橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】第一日就劈炮 其實係將擾民程度減到最低

文:聶瞳
   
印象中我都試過返一日工就辭職,正確嚟講係半日,因為食lunch嗰陣偷偷哋拎埋袋走,然後過咗兩點打返公司話唔適合自己,一早已經擺低所有公司物品例如staff card喺枱面,最重要唔好麻煩到人,但亦都要忠於自己感受。
  
【辦公室日報|聶瞳】第一日就劈炮 其實係將擾民程度減到最低

(圖:視覺中國)

唔係想將第一日返工就劈炮呢樣嘢講到大義凜然,只係作出呢個決定其實利己利人。如果明知唔適合,我呃份糧事小,老細只係當散紙,但浪費教你嘅同事一番心血同時間先至事大,雖然唔浪費都浪費咗,但落足心機教你半日、幾日、一星期,甚至一個月,當中真係有分別,將來你教人都唔想對方上晒手先辭職,長痛不如短痛。
  
返工一日就辭職,對HR都係一件好事,麻煩就梗架喇,不過可以將麻煩程度減到最低,因為佢請你嗰陣出咗招聘廣告,亦唔止見你一個,如果你早啲做決定,HR隨時慳返唔使再出稿,可以即刻搵人補上,再者,其他候選人又唔使等咁耐,對三方面都係有利同埋公平。
  
第一日就辭職,其實你最需要交代嘅人係自己,分清楚究竟係一時衝動定係深思熟慮?咁快就放棄會唔會對唔住自己?係咪未睇清楚就已經判呢間公司死刑?重點係走得有point同埋唔好後悔。
  
【辦公室日報|聶瞳】第一日就劈炮 其實係將擾民程度減到最低

(圖:視覺中國)

當日我返咗半日就走人,因為見工嗰陣係去另一層樓,完全睇唔到做嘢個部門嘅實際情況,返咗半日發現靜過圖書館,同事之間一講嘢就係鬧嚟鬧去互相指責,唔係玩嗰隻,係下下動真火,部門與部門之間好唔和諧,我好了解自己唔適合呢種文化同環境,不過唔可以排除有其他人融入到,離開都係唔想浪費彼此嘅時間,總好過我跟咗啲工作半個月先走。
  
之後我都試過有工作係初初覺得唔舒服,但諗深一層嗰啲問題係可以解決,所以忍住唔辭職,後來又真係冇問題,仲做咗一段日子。所以一返工就想辭職要問清楚自己,留低要有決心,離開亦無需覺得唔好意思,我都見過自己公司有新人返一日工就劈炮,其實咁樣並唔係壞事,證明佢清楚自己要乜,並且將擾民程度減到最低。
  
責編:李玥展

編輯:Stacy

編輯推薦

【辦公室日報|聶瞳】老細明明趕住要人 請人卻一拖再拖?

喺招聘過程中遇到啲奇怪嘅事,我已經唔會驚訝,例如明明趕住要人,但請人嘅過程又踢一踢先郁一郁。

2018-08-17 17:39

【辦公室日報|聶瞳】呢個離職原因夠唔夠充分?

老細換車換樓爭在未換老婆,員工4年冇加薪得幾百蚊花紅,呢個離職原因夠唔夠充分?

2018-07-27 10:09

【辦公室日報|聶瞳】誠信於你而言,值何價?

銀碼只係一個數字,承諾先至係最重要。

2018-07-06 10:10

熱門評論

已複製連結