橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】唔好讀書讀壞腦

文:珍寶豬
  
有日一位媽媽同一位後生仔嚟到診所。
  
媽媽拎住一疊文件行埋嚟登記處:「填咗佢呀」
  
 【診所低能奇觀】唔好讀書讀壞腦

(圖:視覺中國)

我望望文件,係海外升學健康證明:「麻煩你俾佢嘅身分證明文件我啊」
  
媽媽拎出身分證,我望望張身分證,咦,阿姨你活到老學到老玩到去外國升學呀?
  
我:「唔好意思呀太太,份表格係填你嘅資料呀?」
  
媽媽翻個白眼:「哎,真係死得呀,人蠢真係冇用㗎,蠢就喺度做呢啲二打六執頭執尾啦,你有冇帶個腦返工呀?點睇都係我個仔啦!阿仔你真係要俾心機讀書呀,你阿媽我點都會俾你讀多啲書㗎!千其唔好好似呢啲人咁蠢呀!」
  
你要唔要考慮跟埋一齊去讀?
  
我:「咁…你俾你自己嘅身分證我做咩呀?份表填邊個嘅就俾邊個嘅身分證我啊,我要你張身分證冇用㗎」
  
佢拎返張身分證望望:「一時俾錯你啫,講一句咪得囉,唔駛咁多嘢講㗎喎,俾錯好奇咩?你發現有唔妥係你應份㗎嘛。」
  
你講晒啦,你講夠未啫?
    
佢擰轉身同個仔講:「你張身分證喺邊呀?」
  
仔望住電話答:「唔喺我度呀。」
  
佢又擰返轉望住我講:「係咪我頭先俾咗你呀?」
  
 【診所低能奇觀】唔好讀書讀壞腦

(圖:視覺中國)

我:「你頭先俾嗰張身分證係你本人嘅,唔係你個仔呀。」
  
佢:「會唔會兩張攝埋做一張呀?你唔好發雞盲喎。」
  
你而家發雞瘟添呀!
  
我:「你嗰張我都俾返你啦,你自己搵真啦。」
   
佢摷摷銀包:「冇喎,咁而家冇喎,咁點呀?」
  
我:「如果冇身分證嘅,有冇其他身分證明文件呀?一定要有身分證明文件先可以同佢填㗎。」
  
佢:「咁煩㗎!用我嗰張唔得咩?」
  
仔,你真係要努力讀書呀,記得讀還讀,唔好讀壞腦呀~
  
我:「頭先咪講咗唔得~一係你哋返去慢慢搵返張身分證先啦,唔見咗身分證都好麻煩㗎,填呢啲唔急嘅,搵返身分證急啲。」
  
佢:「哎,真係激死我啦!真係唔好彩呀我!遇到個咁蠢嘅!」
   
佢捉住阿仔離開診所了。
  
  
責編:李玥展

編輯:Stacy

編輯推薦

【診所低能奇觀】使用暴力的媽媽

無論咩事都好啦,都唔好喺小朋友面前使用暴力啊,閂好門打到翻轉都仲得啊~

2018-08-28 15:20

【診所低能奇觀】病假紙

佢諗咗陣:「點解我平時去政府醫院會一大袋藥嘅?佢哋都係十幾蚊咋喎?」

2018-08-09 09:38

【診所低能奇觀】病人叫醫生執牛屎

佢放低一袋藥上枱面,冇出一句聲。 我:「做咩呀?袋藥你嘅?」 佢推前袋藥,打打眼色示意我睇睇,我拎啲藥出嚟望:「配藥呀?」

2018-07-26 09:57

熱門評論

已複製連結