橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《全民造星》想靠惡毒反面去搶收視?

文:方以文 
   
ViuTV全力打造自己嘅節目品牌「Goodnight Show」,先有兩季《全民星戰》,到依家播緊嘅選秀真人騷《全民造星》接力,喺港鐵香港站大賣廣告。最近日日有廣告招募參賽者嘅女生選秀節目《廣告女王》,似乎都係「Goodnight Show」之列。有人話要播劇集先有追看性留住觀眾,叫ViuTV重點開發拍劇,但我就覺得打造有追看性綜藝節目都好緊要,開創「Goodnight Show」品牌似乎就係想走呢條路線,而《全民造星》係選秀真人騷,追看性高,我都期望新台可以靠今次爭返啖氣。
   
【方以文 | 睇乜電視啊?】《全民造星》想靠惡毒反面去搶收視?

(圖:ViuTV)

無理惡毒評語趕客
   
不過由第一集開始我就睇得唔係咁舒服,毒舌唔係好啱我口味。不過就算係鍾意睇批評嘅觀眾,都漸漸睇唔過眼,覺得評判標準搖擺不停,評語惡毒得嚟好多都係言之無物,睇到火都嚟。本來希望靠呢個節目喺世界盃後留住啲收視,但似乎形勢幾危危乎。有人透露節目完咗首輪淘汰之後,會變得勵志熱血,但首輪淘汰拖成兩個星期有多,評判嘅無理毒評已經趕走咗唔少觀眾。面對大台下星期播嘅新劇《特技人》,隨時連僅餘收視都冇埋。
  
【方以文 | 睇乜電視啊?】《全民造星》想靠惡毒反面去搶收視?

(圖:ViuTV《全民造星》截圖)

TVB棄之 ViuTV取之?
    
有人話,觀眾鍾意睇住鬧、鍾意食花生,所以會吸引到啲人去睇。乜係咩?如果係有呢個現象,我諗都已經係以前嘅事。尤其經過大台一系列以恥笑參賽者同埋所謂金句為主嘅真人騷節目洗禮之後,呢啲惡毒無理批評嘅巿場價值已經驟減。估唔到連無綫都唔再做呢類節目嘅時候,新台居然會用呢個方向去做新節目,仲要係主打節目。
    
《一筆Out消》前車可鑑 評判成犧牲者
  
【方以文 | 睇乜電視啊?】《全民造星》想靠惡毒反面去搶收視?

(圖:《一筆Out消》截圖) 

諗返2001年,要嚟打亞視奇蹟節目《百萬富翁》嘅《一筆Out消》,其實已經知道香港觀眾普遍唔接受主持人惡形惡相。節目初期,主持Do姐奉命copy英國版主持Anne Robinson嘅惡毒風格,集集鬧參賽者,結果畀觀眾圍插。好在呢個節目係臨危受命趕住拍趕住播,先可以極速更改主持風格,之後Do姐同參賽者有講有笑先至好啲。強如Do姐都受唔起呢個主持模式,我都諗唔到有邊個可以。岑應嗰一系列節目其實都明白呢個道理,所以每輯嘅主持都唔係自己藝人嚟。今次《全民造星》嘅五位評判,就成為咗呢個節目嘅首批犧牲者,而我相信五位都係配合節目嘅毒舌方向先會做成咁。
  
【方以文 | 睇乜電視啊?】《全民造星》想靠惡毒反面去搶收視?

(圖:ViuTV《全民造星》截圖)

    
ViuTV輸唔起
    
大家唔鍾意大台不顧形象以負面方法去搏宣傳搏收視,同一件事發生喺新台嘅時候效果必然係會一樣,甚至更加激烈。大家想睇新台同支持新台,係因為佢唔似大台。之前世界盃搵大台嘅明星過嚟做勢已經係搏命,但都仲可以當賭下大細,50/50。不過呢種同「岑系真人騷」一樣,以負面形象炒作宣傳同埋呃收視嘅方法係註定失敗。最攞命嘅係佢唔同無綫,冇一大班忠實嘅觀眾,係會輸唔起,同時亦會破壞依家全力打做緊嘅「Goodnight Show」牌匾。
     
【方以文 | 睇乜電視啊?】《全民造星》想靠惡毒反面去搶收視?

(圖:ViuTV)

本來想睇一班男仔嘅熱血故事,依家變咗睇佢哋畀人日日潑冷水,仲要潑嗰個好似唔知自己做緊乜咁。我暫時都仲睇緊,全為支持有夢想有行動嘅參賽者,但真係睇到好折磨,會隨時跳船。
  
責編:李玥展

編輯:Stacy

編輯推薦

【全民造星】靚仔大過實力?Zero得個樣都畀余安安救返入圍

ViuTV選秀節目《Good Night Show全民造星》播出近兩星期,依然在進行第一輪淘汰,在第一集播出時,已經有不少觀眾對5位星級評審余安安、梁泰來、細So、劉翁及星級化妝師Will Or大感不滿,直斥他們揀人毫無準則,...

2018-07-27 12:29

《全民造星》未播出已遭恥笑 連內地網民都吐槽:很土

ViuTV選秀節目《Good Night Show全民造星》緊接世界盃,將在今晚(16號)正式首播,早前節目組在網上公布99位參賽者的個人照並進行投票,不過就被網民恥笑個個造型出晒事,全是「陳展鵬式衣着」,MK之餘還充滿濃...

2018-07-16 17:08

【方以文 | 睇乜電視啊?】《全民星戰》出咗咩問題?

《全民星戰》呢個遊戲節目搵外援林敏驄同梁漢文做主持,再加上明星足球隊全力支援做嘉賓,但效果就真係差得緊要, 一個遊戲節目唔緊張唔好笑冇氣氛,到底出咗咩問題?

2018-05-10 10:17

熱門評論

已複製連結