橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《是咁的,法官閣下》破舊立新

文:方以文 
  
台慶劇《是咁的,法官閣下》喺今個星期踏入尾聲,雖然收視暫時都追唔到另一套台慶劇《跳躍生命線》,但係觀眾對呢套劇嘅關注一啲都唔少,仲成功令到一眾後生演員入晒屋。黃智賢、關禮傑嘅互動非常有趣,兩個人實力再受肯定。王君馨亦憑住同黃智賢喺庭上對質「同唔同意」嘅一幕,令到Ophelia成為佢繼《城寨英雄》花曼、《心理追兇》汪海澄之後又一代表作。
    
【方以文 | 睇乜電視啊?】《是咁的,法官閣下》破舊立新

(圖:TVB)

監製陳耀全、編審李茜接受訪問時提過,佢哋搵演員唔係計佢有冇名氣,而係計佢係咪fit個角色,有部分角色甚至寫嗰時已經諗住搵邊位演員去演。拍出嚟嘅效果有目共睹,非常自然,演員之間嘅交流火花提高咗套劇嘅追看性,亦都畀咗個空間套劇去試一個與別不同嘅風格。
  
劇種風格難定義
  
喺套劇一開始播嘅時候,好多觀眾包括我都要去適應,因為個節奏同結構都係非一般。我喺自己個page度同觀眾討論,到底《是咁的,法官閣下》係咩劇種?有人話好似處境劇,因為輕輕鬆鬆。但講講吓又唔係太似,因為處境劇好多時一個個單元咁去,而呢套劇啲case有長有短,最長嗰part拉布大狀可以滲足六七集。有人話係時代劇,都係嘅,宣傳時都開宗名義話會好貼近社會現況,而出嚟都有反映呢幾年香港嘅情況,不過都不足以形容到呢套劇嗰個特別嘅質感。
  
打破「傳統」人物設定
  
【方以文 | 睇乜電視啊?】《是咁的,法官閣下》破舊立新

(圖:TVB)

有咩咁特別呢?套劇嘅角色設定已經好神奇,無論係資深嗰班律師,定係後生嗰班律師,冇一個係為咗維持司法健全而不顧一切嘅熱血角色:有人因為滿足屋企人而hea住去做大律師,有人因為想做大律師喺社會向上流動,有人因為男女平等work life balance而辭職,最重要係咁多個人都冇個性格係衝動嘅,個個都滋油淡定,當中仲有一個係蠢嘅。唔見晒大台慣有嘅人設套路,為律政劇個個角色都係精英嘅「傳統」設計鬆綁。
  
沒有大對立的奇怪劇集
  
【方以文 | 睇乜電視啊?】《是咁的,法官閣下》破舊立新

(圖:TVB)

無綫嘅「傳統」角色設計,仲會寫幾個人物,各有唔同嘅鮮明立場,放佢哋喺一齊,就好自然會有事發生。但係呢套律政劇,冇人講過自己要捍衛法治,冇人做大反派要整冧個司法制度,冇咗「傳統」律政劇戲軌,仲要啲控辯雙方當事人唔係大奸大惡或者極度值得同情,冇「衝突」又冇死人冧樓,但呢套劇依然可以拉住觀眾繼續睇。好多觀眾都話唔知點解睇完一集好似冇乜事發生,但又好想睇下一集,中咗毒咁。原因係呢套劇打斷咗case與case之間嘅框架,人物變化推進變得冇咁明顯,無聲無息咁吸引住你。
  
以人為主 不以案件帶動
   
好多劇嘅推進都沿用呢個模式:「事件發生 > 主角涉及當中拆解事件 > 主角從中得到啟發 >  事件完結推動角色人格發展」,為咗配合一星期播放,就會以五集為一個循環。最近期嘅例子就係《跳躍生命線》。呢個模式冇話好唔好,做到水準一樣可以感動到人、留住觀眾。
   
【方以文 | 睇乜電視啊?】《是咁的,法官閣下》破舊立新

(圖:TVB)

只不過《是咁的,法官閣下》就轉化、甚至係打破呢個模式。以一般律政劇嚟講,事件就係每單官司,但呢套劇偏偏就淡化咗每單官司嘅開始同結尾,觀眾睇落再唔係一part part。事件開首結尾模糊咗,人物嘅變化冇咗明顯分野位,但事實係持續變化中。《是咁的,法官閣下》幾乎係「人物帶住個劇去走」,多過「case帶住個劇去走」,將角色嘅生活同工作處境做火車頭,case變成輔助去推動人物變化。持續而慢慢改變嘅人情同人物關係先係呢套劇嘅賣點。成功喺模式上破舊立新,令到《是咁的,法官閣下》同其他劇集有咁大分別。
     
編審李茜一人主理
      
無綫寫劇本,多數係大家坐埋一齊度橋,然後分功課,編劇團隊每個人拎幾集去寫,編審負責睇大局去做梳理同埋調整。呢種編劇模式同「事件發生引至人物改變」嘅常見劇集模式好配合。
   
今次《是咁的,法官閣下》可以用另一個模式去做,除咗編審李茜擅長寫人物,「以人情帶劇」十拿九穩之外,睇roller時你仲會發現至今播出嘅集數全部都係由茜姐一個人去寫,所以套劇先咁有「行氣」,輕柔連貫、行雲流水,如果以無綫嘅分工模式去寫,恐怕都幾難成事。今年三套台慶劇嚟講,我覺得《是咁的,法官閣下》最有啟發性,希望喺結局周可以贏口碑又贏收視啦。
   
責編:李玥展

編輯:Stacy

編輯推薦

【方以文 | 睇乜電視啊?】夜晚4小時劇線成形 ViuTV避無可避

10月27日,奇妙變身做「香港開電視」,推出新嘅綜藝資訊節目,當中由志雲大師主持嘅《志雲拆局》同埋項明生主持嘅《明治憑甚麼》得到觀眾嘅支持,成為咗討論度最高嘅77台節目。喺無綫同埋ViuTV周末冇乜睇頭嘅時候...

2018-11-12 09:37

【方以文 | 睇乜電視啊?】2018年台慶劇 無綫力谷二三梯隊上位

不過我認為好睇就得,卡士都係其次。眼見近年咁多套大卡士、大製作都令人失望,依家見到大卡士加埋強宣傳,個心都怯一怯。

2018-10-10 18:06

【方以文 | 睇乜電視啊?】 《TVB周刊》錯失的續命機會

由1997年開始面世,接替《香港電視》成為無綫電視官方刊物嘅《TVB周刊》,會喺今個月完成佢嘅使命,喺十月份首個星期一出版最後一期之後,就要byebye。

2018-09-26 10:59

熱門評論

已複製連結