橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】 《TVB周刊》錯失的續命機會

文:方以文
    
【方以文 | 睇乜電視啊?】 《TVB周刊》錯失的續命機會

(圖:TVB Weekly@Facebook)

由1997年開始面世,接替《香港電視》成為無綫電視官方刊物嘅《TVB周刊》,會喺今個月完成佢嘅使命,喺十月份首個星期一出版最後一期之後,就要byebye。至於喺中期業績報告話會由實體印刷版變成網絡版,至今仍然一啲消息都冇,成個無綫出版部門只係得返sales and marketing可以過渡去電視台嗰邊,其他編採美術相關員工冇得留低。
      
有觀眾慨嘆《TVB周刊》要停刊,係因為無綫本身已經吸引唔到人,所以身為官方刊物嘅《TVB周刊》失去吸引力,走到今日嘅絕路。又有觀眾話紙媒做唔住係大趨勢,《TVB周刊》要摺埋都係意料之內。兩個講法都有啲道理,但點講都好,依家重整架構只問一個問題:賺唔賺到錢?有冇其他部門可以代替?
       
搞活動做主要收入 失去獨特性
    
《TVB周刊》(下稱周刊)所屬嘅「電視廣播出版有限公司」(下稱TVBP)近年最賺錢嘅部分,唔係靠賣雜誌同埋廣告收入,而係以周刊名義去搞活動,做商場騷同品牌合作搵真銀。出版公司靠搞活動維生,喺香港呢個巿場唔係乜嘢新鮮事,點解其他刊物可以有一線生機,但係周刊就唔得呢?因為佢同TVB嘅關係。 
      
【方以文 | 睇乜電視啊?】 《TVB周刊》錯失的續命機會

(圖:TVB Weekly@Facebook)

搵周刊搞活動,唔搵其他公司或者其他雜誌,為乜呢?最主要嘅原因係容易啲搵到無綫嘅藝員,方便快捷。有時啲活動聯同電視部門嗰邊合作拍個節目出嚟,再夾埋周刊嘅廣告,成為一個package。呢個就係TVBP主要收入來源。本來各有各做相安無事,你搵到自己運作同生存嘅方向位置,就可以安然度日,但一遇到架構重整就遭殃。
      
電視台嗰邊其實都有自己嘅部門去搞活動,要搵藝員出席活動一樣咁方便,只係少咗周刊廣告呢一部分。當周刊本身嘅影響力日益下降嘅時候,周刊嘅廣告就係雞肋,甚至冇咗都唔可惜,搞活動呢個招數就唔係周刊獨有優勢。架構整合時,呢份收入撥返畀電視台嗰邊「做靚條數」不無道理。周刊冇咗呢個主要收入來源時,TVBP仲可以憑乜嘢留低? 就係一啲人哋做唔到嘅嘢﹗ 
     
TVB.com BigBigChannel 削弱周刊地位
      
身為官方刊物,有特定地位,周刊多年嚟係官方「最正統」嘅向外溝通渠道,封面人物同故事以往係風向標,代表成個台嗰個星期想推啲乜。不過喺TVB.com以及BigBigChannel出現之後,無綫要發布消息嘅渠道就唔只得周刊。互聯網、流動程式夠快,而且近乎完全免費,喺社會日漸依賴手機同網絡時,周刊嘅影響力就變得更細。TVB.com走正經路線,BigBigChannel加上SeeSeeTVB偏向搞笑,周刊就受到兩面夾攻,停刊可能係遲早嘅事。但冇咗周刊,TVBP都未必要立即死, 因為TVBP旗下出版嘅其實唔只得周刊。
      
近乎掌握無綫第一手資料同埋消息,同時擁有藝員資源嘅TVBP,其實都有出版藝員寫真,仲有同節目相關嘅出版刊物,例如係收錄返節目《香港築跡》資料嘅同名書籍、淑儀姐主持嘅節目《吾湯吾水》食譜。就連近年隨書附送就好多人搶不過要畀錢就冇乜人買嘅《食平D》系列食譜,都係TVBP嘅出品。
      
可惜正如上文提到,TVBP近年嘅出版刊物,大部分都係同電視台冇關嘅生意,例如係接一啲湯水藥饍食譜或者社區刊物嚟做。至於比較官方嘅出品又可以引起關注嘅,就係舊年無綫50周年嘅紀念特刊,再之前係乜我就冇乜印象,所以一冇咗周刊,成個TVBP彷彿就等於冇嘢同電視台有關係,加速咗佢嘅死亡步伐。
     
沒有善用獨家資源
         
或者你會問,除咗藝人寫真,仲可以出版啲咩同電視台有關呢?我覺得仲有好多可以做。例如係將一啲經典劇集出版做小說,就好似喺2016年由另一個出版社出版嘅《京華春夢》小說版咁,當時都引起咗一啲電視迷嘅關注。又可以做一啲資深演員嘅傳記或者入行紀念特刊,好似係汪明荃入行50年、家燕姐入行60年咁,佢哋有咁多支持者 ,一定有個銷量數量打底,宣傳都可以事半功倍。最緊要話畀人知,自己仲有生存價值。 
      
【方以文 | 睇乜電視啊?】 《TVB周刊》錯失的續命機會

(圖:TVB Weekly@Facebook)

呢啲睇落都賺唔到錢,真係可以救到成個出版部門?或者真係唔得,但我諗點都有啲續命嘅作用。當你自己可以搵到錢運作到,又有啲工作係第二啲部門唔可以取代時,你就仲有一線生機。可惜喺唔少電視城嘅人眼中,TVBP就只係得《TVB周刊》呢個產品。最慘係聽聞周刊喺電視台嘅地位唔高,有啲監製直頭當佢哋係妹仔咁,藝員科寧願啲藝人做咗出面街嘅訪問先,周刊永遠唔會係排第一。喺咁嘅情況之下,一嘢斬落嚟話要裁員甚至要摺埋,你嘅護身符就只係得一本弱勢周刊,點會擋得住? 如果有其他關於電視台嘅出版物喺手,就算唔係乜絕世高招,都算係獨門武器,嚇得吓人,仲可以頂多陣。 
      
或者《TVB周刊》由開始簡單報道節目內容、幕後探班呢啲近乎獨家嘢愈做愈少,就連賣電視廣告時都只係識得標謗其他地方都可以搵到嘅「足本劇情」同「都巿閒情食譜」嘅時候,已經註定會消失。成日聽到有人話周刊係官方刊物,佢唔會咁容易死。事實證明唔居安思危,就會將自己嘅優勢消耗殆盡,最後被淘汰、消失。    
      
責編:李玥展

編輯:Stacy

編輯推薦

【方以文 | 睇乜電視啊?】《BB來了》為植入式廣告示範最低標準

《BB來了》上周大結局,喺眾多爸爸媽媽支持之下,成為人氣劇集。部分人如我覺得後半部劇情太散漫主角失焦,但個頭開得好,所以冇阻收視企穩。討論劇情部分喺我Facebook專頁有得睇,今次想講吓呢套劇嘅植入式廣告。

2018-08-10 09:35

【方以文 | 睇乜電視啊?】《全民造星》想靠惡毒反面去搶收視?

本來想睇一班男仔嘅熱血故事,依家變咗睇佢哋畀人日日潑冷水,仲要潑嗰個好似唔知自己做緊乜咁。

2018-07-31 10:24

【方以文 | 睇乜電視啊?】無綫裁員促製播分途? 隨時危機四伏

講到尾,行唔行製播分途模式唔係關鍵。電視台唔打算做好嘢嘅話,點變都冇用。

2018-08-07 11:52

熱門評論

已複製連結