橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】2018香港電視大事回顧

文:方以文

2018年完結,香港電視界喺呢一年少咗早幾年有新電視台加入嘅衝擊,但都可以話係風起雲湧。大台裁員加星美債務風波,ViuTV播世界盃同《全民造星》,港台爆出《火速救兵IV》,奇妙變身開電視。趁2019年剛剛嚟到,我哋一齊回顧吓2018年香港電視界發生咩大事。

放寬植入式廣告 BigBigShop登場

7月尾,通訊局宣布放寬電視節目植入廣告規範,除咗新聞、時事、兒童、教育、宗教節目之外,只要「自然不突兀」以及喺節目播放前向觀眾發出「節目含有間接宣傳」嘅訊息,就可以喺節目裏面植入廣告。

坊間反應不一,有觀眾堅拒植入,亦有人認為電視台都要搵錢先可以繼續拍節目,只要唔太阻住節目運作就可以。雖然「唔太阻住」同埋「自然不突兀」都係見仁見智冇明確標準,不過通訊局開咗綠燈,電視台就梗係開車。無綫5月推出嘅手機程式購物平台「Big Big Shop」就同唔少節目合作:肥媽《食平D》推食物、《大灣區活好D》推大灣區旅遊、《阿爺廚房》推鼎爺把刀、由《都巿閒情》變成嘅《流行都巿》就乜都推咁濟。除咗明刀明槍,仲有賣緊廣告但唔話你知嘅《東張西望》、《今期流行》、《港生活‧港享受》。都係嗰句,睇電視同做人一樣,眼見未為真,見到咩都要自己思考下,咁就百利而無一害。

【方以文 | 睇乜電視啊?】2018香港電視大事回顧

(影片截圖)

無綫周播劇斷斷續續 「方以因」「衛斯理」天堂與地獄

無綫周播劇一時周六播一時周日播,有時周六日都播,唔播又得,一片混亂。不過喺唔少觀眾都開始習慣用app去睇電視時,播放時間改變造成嘅影響愈來愈低,尤其係好劇,唔太受影響。2月開始喺周日播嘅《三個女人一個「因」》,黃智雯演繹有三個人格嘅女主角,就有好多人捧場,仲成為大台視后大熱之一,平均收視有19.2點。

【方以文 | 睇乜電視啊?】2018香港電視大事回顧

(影片截圖)

不過同樣時間,如果放套爛劇,就由天堂變成地獄。卡士強勁嘅《冒險王衛斯理》系列,喺周日播放,開頭《支離人》都支持得住有平均17.4收視。但之後接力嘅《藍血人》就平均得返13點,最低跌到去12點,成為全年暫時最低收視劇集。傳聞播放當中嘅《救妻同學會》收視低到可以同《藍血人》相比,但要播晒先知佢唔會唔會後段發力追上。

【方以文 | 睇乜電視啊?】2018香港電視大事回顧

(影片截圖)

ViuTV世界盃虛火 劇線變來變去

2018世界盃年,ViuTV搶到俄羅斯世界盃播放權,錄得開台以來最高收視,決賽平均有成24.4點,最高衝到去26.6點,205萬人收睇。無綫喺直播賽事時段捱打,收視受挫,決賽當日正面交鋒嘅《晚間新聞》跌到平均4點,重播嘅《刑事偵緝檔案IV》平均得2點。不過呢個氣勢隨住世界盃落幕就告一段落,維持唔到,好快啲觀眾就流返去無綫。

【方以文 | 睇乜電視啊?】2018香港電視大事回顧

(資料圖片)

劇線方面,ViuTV年初停咗播劇,3月尾復播,由《VR驅魔人》打頭陣,放咗喺22:00 – 22:30播放,之後就因應世界盃而停咗,直到7月先播返劇,但時間就一改再改,變咗23:30 – 00:00。ViuTV不停變陣,似乎想搵個好位。趁住未有咁多嘅「慣性觀眾」去試都無可厚非,但宣傳方面真係不足,喺自己平台宣傳之外,要再做多啲外面嘅宣傳先得。畢竟大家開住電視睇無綫嘅時間仍然係多,一係就熄咗電視。想學無綫喺自己平台播廣告收到成效的話,係個錯誤嚟。另外,劇集質素始終係好參差,要連續有好嘢睇,先可以搶返啲收視。

