橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】環保L?

文:珍寶豬
  
有日有位小姐嚟到診所。 
  
佢行埋嚟望望我,我問佢:「係咪睇醫生啊?未睇過?麻煩你俾身分證我登記啊。」
  
佢:「哦,好呀。」
  
登記後我連埋張覆診卡俾返身分證佢:「登記好㗎啦,下次嚟睇俾覆診卡我就可以~」
   
佢望望覆診卡:「唔駛啦咁唔環保,我用電話影低得㗎啦。」
  
佢影完張覆診卡後,遞返張覆診卡俾我:「我唔要啦。」
  
我望住張覆診卡…咁樣唔要嘅,會比較環保嗎?我都冇得再翻用…
  
到小姐睇完醫生,出藥時,佢一望到啲藥:「哇,駛唔駛咁多袋呀?」
  
我:「你多藥嘛。」
  
【診所低能奇觀】環保L?

(圖:視覺中國)

佢逐包拎上手望望:「可唔可以group埋做一袋呀?」
  
我:「唔得呀,藥要分得清清楚楚㗎。」
  
佢:「你咁多個膠袋,個地球死得啦。」
  
…我駁唔到。
    
佢開始自己出手將藥倒成一袋,我:「小姐你咁樣好易撈亂㗎,唔知邊隻打邊隻㗎,亂咁食嘅出事㗎嘛!」
      
佢掉返啲藥袋俾我:「得啦,我唔想要咁多個袋呀,我記得㗎啦,有咩事我自己負責啦。」
    
我:「你咁樣我唔可以俾藥你啊,而且啲袋都寫晒你名~你唔要我都係掉㗎咋。」
    
佢:「點解唔得啫,我有腦㗎嘛,我記得㗎嘛!」
  
佢講完之後即刻放低錢,拎啲藥走咗佬~枱面上留低咗啲根本唔可以再翻用嘅藥袋…
  
小姐離開後幾個鐘,電話響起,我:「你好~乜乜診所」
   
佢:「我係頭先好環保嗰個呀,我問你呀記唔記得邊隻藥係需要時食呀?」
  
你個腦呢?你打嚟考我呀?
  
我雖然知道佢係邊個,不過循例上都要問清楚:「你有冇覆診卡號碼俾我呀?我同你睇清楚個排版先可以答你啊~」
  
佢:「覆診卡號碼呀?唔記得喎,好似冇俾過我呀?」
  
你個腦呢?
【診所低能奇觀】環保L?

(圖:視覺中國)

我:「咁小姐你叫咩名呀?」
  
佢:「吓,我頭先至嚟完咋喎,你咁快唔記得?」
  
你夠咁快唔記得啲藥係點食啦。
  
我:「我係要核對好你嘅身份先可以答你,唔可以憑記憶答你啊」
佢:「哦,我以為姑娘你咁冇記性咋。」
  
冇記性嗰個係你,收線後~我喺排版寫明『唔可以再俾佢拆藥袋!』。
  
責編:李玥展

編輯:Stacy

編輯推薦

【診所低能奇觀】使用暴力的媽媽

無論咩事都好啦,都唔好喺小朋友面前使用暴力啊,閂好門打到翻轉都仲得啊~

2018-08-28 15:20

【診所低能奇觀】病假紙

佢諗咗陣:「點解我平時去政府醫院會一大袋藥嘅?佢哋都係十幾蚊咋喎?」

2018-08-09 09:38

【診所低能奇觀】病人叫醫生執牛屎

佢放低一袋藥上枱面,冇出一句聲。 我:「做咩呀?袋藥你嘅?」 佢推前袋藥,打打眼色示意我睇睇,我拎啲藥出嚟望:「配藥呀?」

2018-07-26 09:57

熱門評論

已複製連結