橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】怕血的小姐

文:珍寶豬
  
有日一位小姐嚟到~
  
佢臉容痛苦行埋嚟:「小姐,我就死啦。」
    
我:「睇醫生呀嘛?麻煩你身分證明文件呀~我同你登記先呀。」
   
佢:「我真係就死啦。」
    
就死即係未死,未死即係仲有機會有得醫,小姐,你要加油呀!唔好放棄治療呀!
    
我:「有咩事入去同醫生講俾醫生睇呀?我呢度同你登記咗先,咁你先可以入去見醫生㗎~」
    
佢:「係咪要身分證呀?」
我:「係呀。」
  
佢拎出身分證俾我登記,我邊登記邊留意佢個樣~見佢時不時就擺出一副好痛好痛嘅樣。
   
【診所低能奇觀】怕血的小姐

(圖:視覺中國)

到佢入到醫生房後,醫生嗌我跟症,我入到去見到小姐原來受咗少少傷~流緊少少血。
   
醫生:「而家同你洗傷口先呀。」
   
佢:「洗傷口?洗會唔會流血呀?」
    
醫生:「止咗血就唔會流㗎啦。」
    
佢:「我可唔可以唔睇住你洗呀?」
  
醫生:「可以,你可以擰轉面,你唔駛望㗎。」
  
佢:「咁我可唔可以出去先呀?你由你洗,我喺出面等你呀?」
嗯…小姐,你打算切咗隻腳落嚟,由得隻腳留喺房嗎?你咁樣好冇義氣呀~
  
醫生聽到一頭霧水俾唔到反應,於是我出聲:「唔駛驚㗎,你可以玩住電話先,一陣就得㗎啦~你坐喺度得㗎啦。」
  
佢:「唔得呀,我真係好驚呀,你哋洗冇問題呀,我自己出去先唔得咩?」
    
我:「你出咗去嘅話,我哋點洗呢,隻腳係同你個人一齊㗎嘛,痴住㗎嘛係咪?」
    
【診所低能奇觀】怕血的小姐

(圖:視覺中國)

佢望望自己隻腳,再望望我,再望望醫生:「係喎,點解我唔知嘅。」
  
我:「應該係你太驚啫,冇事嘅,放心,你拎部電話出嚟睇吓先,好快洗完㗎啦~」
  
佢:「我會唔會就咁死咗㗎。」
  
如果洗個傷口都死人嘅話,醫生年中都唔知要上幾多次頭版…
  
佢:「我真係唔可以走先呀?」
  
我重覆:「你同隻腳係一齊㗎」
  
佢:「我唔想要佢啦…」
  
我:「你哋係一生一世㗎。」
  
如是者,喺洗傷口期間,我哋重覆咗以上對話超過十次…
  
醫生,你洗快啲好冇呀?佢真係好驚呀~
  
責編:李玥展

編輯:Stacy

編輯推薦

【診所低能奇觀】環保L?

佢:「我係頭先好環保嗰個呀,我問你呀記唔記得邊隻藥係需要時食呀?」

2018-09-14 09:37

【診所低能奇觀】唔係鼻水,咁係乜?

佢繼續抬高頭講:「嗱嗱嗱,又出嚟啦,嚟啦。」我望住鼻窿…鼻水咋嘛!

2018-10-11 14:19

【診所低能奇觀】唔好讀書讀壞腦

仔,你真係要努力讀書呀,記得讀還讀,唔好讀壞腦呀~

2018-09-26 13:37

熱門評論

已複製連結