橙新聞

HR小薯蓉

存活於邪惡軸心HR,由一粒薯仔做到變薯蓉。放工同你嘆住薯蓉講東講西,平衡下繁忙心理。

【收工嘆薯蓉】每次Handover都是惡夢的開端

文:HR小薯蓉
     
無論轉工定放假,如果你唔將你嘅工作交低畀其他同事,你老細肯定做鬼都唔放過你。放假小hand,轉工大hand,你責任越大,handover嘅嘢就越多。不過唔知你覺唔覺得,每次handover都可以係一個惡夢嘅開端,因為⋯⋯
   
1.冇人畀你handover
    
係人都知要handover,但最大問題係有邊個畀你handover?當你離開一間公司,通常都唔會咁快請到人頂你個位,結果一定要搵現職同事接你手。試問又有邊個咁好死主動接手,老細唔落order,你都唔知將啲嘢交畀邊個。如果老細愛理不理,可能到你走嗰日都冇人接手你啲嘢。然後結果只有三個,一,你啲嘢就咁失傳。二,你老細會叫你走左之後再返嚟handover。三,你走咗之後老細都不停Whatsapp你。
   
【收工嘆薯蓉】每次Handover都是惡夢的開端

資料圖片

2.畀勁多嘢你做
     
當你提出離職一刻,你喺你老細心目中嘅地位就唔同咗。有啲老細可能會喺你走之前再畀多嘢你做,呢樣又要你幫嗰樣又叫你跟。突然間工作量加倍,仲講咩handover?不過到最後一星期,老細就會問你handover成點?大佬呀,handover都要有時間先得!
     
3.要你寫天書
    
你喺間公司做得長,跟嘅嘢自然多。有啲老細對handover嘅要求極高,除咗要你繼續處理日常職務之外,仲要你將所有工作流程寫曬出嚟。簡單啲嚟講就係要你將咁多年經驗寫成一本天書,等人地一睇就識做你啲嘢。其實做咗咁多年嘅嘢,點可能一個月寫到本天書出嚟?邊寫到咁多,你老老實實搵個人畀我教好過啦。
   
【收工嘆薯蓉】每次Handover都是惡夢的開端

資料圖片

4.所托非人
   
Handover順唔順利都要睇Handover嘅對象。當老細搵到個人接你啲嘢嘅時候,你可能發現你嘅handover對象唔係幾對路,你講極佢都唔明,講完一次又一次,時間又一日一日咁過,結果到你走之前佢都問緊第一日講嘅嘢。每個人嘅能力都唔同,做到嘅嘢都唔同,如果所托非人,你嘅handover就更加痛苦。
  
責編:李玥展

編輯:Stacy

編輯推薦

【收工嘆薯蓉】淘寶可怕的4大原因

唔知你有冇試過,往往你啱啱淘完又會發現有嘢想買。買平嘢就好似會上癮一樣,當每次你發掘到又平又抵嘅貨品,腦部就會產生多巴胺令你感到滿足感。多巴胺會令人上癮,然後你又會再去尋寶,結果好快又再買再集運。...

2018-08-15 09:30

【收工嘆薯蓉】3個一定要去畢業旅行嘅理由

嚟到7-8月,發現收多好多畢業生嘅CV。近呢幾年,接收畢業生CV嘅時間性有向後延遲嘅催勢。以前喺上一年嘅年尾,已經開始收到好多畢業生嘅CV,但而家去到6、7月,大家去見工都話啱啱去完旅行返嚟,而家先開始搵工。

2018-07-20 11:16

【收工嘆薯蓉】4種睇波女友,邊種係你最愛?

世界盃進行得如火如荼,作為一個男人,晚晚收工趕返屋企係非常合理嘅事,但係咪合法就要問過女友先。不過而家香港都有好多女仔睇波,喺男友影響下,穿起愛隊戰衣,出雙入對嘅情侶周街都係。我喺咖啡店扮緊偽文青...

2018-07-13 16:27

熱門評論

已複製連結