橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】2018年台慶劇 無綫力谷二三梯隊上位

文:方以文
    
仲有一個月多啲就係無綫51周年台慶,呢個星期開始播第一套台慶劇《跳躍生命線》,而另外兩套台慶劇亦都定咗,分别係《是咁的,法官大人》同埋《兄弟》。有觀眾一睇就話三套當中得《兄弟》有啲「台慶劇格」,話起碼有上屆視帝王浩信撐住,仲出埠去英國同菲律賓拍攝,而另外兩套劇失色咗啲。不過我認為好睇就得,卡士都係其次。眼見近年咁多套大卡士、大製作都令人失望,依家見到大卡士加埋強宣傳,個心都怯一怯。
     
【方以文 | 睇乜電視啊?】2018年台慶劇 無綫力谷二三梯隊上位

(圖:TVB)

有觀眾對於事先張揚拍嚟為無綫賀壽嘅《大帥哥》連續喺50周年、51周年都畀人飛出台慶劇大惑不解,認為張衛健做主角夠擔得起「台慶劇」呢個名有餘。另外又有觀眾話播松松姐姐擔正嘅《危城First Lady》做台慶劇都有睇頭,點解要放《跳躍生命線》甚至係卡士更弱嘅《是咁的,法官閣下》喺一年最重要嘅位置播呢?
    
《兄弟》最穩陣 楊明再上一層
    
我認為咁係無綫捧人上位嘅策略。《兄弟》嘅男主角王浩信,睇嚟喺無乜對手之下會冧莊視帝,升做一哥指日可待。另一男主角就係舊年拎咗「飛躍進步男藝員」嘅楊明,想捧佢再升一級並唔意外(不過佢首度擔正男一嘅《婚姻合伙人》收埋喺倉底已經一段時間)。女演員方面,江嘉敏連續兩年有份參與台慶劇。而喺全台欠缺「洋化」女演員嘅情況下,憑「是非精」身份儲落一班支持者嘅劉穎璇,似乎都喺力捧之列。
  
【方以文 | 睇乜電視啊?】2018年台慶劇 無綫力谷二三梯隊上位

【方以文 | 睇乜電視啊?】2018年台慶劇 無綫力谷二三梯隊上位

(圖:TVB)

朱晨麗就更加唔使講,捧佢嘅決心真係有目共睹,拍住楊千嬅演《多功能老婆》就係例子。全套劇都差唔多都係上位人士,除咗唔係親生仔嘅伍允龍,不過呢套劇咁多動作場面搵佢都好合理。
    
《跳躍生命線》力谷何廣沛
    
【方以文 | 睇乜電視啊?】2018年台慶劇 無綫力谷二三梯隊上位

(圖:TVB)

至於《跳躍生命線》,由馬德鐘馬神一個拉住咁多個後輩演員,要捧人上位陣味好強烈。當中有近年上位好快嘅何廣沛,喺劇中演馬神徒弟。仲有何廣沛嘅「官配兄弟」郭子豪,另外又有張彥博、羅天宇。女演員方面有同樣捧緊上位嘅劉佩玥、陳瀅、張曦雯。傳聞話呢套劇何廣沛嘅戲份同馬神不相伯仲,甚至有人話仲多過馬神,畀位佢上同埋鞏固佢地位嘅用意好明顯。
    
《是咁的,法官閣下》資深男角拉動同劇演員
     
《是咁的,法官閣下》可以話比舊年嘅《降魔的》更加唔似台慶劇。唔係話Ben哥同埋關禮傑唔好戲,而係台慶劇呢個咁具標誌性、策略性嘅位置,由佢哋擔任男主角真係估唔到,就連第一次做女主角嘅王君馨收到消息話套劇做咗台慶劇時,都喺IG表示驚訝。
     
【方以文 | 睇乜電視啊?】2018年台慶劇 無綫力谷二三梯隊上位

(圖:TVB)

靠台慶劇呢個牌頭,加埋黃智賢、關禮傑去捧王君馨上一線呢個舉動係好明顯,但望真啲,同《跳躍生命線》一樣,《是咁的,法官閣下》有一班等緊上位嘅潛力演員喺度,包括咗同江嘉敏一樣連續兩年參與台慶劇嘅麥明詩,仲有黃子恆同2016年港男冠軍黎振燁。同劇仲有喺《不懂撒嬌的女人》同《三個女人一個「因」》裡面表現突出,分分鐘以黑馬姿態爆出嘅林秀怡。
    
合拍片令演員向上流動機會少
     
當大家近十年都話無綫唔用力捧人之際,大台呢次就用三套台慶劇捧人上位。呢個舉動係值得鼓勵嘅,但都反映咗之前唔捧人而留低嘅後遺症。要用台慶劇「一拖幾」嘅方式去捧人,冒咁大風險,除咗對班演員有返咁上下信心之外,我認為同合拍片增多都有啲關係。
    
【方以文 | 睇乜電視啊?】2018年台慶劇 無綫力谷二三梯隊上位

(圖:TVB)

合拍片揀演員要睇往績,你見好多前輩級演員都出現返,令到合拍劇當中演第二三男女主角嘅演員,喺無綫裡面都已經係一線或者係二線頭。成套劇粒粒皆星,戲份多啲嘅角色都由上咗位嘅演員演出居多,其他演員就少咗機會再上一層樓。
    
「台慶劇」再不等於「完美卡士」
      
無綫一年大約拍23套劇,拍多一部合拍片,播多一部陸劇,就自然少一部「自拍片」,少咗畀演員上位嘅機會。所以用台慶劇捧人嘅情況,我估計只會愈來愈多。各位觀眾亦都要調整下,以後台慶劇未必係「最完美卡士」,因為啲人腳去晒合拍片。不過都係嗰句,有卡士唔代表一切,劇只係分好睇同唔好睇。今次無綫用台慶劇捧人嘅策略會唔會成功,好快就會知道。
  
       
責編:李玥展

編輯:Stacy

編輯推薦

【方以文 | 睇乜電視啊?】 《TVB周刊》錯失的續命機會

由1997年開始面世,接替《香港電視》成為無綫電視官方刊物嘅《TVB周刊》,會喺今個月完成佢嘅使命,喺十月份首個星期一出版最後一期之後,就要byebye。

2018-09-26 10:59

【方以文 | 睇乜電視啊?】《BB來了》為植入式廣告示範最低標準

《BB來了》上周大結局,喺眾多爸爸媽媽支持之下,成為人氣劇集。部分人如我覺得後半部劇情太散漫主角失焦,但個頭開得好,所以冇阻收視企穩。討論劇情部分喺我Facebook專頁有得睇,今次想講吓呢套劇嘅植入式廣告。

2018-08-10 09:35

【方以文 | 睇乜電視啊?】《全民造星》想靠惡毒反面去搶收視?

本來想睇一班男仔嘅熱血故事,依家變咗睇佢哋畀人日日潑冷水,仲要潑嗰個好似唔知自己做緊乜咁。

2018-07-31 10:24

熱門評論

已複製連結