ViuTV製作Goodnight Show品牌 《全民造星》最成功

今年年初,ViuTV推出綜藝品牌「Goodnight Show」,配合世界盃做咗《全民星戰》、《全民睇波派對》兩個節目,不過大部分觀眾都嫌悶,就算派錢都做唔到個勢出嚟。 直至到香港觀眾久違嘅選秀節目《全民造星》出現,「Goodnight Show」呢個品牌就變咗做「皇牌」,就算做唔到「全民」一齊睇,就算節目初期毒舌引起嘅反彈,但似乎香港觀眾都知道有呢個節目,甚至未睇過個節目都識姜濤,成為咗ViuTV喺2018年最多人關注同討論嘅節目,就連周慧敏都集集睇,仲做埋總決賽嘅評判。一班仔仔最後組成咗MIRROR同埋ERROR兩隊組合,成為ViuTV力捧藝員,2019年會繼續見到佢哋。

【方以文 | 睇乜電視啊?】2018香港電視大事回顧

(Instagram圖片)

不過《全民造星》嘅氣勢同世界盃一樣,轉眼即逝,之後接力嘅《廣告女王》、《發洩擂台》都承接唔到氣勢。「Goodnight Show」更加由全綜藝節目,加咗《個個得把口》呢個清談節目,令人覺得方向混亂。到底係咪要等到《全民造星 第二季》先可以再爆起呢?

無綫體育組 有線娛樂組解散

2018年,無綫裁員風波由TVBI開始,各個部門人心惶惶,觀眾見到最大嘅改變就係長壽體育節目《體育世界》連同體育組喺7月消失,取以代之嘅係由新聞部製作、喺85台播放嘅《體育新世界》。除此之外,有部分幕後部門都收到裁員或者自動流失嘅惡耗。除咗無綫,有線都有部門全體起身,娛樂新聞部全體解散,全數外判。由有線首創嘅24小時不停播娛樂新聞、主播坐枱報道嘅方法,經過多次轉型始終要接受消失嘅命運。有線除咗娛樂新聞組,體育台都難逃整頓,有傳多個節目都已經外判。

【方以文 | 睇乜電視啊?】2018香港電視大事回顧

(網上圖片)

《TVB周刊》停刊 結束21年出版歷史

2017年《有線電視月刊》停刊,2018年到《TVB周刊》停刊。無綫開台就出版官方刊物《香港電視》,報道無綫自家消息,成為電視迷嘅必讀讀物。1997年,無綫創立《TVB周刊》取代《香港電視》。2018年10月1日,《TVB周刊》出版最後一期、第1110期實體版,結束21年出版歷史。TVB一度公布《TVB周刊》會轉做網上版,但至今都唔見影。但係另一邊廂,亞視OTT平台就出版咗自己嘅周刊,真係亞視永恆。

【方以文 | 睇乜電視啊?】2018香港電視大事回顧

(Facebook圖片)

奇妙改名開電視 ATV HKTV節目助攻

1月29日,亞洲電視以OTT平台形式復活開台,製作少量節目。10月27日,奇妙電視正式改名做「香港開電視」,除咗繼續播放由香港電視製作、喺免費電視台首播嘅舊劇同埋資訊節目之外,仲同ATV合作,同步播放ATV製作嘅部分節目,包括咗《香港追擊搜》、《亞洲小姐競選2018》。喺有限資源之下,香港開電視採取吸納又互惠嘅政策,可惜令到自己嘅品牌愈來愈模糊,長遠咁做只會畀人覺得77台係一個播放平台,而唔係一間有自己character嘅電視台。

【方以文 | 睇乜電視啊?】2018香港電視大事回顧

(影片截圖)

無綫力谷新人上位 救護消防宮鬥劇今年最搶

一直畀觀眾話新舊交替緩慢嘅無綫,今年台慶盡地一煲,三套台慶劇都着力去谷新人。當中以《跳躍生命線》、《是咁的,法官閣下》尤其明顯,有資歷經驗嘅演員同埋新一批演員嘅戲份可以話係平分咁濟。三套劇嘅新一批演員都食得住個勢,認知度同埋討論度都上升,無綫今次似乎策略成功。

【方以文 | 睇乜電視啊?】2018香港電視大事回顧

(網上圖片)

