獎畀阿田同定欣時,我都真係呆咗半秒。

【方以文 | 睇乜電視啊?】極度兒戲 勁歌頒獎禮何去何從?

(影片截圖)

詼諧欠莊重 嘉賓身份不相稱

以上條件情況不變,點解我話想勁歌頒獎禮下年停吓呢?係因為《2018年度勁歌金曲頒獎典禮》畀我嘅感覺好兒戲。全晚節奏勁趕,好似想快啲頒晒啲獎就算數。呢啲大騷嘅主持人理應係莊諧並重,但係當晚主持人們嘅表現只係詼諧而不莊重。語速快係其中一個原因,一啲無關痛癢嘅玩笑更加令到氣氛一再變得兒戲,例如係Mayanne講英文嗰個「笑位」。呢個情況唔只係今年發生,上年嘅情況都不相伯仲。如果你話兩年嚟六位主持當中,都冇一個人做到莊重,我唔係好相信,所以問題我諗出咗喺節目製作人嘅取向。

另外,頒獎嘉賓搵家燕姐同修哥係令人搲頭,雖然佢哋係重量級前輩,但同樂壇有咩關係?搵王祖藍就更加係不智,我諗唔到點解佢可以頒獎。就算佢套賀歲歌舞片真係拍到曉飛,可以令到樂壇有新氣象,都應該係等佢上咗畫,等下一年佢先做嘉賓,而唔係今年。要宣傳套戲,都唔係搵《勁歌》嚟咁玩法。

【方以文 | 睇乜電視啊?】極度兒戲 勁歌頒獎禮何去何從?

(影片截圖)

自己友都唔尊重個騷

仲有一樣嘢我覺得係致命傷,令到個頒獎典禮更加兒戲。部分坐第一排嘅歌手,由頒獎典禮中段開始,鏡頭每次take到佢哋,都係笑緊。當然無人知道佢哋笑緊乜,但次次都見到佢哋喪笑,我作為觀眾感覺到嘅,就係佢哋唔尊重個頒獎典禮。最令人諗唔明嘅係呢一班都係星夢歌手,點解自己個騷都唔識得好好控制吓自己?適當時候做適當嘅嘢,係普通社交禮儀嚟。無論你覺得當時係幾咁好笑,都應該要睇場合,控制吓自己嘅情緒。都唔好話鏡頭面前唔應該咁做,就算係鏡頭後面都唔應該咁做啦係咪?

【方以文 | 睇乜電視啊?】極度兒戲 勁歌頒獎禮何去何從?

(影片截圖)

「勁歌」毁滅 點捧自己人?

KingJer話,2008年係《勁歌金曲頒獎典禮》嘅分水嶺,當年除咗有關心妍事件、陳奕迅黃宗澤對唱嘅經典場面之外,仲係跨公司一線歌手出席嘅最後一年。十年之後嘅2018年,我覺得都係一個分水嶺,《勁歌金曲頒獎典禮》變得極度兒戲。如果下年繼續搞,請幕後人員用心啲,請台前人員留心啲。一係就令佢變得隆重,去返一個頒獎典禮應該要有嘅莊重水平。一係就令佢真正變成年尾歌手Party,大家上嚟開心吓、表演吓唱吓歌,做得好睇都應該係一件賞心樂事。如果繼續照今年咁嘅玩法,方向未明,就只會令到「勁歌金曲」呢個名,喺價值成疑嘅今日,更進一步被人睇小、被人取笑。

【方以文 | 睇乜電視啊?】極度兒戲 勁歌頒獎禮何去何從?

(影片截圖)

或者話事嘅人已經唔care「勁歌金曲」呢個牌匾,佢哋只係一心想用盡「勁歌」嚟捧自己人。捧自己人上位係完全理解,唔通真係益甚他人咩?但有冇諗過,依家連捧人嘅基礎都畀你哋搞到爛成咁,你仲可以做到啲乜?

責編:林偉德

編輯:Hin

編輯推薦

【方以文 | 睇乜電視啊?】張衞健的啟示 大台創作演員去晒邊?

30集《大帥哥》播完,觀眾反應好好,已公布嘅收視都保持喺25點以上,劇中各個主要角色都爆出咁濟,就算套劇做唔到50同51周年台慶劇,氣勢都係一時無兩,爭返啖氣。當然, 一眾主要角色仲有配角們做得好,都要個靈...

2019-01-16 09:19

【方以文 | 睇乜電視啊?】2018香港電視大事回顧

2018年完結,香港電視界喺呢一年少咗早幾年有新電視台加入嘅衝擊,但都可以話係風起雲湧。大台裁員加星美債務風波,ViuTV播世界盃同《全民造星》,港台爆出《火速救兵IV》,奇妙變身開電視。趁2019年剛剛嚟到,我...

2019-01-07 09:52

【方以文 | 睇乜電視啊?】《是咁的,法官閣下》破舊立新

今年三套台慶劇嚟講,我覺得《是咁的,法官閣下》最有啟發性,希望喺結局周可以贏口碑又贏收視啦。

2018-11-28 10:15

熱門評論

已複製連結