橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】病假紙

文:珍寶豬
    
有日一位小姐嚟到診所。
    
佢:「係咪有假紙寫?」
    
我:「病假紙醫生寫嘅,醫生睇完你之後認為你需要放假休息就會寫病假紙俾你。」
    
佢拎出身分證:「哦,好呀,我未睇過。」
   
登記後,我:「登記完㗎啦,你坐低等等啊,一陣醫生會嗌名~」
   
佢:「哦。」
   
睇完醫生,出藥時,佢望住啲藥:「得咁少藥嘅?」
   
我望住枱面上嗰六包藥加一枝咳藥水:「少?都成七款藥喎。」
  
佢:「包包得幾粒嘅?」
  
我:「兩日藥嘛,每日食四次咪每包八粒?」
  
佢:「哇,兩日藥得咁少㗎?」
  
小姐,有數得你計㗎喎~4+4=8啊~唔會4+4=88呀~
  
我:「你想要多幾日藥係咪?我幫你同醫生講呀~」
  
佢:「一樣價錢呀?」
  
你去酒樓食一籠蝦餃同食十籠蝦餃一樣價錢㗎咩?
  
我:「唔係啊,三百蚊係診金連兩日藥,如果你要三日就會係三百四十,每多一日就加四十嘅,你想要幾多日藥啊?定兩日都夠?」
   
佢諗咗陣:「點解我平時去政府醫院會一大袋藥嘅?佢哋都係十幾蚊咋喎?」
  
因為係政府。
  
我:「我哋係私家診所嘛…」
  
【診所低能奇觀】病假紙

(圖:視覺中國)

佢:「但係佢哋真係好多藥囉,我次次覆診都拎好大袋㗎喎。」
  
其實你有冇在意過我講咗啲咩?
  
我:「咁…我呢度係私家診所嚟嘅,一係你食咗呢兩日藥睇吓點先啦~你休息多啲呀~」
  
佢:「我就咁要張假紙幾錢呀?」
  
我:「…如果你真係唔要藥嘅都唔平得好多㗎咋~」
  
佢:「你一日藥四十蚊呀嘛,咁呢度兩日藥你咪減八十囉,即係二百二啦係咪?」
  
我:「係囉,唔係平得好多咋嘛?你食埋藥可以舒緩病徵喎,你可以好好休息吓喎。」
    
佢:「我都冇病!我冇舒服呀!我要張假紙咋嘛!我喺醫生房度扮嘢咋嘛,你一張紙都唔駛二百二啦,廿蚊有找啦!」
   
我收返起成袋藥連病假紙:「…你等等,我入去同醫生講。」
   
最後,小姐白講一輪都係冇病假紙了。陰公~鬼拍後尾枕啊你?
   
責編:李玥展

編輯:Stacy

編輯推薦

【診所低能奇觀】病人叫醫生執牛屎

佢放低一袋藥上枱面,冇出一句聲。 我:「做咩呀?袋藥你嘅?」 佢推前袋藥,打打眼色示意我睇睇,我拎啲藥出嚟望:「配藥呀?」

2018-07-26 09:57

【診所低能奇觀】太太逼工人姐姐打避孕針?!

太太:「我有俾錢佢㗎!告咩呀?要告都係我告佢勾引我老公啦!成日化妝化到雀咁!搏咩呀?搏我老公望你一眼呀?」

2018-07-16 11:06

【診所低能奇觀】鬼仔性格

佢:「收工收工收工,淨係識講收工,香港人打工淨係識講收工。」

2018-07-06 09:39

熱門評論

已複製連結