橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】借廁所

文:珍寶豬
     
有日一班人浩浩蕩蕩咁衝入嚟診所。
    
有一刻,我爭啲想向釣魚釣到悶嘅醫生大嗌「有客啦終於!」。不過我要扮專業,所以我努力按捺住我內心嘅聲音。
    
我問佢哋:「係咪睇醫生呀?」
    
一位帶頭嘅小姐:「有冇廁所呀?」
    
我爭啲講咗個單字粗口:「ER…冇呀。」
  
佢:「隔離茶記都有,你會冇?」
    
有就有,唔外借啫。
    
我:「出面有洗手間嘅,你行返出去再問人呀。」
   
佢:「我哋頭先過咗去啦,好多人排隊呀,我哋本身又多人,點等啫。」
   
我:「唔好意思小姐,我哋冇洗手間可以俾你哋用。」
   
佢又返轉頭:「隔離茶記都有,你會冇?」
  
我:「嗯。」
   
佢:「哦~係咪要睇醫生先可以用呀?」
    
你不如去茶記食嘢啦,冇人會為借用洗手間而去睇醫生啊。
    
【診所低能奇觀】借廁所

(圖:視覺中國)

我:「你哋都係出去用出面嗰個洗手間啦。」
     
佢同佢班同行者講:「是但搵個人嚟睇醫生啦。」
   
我:「真係唔駛㗎,我哋冇洗手間俾你哋用㗎。」
   
佢繼續同班同行者講:「邊個有病要睇呀?順便睇埋啦。」
  
我廢事再出聲,純粹觀望中…
    
冇人理佢,個個都擰頭示意自己冇病。
  
佢:「咁頭先邊個話好急屎呀?是但作啲嘢出嚟俾我哋去咗廁所先啦,堅急呀。」
   
其中一位年紀大些少嘅女士,佢行埋嚟同我講:「姑娘呀,你真係唔可以行個好心俾我哋去廁所先呀?我哋都一把年紀啦,唔係好忍得㗎咋,可唔可以行個好心行個方便呀?」
  
我俾你哋入去,咪又係我瀨嘢:「姨姨呀,你哋去出面嗰個洗手間呀,嗰個係公用㗎。」
  
阿姨見軟嘅唔得,嚟個硬嘅,佢拍枱:「哈!好呀!我哋一齊喺度瀨囉!」
  
我唔出聲。
  
阿姨嘗試帶頭起哄:「我哋一齊喺度屙!」
  
【診所低能奇觀】借廁所

(圖:視覺中國)

當中一位小妹妹出聲:「老師話狗先會喺地下屙㗎…媽媽,我唔係狗呀。」
  
拖位小妹妹嘅媽媽立即帶小妹妹離開診所。
  
其他人唔知係咪突然之間醒起自己係人,佢哋都紛紛離去。
  
責編:李玥展

編輯:Stacy

編輯推薦

【診所低能奇觀】怕血的小姐

就死即係未死,未死即係仲有機會有得醫,小姐,你要加油呀!唔好放棄治療呀!

2018-10-19 11:18

【診所低能奇觀】環保L?

佢:「我係頭先好環保嗰個呀,我問你呀記唔記得邊隻藥係需要時食呀?」

2018-09-14 09:37

【診所低能奇觀】唔係鼻水,咁係乜?

佢繼續抬高頭講:「嗱嗱嗱,又出嚟啦,嚟啦。」我望住鼻窿…鼻水咋嘛!

2018-10-11 14:19

熱門評論

已複製連結