橙新聞

HR小薯蓉

存活於邪惡軸心HR,由一粒薯仔做到變薯蓉。放工同你嘆住薯蓉講東講西,平衡下繁忙心理。

【收工嘆薯蓉】淘寶可怕的4大原因

文:HR小薯蓉
  
淘寶已經成為咗好多香港人生活中不可或缺嘅一部分,喺辦公室入面,身邊好多同事都會集體淘寶。
  
「喂!有冇嘢要淘呀?」
  
「畀條link嚟!」
  
「等埋我呀!夾埋一次買啦!」
  
「哇!呢個2蚊咋!」
  
【收工嘆薯蓉】淘寶可怕的4大原因

(圖:視覺中國)

聽到呢啲對白就知又係佢地一月一度嘅淘寶時間,係時候又可以搭單買嘢。淘寶雖然係又方便又抵買,但稍一不慎,好容易墮入可怕嘅陷阱。
  
1.買埋好多唔等使嘢
   
我有個同事叫慳妹,每日食晏都一定帶飯,從來唔見佢著名牌,成日聽佢講話呢樣貴嗰樣貴唔買。不過一淘寶,每次佢都淘得好誇張,衫呀、袋呀、鞋呀、手飾呀、電話殼呀,每個月都淘一大堆。我問佢:
   
「其實你有幾多對手、幾多對腳、幾多對耳仔、幾多部電話?一個星期得7日,你咁樣淘用得曬咩?」
   
「咁可以換下嘛!」
   
以佢買嘢嘅數,我諗可以兩個鐘頭就換一次造型。
   
有時就係因為太平,好多人都會買埋好多唔等洗嘅嘢係屋企。明明冇需要,但見平就買,結果就變相花咗好多無謂錢,又買埋好多唔等使嘅嘢。
  
2.P圖P到變形
   
P圖係內地淘寶商嘅一種文化,上淘寶就好似睇P圖大賽一樣。同一件貨,有人可以P到件貨又索又正,有人又會裸妝上陣。不過正所謂官圖無限好,好多人都被官圖呃過,本來想買蔡思貝,結果係收到達哥。淘寶真係要小心為上,帶眼識貨。
  
【收工嘆薯蓉】淘寶可怕的4大原因

(圖:視覺中國)

3.人民幣當港幣睇
  
好多人淘寶望價錢淨係望個人民幣,唔好唔記得港幣同人民幣已經唔再係1對1,唔好睇少嗰幾毫子,個數大起嚟都幾襟計。有時埋單睇返信用卡,先知計返港幣貴咁多,好易買到破產。
   
4.上癮不能自拔
     
唔知你有冇試過,往往你啱啱淘完又會發現有嘢想買。買平嘢就好似會上癮一樣,當每次你發掘到又平又抵嘅貨品,腦部就會產生多巴胺令你感到滿足感。多巴胺會令人上癮,然後你又會再去尋寶,結果好快又再買再集運。其實所謂夾埋一次買都係自己呃自己,因為集運未到,你又會再繼續買。
  
責編:李玥展

編輯:Stacy

編輯推薦

【收工嘆薯蓉】3個一定要去畢業旅行嘅理由

嚟到7-8月,發現收多好多畢業生嘅CV。近呢幾年,接收畢業生CV嘅時間性有向後延遲嘅催勢。以前喺上一年嘅年尾,已經開始收到好多畢業生嘅CV,但而家去到6、7月,大家去見工都話啱啱去完旅行返嚟,而家先開始搵工。

2018-07-20 11:16

【收工嘆薯蓉】4種睇波女友,邊種係你最愛?

世界盃進行得如火如荼,作為一個男人,晚晚收工趕返屋企係非常合理嘅事,但係咪合法就要問過女友先。不過而家香港都有好多女仔睇波,喺男友影響下,穿起愛隊戰衣,出雙入對嘅情侶周街都係。我喺咖啡店扮緊偽文青...

2018-07-13 16:27

【收工嘆薯蓉】 80\90\00唔好扮嘢!3條問題出賣你年齡

而家office裡面已經充斥住90後,部分00後都開似進入職場,80後年紀都已經唔細了。呢個年代啲嘢變得好快,Facebook都已經話係畀老人家玩,Snapchat你又玩過未?有一日同啲同事傾開計,大家講起啲「童年回憶」,唔...

2018-07-27 10:09

熱門評論

已複製連結