另外,今年可以話係救護消防片,同埋宮廷片嘅天下。無綫《跳躍生命線》同埋港台《火速救兵IV》連環播放,再加埋消防處吉祥物「任何仁」嘅出現,令到下半年劇集題材甚至係網上嘅焦點都離唔開消防同救護。另外,《延禧攻略》掀起一股熱潮,收視報捷。好多觀眾睇收視數字,都以為《延禧攻略》係今年度最高收視劇集。但要留意嘅係《延禧攻略》嘅收視係計埋喺免費電視播之前OTT平台嘅點擊率。如果減咗呢啲一點擊率,《跳躍生命線》就係2018年收視王者。亦都提醒咗我哋,以後如果睇收視,真係要小心啲。

【方以文 | 睇乜電視啊?】2018香港電視大事回顧

(微博圖片)

無綫吃喝玩樂  ViuTV年尾再推實況娛樂

無綫今年嘅非戲劇節目繼續吃喝玩樂為主,旅行、煮食、唱歌、遊戲,滿足大家嘅視聽之娛。如果講有insight啲嘅節目,無綫可能就只有陳貝兒嘅《嫁到這世界邊端2》、田蕊妮嘅《女人四十》。77台香港開電視有項明生嘅《明治憑甚麼》搶返少少討論度,不過有部分網民就話佢啲有關日本傳統嘅資訊唔係咁正確,孰是孰非留返大家判斷。ViuTV方面,開台時主攻嘅「實況娛樂」隨住《跟住矛盾去旅行2》胎死腹中而漸漸被觀眾同埋ViuTV自己遺忘,不過年尾播放嘅《人住公屋 我住公屋》就成功召喚返一班關心香港現況嘅觀眾返嚟,唔知2019年,仲有冇呢啲明刀明槍唔擦邊球嘅節目呢?

【方以文 | 睇乜電視啊?】2018香港電視大事回顧

(影片截圖)

大小姐得最佳女配角 無綫開始着重民意?

《萬千星輝頒獎典禮》雖然係無綫一台自己玩晒,但喺香港電視業仲係無綫領導嘅情況之下,佢搞嘅頒獎典禮依然係有一定份量。幾乎每個得獎者都有人支持有人唔okay,但林淑敏憑住《愛‧回家之開心速遞》龍力蓮一角得到「最佳女配角」,就普天同慶個個開香檳,成為近年憑處境劇得獎嘅唯一一個演員(上次已經要數到2000年《男親女愛》,Do姐拎視后)。有人話無綫終於都肯順從民意,但我認為民意於無綫仍舊如浮雲。

【方以文 | 睇乜電視啊?】2018香港電視大事回顧

(影片截圖)

無綫星美危機現形 內部分歧

無綫購入星美股控總共超過8億港元高息債,半年之後就遇到星美爆煲嘅危機,8億隨時凍過水,仲要嘔凸。TVB高層對於點處理星美呢個無底深潭未有共識,有報道指「殼王」陳國強為首嘅部分高層支持接受以星美內地電影院線作為抵債,但另一批高層就認為星美內地電影院線可能有其他問題,接受咗都未必有用,可能仲要投資一筆鉅額去執返好佢。睇返星美自己公布嘅資料,星美欠薪欠租欠版權費共超過4億,320間戲院當中有140間已經短暫停止營業。無綫最後救唔救星美,今次都應該元氣大傷,會唔會影響製作質素呢?就要放長雙眼睇。似乎向外尋求製作資源,拍合拍片嘅情況,應該會愈來愈多。

責編:林偉德

編輯:Hin

編輯推薦

【方以文 | 睇乜電視啊?】《是咁的,法官閣下》破舊立新

今年三套台慶劇嚟講,我覺得《是咁的,法官閣下》最有啟發性,希望喺結局周可以贏口碑又贏收視啦。

2018-11-28 10:15

【方以文 | 睇乜電視啊?】夜晚4小時劇線成形 ViuTV避無可避

10月27日,奇妙變身做「香港開電視」,推出新嘅綜藝資訊節目,當中由志雲大師主持嘅《志雲拆局》同埋項明生主持嘅《明治憑甚麼》得到觀眾嘅支持,成為咗討論度最高嘅77台節目。喺無綫同埋ViuTV周末冇乜睇頭嘅時候...

2018-11-12 09:37

【方以文 | 睇乜電視啊?】2018年台慶劇 無綫力谷二三梯隊上位

不過我認為好睇就得,卡士都係其次。眼見近年咁多套大卡士、大製作都令人失望,依家見到大卡士加埋強宣傳,個心都怯一怯。

2018-10-10 18:06

熱門評論

已複製連結