橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】生神仙

文:珍寶豬

有日一位小姐嚟到診所。

佢行埋嚟登記處嗌:「喂,問你嘢呀」

問人嘢咁嘅聲氣嘅咩?

我:「要睇醫生嘅就登記,係睇醫生嘅麻煩你俾身分證我先呀」

佢:「你哋醫生PRO唔PRO呀?」

一定專業過你。

我:「我哋醫生係註冊西醫,你可以睇吓掛咗喺度嘅證書先」

【診所低能奇觀】生神仙

(視覺中國圖片)

佢望望堆證書:「都唔知佢寫咩,咁即係佢醫開啲咩呀?PRO喺邊呀?吓?」

我:「你想睇啲咩呀?」

佢:「我話埋俾你知睇啲咩嘅咩?」

我:「你可以入房先同醫生講嘅,你俾身分證我登記先啦」

佢:「阿小姐呀?定嗌你姑娘呀應該?」

我:「隨便你~」

佢:「我平時唔係睇開西醫㗎,我唔知西醫原來係要我講埋俾佢知我有咩唔舒服㗎囉」

你係咪睇開獸醫呀?一嚟就做個驗血全餐先?

我:「你大概講你係咩事需要嚟睇醫生,有邊度覺得唔舒服講俾醫生知就得㗎啦~」

佢:「我講得嚟我做埋醫生都得啦,駛咩睇呀下你話係咪?」

你可以選擇唔睇嘅,我又冇鎖門,又冇拎住枝槍大嗌『家陣你睇唔睇呀?唔睇?我一槍射L爆你個頭呀!』

我:「咁你係咪有需要睇醫生呀?」

佢:「我冇需要我唔駛入嚟啦下你話係咪?我係唔舒服呀,我自己唔知邊度唔舒服㗎邊度有事㗎?你呢度睇唔睇到我咩事呀下你話?」

冇得醫㗎啦,直接去槍斃啦。

我:「…咁你係因咩事覺得自己要睇醫生呀?」

佢:「唔舒服囉咪講咗囉」

我:「邊度覺得唔舒服呀?」

佢:「我知我唔駛嚟啦」

【診所低能奇觀】生神仙

(資料圖片)

我:「你平時睇開邊位醫生呀?不如你去搵返佢啦」

佢:「嗰個生神仙,佢去做咗神仙啦!」

我都想早日升仙脫離苦道呀~生神仙你可唔可以帶埋佢走呀?

我:「…我哋西醫就唔同生神仙嘅,你要講俾醫生知有咩唔舒服先可以幫到你,如果唔係我哋可能要同你逐樣檢查,身體檢查收費都係逐項咁加收費…你要唔要睇呀?」

佢:「唔怪得生神仙話你哋啲西醫廢!醫唔到人㗎!」

我:「….」

佢企咗喺度,同我你眼望我眼。

我:「你仲係咪要睇醫生呀?」

佢:「點睇啫?廢到咁?」

我:「咁你企喺度做咩呀?我仲有咩幫到你呀?」

佢講咗句『都廢嘅!』,轉身離開診所。

死咗一個生神仙,仲有其他生神仙㗎嘛,搵其他咪得囉~

責編:林偉德

編輯:Hin

編輯推薦

【診所低能奇觀】拮完要放假

叔叔:「平時醫生淨係開一日病假俾我,我俾佢拮吓就有幾日假放?係咪咁呀?」

2018-12-06 10:15

【診所低能奇觀】壓力測試

佢:「即係我而家啲大便幼咗都可以check到係咪我個肛門壓力太大?」

2018-11-23 14:18

【診所低能奇觀】借廁所

阿姨見軟嘅唔得,嚟個硬嘅,佢拍枱:「哈!好呀!我哋一齊喺度瀨囉!」

2018-11-07 09:14

熱門評論

已複製連結