橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】使用暴力的媽媽

文:珍寶豬
    
有日一位媽媽帶住一個小朋友嚟到診所。
  
媽媽入房睇醫生前吩咐我:「唔該你幫幫眼睇住個仔呀,我想自己一個入去睇呀,睇女人嘢唔方便呀。」
  
我見佢個仔都咁大個:「哦~好呀,冇問題呀。」
  
媽媽同個仔講:「你坐定定等我呀~有咩嘢事都問咗姑娘先呀知唔知呀?唔好周圍走呀,我好快出嚟。」
  
小朋友點點頭。
  
媽媽入房後,我同小朋友你眼望我眼。
  
小朋友望兩望周圍,行埋嚟問我:「姨姨,我可唔可以問你嘢?」
    
我:「嗯?你想問咩呀?」  
  
【診所低能奇觀】使用暴力的媽媽

(圖:視覺中國)

佢:「如果俾媽咪打嘅可以點呀?」
  
我怕房入面嘅媽媽聽到,於是同佢講:「你坐返埋位先,我出嚟同你傾呀。」
  
我出去後問佢,捉起佢對手望望:「你俾媽咪打呀?打邊度呀?」
  
佢:「Patpat」
  
咁我又冇可能而家即刻除你條褲嚟睇喎…
  
我:「佢輕輕力打呀?有冇痛呀?」
  
佢諗咗陣:「應該好痛。」
  
應該?點解係應該呀?痛就痛,唔痛就唔痛啊~
  
我:「佢打你係用手掌打定係用其他嘢打你呀?」
  
佢:「媽咪唔係打我呀,係打爹哋呀。」
   
我鬆半口氣:「即係你冇俾媽咪打,咁你爹哋點解俾媽咪打呀,你知唔知呀?」
  
佢:「我唔知爹哋係咪做錯嘢,媽咪晚晚都打爹哋。」
   
我:「咁爹哋有冇嗌痛呀?或者阻止媽咪咁呀?」
   
【診所低能奇觀】使用暴力的媽媽

(圖:視覺中國)

佢諗咗陣眉頭夾一夾:「爹哋好堅強,佢俾媽咪打都仲會笑住對媽咪,姨姨,咁係咪男子漢男人呀?爹哋有教我咩事都唔好喊,因為我會係男人…」
  
我唔識答你喎...可能你老豆好鍾意~又或者佢忍辱負重都唔奇…
  
我:「我都唔知…」
   
到媽媽出返嚟之後,拎藥時我細細聲問:「太太呀?你哋兩公婆係咪成日喺個仔面前打交呀?」
    
媽媽大感驚訝:「邊個講㗎?」
  
我:「你個仔頭先問我呢...爸爸俾媽咪打可以點算呀…你哋係咪有啲咩問題呀?喺小朋友面前用暴力又好似唔太好啊…」
    
媽媽塊面紅晒細細聲:「佢睇到嗰啲唔係打交啦…」
     
佢再耍手講:「冇事㗎冇事㗎我哋,姑娘你唔駛驚呀,我哋會注意㗎啦,唔好意思呀。」
     
哎呀~無論咩事都好啦,都唔好喺小朋友面前使用暴力啊,閂好門打到翻轉都仲得啊~
     
   
責編:李玥展

編輯:Stacy

編輯推薦

【診所低能奇觀】病人叫醫生執牛屎

佢放低一袋藥上枱面,冇出一句聲。 我:「做咩呀?袋藥你嘅?」 佢推前袋藥,打打眼色示意我睇睇,我拎啲藥出嚟望:「配藥呀?」

2018-07-26 09:57

【診所低能奇觀】太太逼工人姐姐打避孕針?!

太太:「我有俾錢佢㗎!告咩呀?要告都係我告佢勾引我老公啦!成日化妝化到雀咁!搏咩呀?搏我老公望你一眼呀?」

2018-07-16 11:06

【診所低能奇觀】鬼仔性格

佢:「收工收工收工,淨係識講收工,香港人打工淨係識講收工。」

2018-07-06 09:39

熱門評論

已複製連結