橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】無綫裁員促製播分途? 隨時危機四伏

文:方以文
   
近期無綫裁員,加上等員工完約自動流失,瘦身行動浪接浪,好多唔鍾意大台嘅人大拍手掌。當中有人話可以藉住今次機會,喺巿場上自由身技術人士增加之時,加上無綫為咗滿足牌照播放標準,而需要外判部分節目製作嘅情況之下,推動香港電視界走向製播分途。
    
製播分途不能改善行業工作情況
   
點解有人咁吹捧製播分途?我估好大原因都係因為無綫。無綫嘅製播同源模式已久,令到無綫嘅製作能力同節目時數可以獨佔鰲頭,成為亞洲嘅電視製作龍頭之一。不過呢個模式令到工作時數勁高,台前幕後日復日無間開工,為人詬病。有人希望製播分途可以令到情況改善,但我估香港各個電視台冇計劃畀多啲時間製作單位嘅情況之下,製播分途只會令到project與project中間可以有時間唞唞,拍緊嘅時候一樣係趕頭趕命。
   
【方以文 | 睇乜電視啊?】無綫裁員促製播分途? 隨時危機四伏

(圖片來源:《深宮計》影片截圖)

製播同源與節目質素下降無關
    
另一個好多人覺得製播分途可以解決嘅問題,就係電視節目缺乏創意原地踏步。缺乏創意唔係製播同源必然會引致嘅問題,只要有競爭,就唔會發展到今時今日咁。亞視喺生命最後階段缺乏自家製作不斷重播令到無綫冇外在對手,而無綫內部以梁家樹同埋曾勵珍為首嘅兩大劇集製作陣營,喺梁家樹退休同埋杜之克出現之後缺少咗競爭,令到無綫內部良性競爭動力驟減。內外推動進步嘅因素都冇咗,令到進步變得勁慢甚至水準倒退。所以有部分人認為製播分途係個好機會,電視台內部唔創新唔進步,就寄望承辦團體可以有啲新嘢畀到觀眾,令到一潭死水有返啲活力。
  
【方以文 | 睇乜電視啊?】無綫裁員促製播分途? 隨時危機四伏

(圖片來源:《深宮計》影片截圖)

把關人士仍可阻礙創新節目誕生
    
呢個良好願望我都好想佢發生,但事實上就算真係走到製播分途,有創意有進步嘅電視節目都未必會出現喺電視機度。最重要係把關問題,無綫唔敢搏,只想保住固有收視,所以唔敢輕舉妄動。到佢真係要外判節目出去時,無論收到嘅建議係幾咁創新、承創團體係幾有實力經驗都好,都好難令到抱住穩陣為首要條件嘅無綫接受呢啲提議。情況就好似一樣有外判電視製作嘅港台電視同埋ViuTV咁,台有台嘅風格品味,外判商只有兩條路揀:堅持自己創作而好大機會唔入圍,或者遷就電視台品味而設計節目。所以無綫一日唔受到衝擊而求變,他朝製播分途,都唔會令到無綫有咩翻天覆地嘅變更。
    
【方以文 | 睇乜電視啊?】無綫裁員促製播分途? 隨時危機四伏

ViuTV的《全民造星》是近期的話題節目(圖片來源:星島)

只怕劣幣驅逐良幣
   
另外,就係投放資金少嘅問題。有人相信製播分途係好事,係因為相信有競爭就會有好嘢睇。但呢個世界有樣乞人憎嘅狀況叫做「劣幣驅逐良幣」,喺電視台外判嘅時候,如果電視台以價低者得為標準,電視節目質素絕大機會愈來愈差。呢個唔係我斷估嘅,新台喺外判電視劇集時,近乎次次都聽到資金不足嘅問題。好彩的話,仲有啲蔗渣價錢燒鵝味道嘅節目睇。如果唔係,你畀碗仔翅嘅價錢想廚師煮真魚翅?真係妙想天開。
  
講到尾,行唔行製播分途模式唔係關鍵。電視台唔打算做好嘢嘅話,點變都冇用。
  
責編:李玥展

編輯:Stacy

編輯推薦

【方以文 | 睇乜電視啊?】無綫體育組解散 專業不敵速食必招後患

對於觀眾最大衝擊嘅,係同樣遭到滅門嘅體育組,因為佢哋製作嘅體育品牌節目《體育世界》要一齊死,結束38年嘅播放生涯。

2018-07-13 10:22

【方以文 | 睇乜電視啊?】綜藝節目首集播精華係咩玩法?

點解一個綜藝節目好地地,總要喺第一集用啲時間去講一次成個節目咁多集會有啲咩嘢睇呢?

2018-06-29 10:46

【方以文 | 睇乜電視啊?】新台請好好把握世界盃機會

有人希望新台可以靠世界盃吐氣揚眉,挫一挫無綫氣焰。不過世界盃對於兩個台嚟講,唔係此消彼長嘅對戰。無綫流失嘅收視,唔見得會流去ViuTV。

2018-06-15 09:32

熱門評論

已複製連結